Artıq bir çox tanınmış siyasətçilərin adı namizəd kimi çəkilir

Türkiyədə gərgin keçən bələdiyyə seçkilərindən sonra avqust ayında keçirilməsi planlaşdırılan prezident seçkiləri barədə müzakirələrə start verilib. Təbii ki, yerli seçkilərdə uğur qazanandan sonra baş nazirin şansları daha yüksək dəyərləndirilir. Türkiyədə son on illikdə keçirilən bütün seçkilərin aşkar favoriti olan AKP liderinin prezidentliyə gedən yolunda ona rəqib ola biləcək ikinci bir siyasi qüvvənin olmadığını söyləyənlər də var. Əsas rəqib kimi qəbul etdiyi nurçulara qarşı bütün cəbhələrdə savaş açan Ərdoğanın avqust ayına qədər onları tamamilə sıradan çıxarmaq istədiyi aydındır. Amma, bir çox analitiklər avqust seçkilərinin baş nazir üçün heç də asan keçməyəcəyini təxmin edirlər. Onun seçkilərdə əsas rəqibləri sırasında indiki prezident Abdulla Gülün də adı çəkilir. Ərdoğanın siyasi islama daha çox meyl etdiyini, bu səbəbdən ABŞ-ın dəstəyini itirdiyini bildirən şərhçilər seçkilərdə Ağ Evin Gülə stavka edə biləcəyini də ehtimal edirlər. Senki öncəsi Gül və Ərdoğanın namizədlik məsələsində hələ də anlaşa bilmədiləri xəbəri dolaşır. Türkiyənin siyasi şərhçilərinin qənaətinə görə Amerika rəsmiləri də Ərdoğana qarşı məhz Güldən istifadə etmək planlarını gündəmdə saxlayırlar.
Avqust seçkilərində Ərdoğanın əsas rəqiblərindən biri kimi Türkiyə Konstitusiya Məhkəməsinin sədri Haşim Kılıçın da adı yer alır. Xüsusilə, baş nazirin son çıxışlarında Konstitusiya Məhkəməsi haqqında sərt çıxışları, ittihamları bunu deməyə əsas verir. Ərdoğan son çıxışlarının birində Konstitusiya Məhkəməsini Hizmət hərəkatı ilə iş birliyində ittiham edərək “paralel dövlət sanki orda da var” demişdi. Prezident seçkilərində Ərdoğana qarşı camaat tərəfindən dəstəklənəcək bir çox isimlərin adı yer alsa da, ən çox üzərində dayanılan şəxs elə Haşim Kılıçdır. Bu səbəbdən də AKP funksionerlərinin və Ərdoğanın Konstitusiya Məhkəməsi barədə sərt ittihamlar səsləndirdiyi düşünülür. Hizmət hərəkatına yaxın informasiya vasitələrində də Kılıçın müdafiəsi yönündə aktiv iş aparıldığı görünür. Ərdoğan özünün seçki rəqibi kimi gördüyü Haşim Kılıça qarşı artıq əks-təbliğat kompaniyasına start verərək onu ittiham edir.
Baş nazirin rəqibləri arasında MHP-dən seçilən millət vəkili Meral Akşenerin də adı yer alır. Xanım siyasətçinin avqust seçkilərində MHP tərəfindən dəstəklənəcəyi ilə bağlı məlumatlar verilir. Türkiyənin digər iri siyasi partiyalarının prezidentliyə namizədləri barədə hələ ki, ətraflı məlumatlar verilir. Müxalifətin seçkilərə vahid namizədlə getmək strategiyasının olması barədə də informaiyalar yoxdur. Amma, bir çox siyasi şərhçilər seçkilərin ikinci tura qalacağı təqdirdə müxalifətin vahid namizədi dəstəkləməsinin mümkünlüyünü qeyd edirlər.
Ərdoğanın son seçkilərdən sonra böyük üstünlük qazandığı göz önündədir. Amma, avqust ayına qədər proseslərin hansı axarda davam edəcəyini təxmin etmək çətindir. Bütün ehtimallara baxmayaraq Ərdoğan hələ ki, prezident seçkilərinin aşkar favoriti olaraq qalır.
Nicat