Baş nazirlə Konstitusiya Məhkəməsinin sədri Haşim Kılıç arasında mübarizə pik həddə

Türkiyədə bu yay hərarət kimləri yandıracaq?

Ötən hər gün Türkiyədə prezident seçkilərini yaxınlaşdırır. Vaxt azaldıqca siyasi rəqiblər arasında mübarizə kəskinləşir, qarşılıqlı ittihamlar səsləndirir. Xüsusilə, seçkilərdə Ərdoğanla əsas rəqiblərindən hesab olunan Konstitusiya Məhkəməsinin sədri Haşim Kılıç arasında münasibətlər pik həddə çatıb. Ali məhkəmə sisteminin yaradılmasının 52-ci ildönümünə həsr edilmiş mərasimdə Haşim Kılıç sözün əsl mənasında “ürəyini boşaldıb”. Onun sərt ifadələri qarşısında Ərdoğan ancaq toplantının yarısına qədər səbirləşə biib, daha sonra mərasimi yarımçıq tərk edib. Baş nazir “siyasətə gələcəksiniz, cübbənizi çıxarın” deyir. Bizlər ədalətli olmağı müqəddəs bir vəzifə kimi qəbul edən mədəniyyətin daşıyıcısı olaraq gücün və şərtlərin təsiri ilə köynək dəyişdirən bir xarakterin sahibi ola bilmərik” deyən Kılıçın çıxışı Türkiyə gündəmində bomba effekti yaradıb. KM-nin sədri bildirib ki, 17 dekabr Böyük rüşvət və korrupsiya əməliyatlarından sonra “paralel dövlət” suçlaması ilə Ərdoğan bir sıra dövlət orqanlarının qanuni fəaliyyətini çübhə altına alıb. “Biz Türkiyə məhkəmələrinin verdiyi bütün qərarların arxasındayıq”, - deyə Kılıç baş nazirə xəbərdarlıq edib. Kılıç Ərdoğanını Twitter yasaqlamasına da sərt reaksiya verib.
17 dekabr əməliyyatlarından sonra baş nazir demək olar ki, bütün çıxışlarında məhkəmə sistemi, dolayısı ilə Kılıçla bağlı sərt ifadələr işlədirdi. O, Konstitusiya Məhkəməsinin sədrini Gülən icması ilə əlaqələrdə ittiham edir, “paralel dövlət” yaratmaqda günahlandırırdı. Ərdoğanın ittihamları qarşısında uzun zaman sükutu pozmayan Kılıçın son çıxışı yenidən müzakirələri şiddətləndirib. Ərdoğanın cavabı da özünü çox gözlətməyib. Konyada tərəfdarları qarşısında çıxış edərkən Konstitusiya Məhkəməsi və müxalifət mövzusu yenə də Ərdoğanın nitqinin əsas qayəsini təşkil edib. “Bunlar məni dinləyirlər, prezidenti dinləyirlər. Yeni bir şey daha söyləyirəm. Konstitusiya Məhkəməsini də dinləyirlər. Bunların işi-gücü montajdır. Kimi dinləyirləsə dinləsinlər, qarşılarında biz varıq. Paralel dövlət ilə mücadiləmiz davam edir. Bunları təmizləyəcəyik. Ya yola gələcəklər, ya da gedəcəklər” deyən Ərdoğan prezident seçkilərinin də anonsunu edib. “Partiyamızın da bir prezidentliyə namizədi olacaq. 10 avqust 2014-cü il seçkilərində partiyamızın namizədini ilk turda qalib etməyə hazırıqmı?” deyə tərəfdarlarına səslənən Ərdoğan digər müxalifət partiyaları barəsində də sərt ifadələr işlədib. “Həm seçkidə məğlub oldular, həm də kirli ittifaq yaratdılar. Ey CHP, nə aldın? 28 faiz.MHP, sən nə aldın? 15 faiz. 43 faiz səs alan bunların səsi bizimaltımızda qaldı. 40 çürük yumurtadan bir bir sağlam yumurta etməz” deyərək müxalif qüvvələri xarici güclərlə işbirliyində günahlandıran Ərdoğan “Misirdə oynadıqları oyunu Türkiyədə də oynamaq istədilər. Müxalifət liderləri masaya oturdu. MHP və CHP arasında 30 mart öncəsi yaradılan kirli ittifaq artıq yüksək səslə danışılır” sözləri ilə rəqiblərini ittiham edib.
Ərdoğan çıxışında Fətullah Güləni də unutmayıb. “Pensilvaniyada nə işin var, çıx gəl! Ordan dəzgah qurma. Unutma, dəzgahların üzərində bir dəzgah var. O dəzgah bir gün səni də vuracaqdır”. Baş nazir tərəfdarlarına öz övladlarını Gülən icmasının məktəblərinə göndərməməyə çağırıb: “Alın bunların dərsanələrindən uşaqlarınızı. Önümüzdəki il bunların məktəblərinə uşaqlarınızı göndərməyin!”
Analitiklər Ərdoğanın son çıxışını Haşim Kılıçın ittihamlarından sonra prezident seçkilərinə start komandası kimi qiymətləndirib. Tərəflər arasında mübarizə açıq müstəviyə keçir. Vaxt daraldıqca ittihamların daha da sərtləşəcəyi, yeni kompromatların üzə çıxarılacağı gözlənilir. Türkiyədə çox isti bir yay olacaq.
Nicat MAHMUDOV