Sərnişindaşıma Ziya Məmmədovdan alındı

Nazirlər Kabineti Bakı şəhərində sərnişinlərə avtobus nəqliyyatı sahəsində beynəlxalq standartlara uyğun xidmətin təşkili, bu sahənin müasir tipli nəqliyyat vasitələri ilə təchiz edilməsi, sərnişindaşımaların yerinə yetirilməsi zamanı texniki və ekoloji baxımdan təhlükəsizliyin təmin olunması məqsədi ilə qərar verib.
Bakı şəhər İcra Hakimiyyətinin tabeliyində özünümaliyyələşdirmə prinsipi əsasında fəaliyyət göstərən payları dövlətə məxsus “BakuBus” Məhdud Məsuliyyətli Cəmiyyəti (bundan sonra - Cəmiyyət) yaradılması qərara alınıb. Qərara əsasən, Cəmiyyətin nizamnamə kapitalının formalaşdırılması, ilkin mərhələdə fəaliyyətinin təşkili və Cəmiyyət tərəfindən sərnişin daşınması üzrə avtobusların alınması məqsədi ilə həmin Cəmiyyətə Azərbaycan Respublikasının 2014-cü ilin dövlət büdcəsində nəzərdə tutulmuş Ehtiyat Fondundan 30 milyon manat məbləğində vəsait ayrılacaq.
Maliyyə Nazirliyinə bu qərarla ayrılmış vəsaitin maliyyələşdirilməsini təmin etmək, Nəqliyyat Nazirliyinə isə Bakı Şəhər İcra Hakimiyyəti ilə birlikdə Cəmiyyətə məxsus avtobusların marşrutlarını və hərəkət qrafiklərini müəyyən etmək tapşırılıb.
Bakı şəhər İcra Hakimiyyətinə tapşırılıb ki, qanunvericilikdə nəzərdə tutulmuş qaydada “BakuBus” MMC-nin nizamnaməsinin təsdiq edilməsini, dövlət qeydiyyatına alınmasını və icra orqanlarının yaradılmasını təmin etsin və Əmlak Məsələləri Dövlət Komitəsi ilə birlikdə ən azı 200 ədəd iritutumlu avtobusun saxlanması məqsədilə avtonəqliyyat parkları (qarajları) üçün yerin ayrılmasını 1 ay müddətində təşkil etsin.
Qeyd edək ki, qəzetimizin ötən saylarında nəqliyyat nazirinin bir sıra səlahiyyətlərinin alınması ilə bağlı Nazirlər Kabinetində müvafiq olaraq layihənin hazırlanmasına dair məqalə yazmışdıq. Bildirmişdik ki, son zamanlar əhali arasında nazirliyin əməkdaşları ilə insanlar arasında ciddi problemlər yaşanır. Xüsusilə də yollarda nəqliyyat müfəttişlərinin özbaşınalıqları, vətəndaşlarla davranışlardan şikayətlərin sayı artıb. Bununla əlaqədar olaraq artıq dövlət başçısına da məlumat verilib. Nəhayət dünən rəsmən Nəqliyyat Nazirliyinin bir sıra səlahiyyətlərinin alınmasına dair informasiya rəsmən təsdiqini tapdı. Aldığımız informasiyalara əsasən nazirliyin səlahiyyətlərinin paylaşdırılması prossesi davam edəcək. Və prossesin sonunda Ziya Məmmədov postu ilə vidalaşmalı olacaq.
RÜFƏT