Elnur Aslanov və Elşad İsgəndərovdan sonra növbəti adı nurçuluqda
çıxan məmurun başı bəlada; SAM rəhbərinin PA-nın sabiq şöbə
müdirinə verilən aşağı ranqlı təyinata etirazı qıcıq doğurub

Strateji Araşdırmalar Mərkəzinin (SAM) rəhbəri, Elnur Aslanovun yaxın dostu Fərhad Məmmədovun “qara sərəncamı” hazırlanır. Adı nurçuluqda hallanan SAM rəhbəri E.Aslanov və dini komitənin sabiq rəhbəri Elşad İsgəndərovun ardınca istefaya göndərilə bilər.
Bu haqda “Gündəm-xəbər”ə məlumat verən qaynağın sözlərinə görə, F.Məmmədov təklənib və müdafiəsiz vəziyyətdə qalıb. Onun yaxın ətrafının istefaya göndərilməsi meydanda tək qalması ilə nəticələnib.
SAM-ın da Novruz Məmmədova verilməsindən sonra qeyri-rəsmi olaraq bütün səlahiyyətlərini itirib. Bu da onun tezliklə istefaya göndəriləcəyini qətiləşdirir. Ehtimal olunur ki, F.Məmmədova kiçik bir vəzifə veriləcək.
Onun adının nurçuluqda hallanmasından savayı, E.Aslanova verilən vəzifənin ranqının kiçik olmasına etiraz etməsi də SAM rəhbərinin müqəddəratını həll edib.
Mənbə bildirir ki, F.Məmmədovla bağlı danışıqlar gedir və artıq prezident sərəncamı hazırlanır. Yaxın gələcəkdə onun barəsində də istefa xəbərini eşidəcəyik. Mənbənin qeydlərindən belə nəticə hasil olur ki, F.Məmmədovun SAM-da mövqeləri sarsılıb.
“Bu gənc məmur da hakimiyyət üçün persona-non qrata elan olunub. İqtidarın qocaman məmurları bu cavan oğlanı Prezident Administrasiyası dəhlizlərində görmək istəmirlər. Ona görə Elnur Aslanovla Elşad İsgəndərov kimi Fərhad Məmmədov da prezident sərəncamı ilə işdən çıxarılacaq”, - deyə mənbə qeyd etdi.
Mətbuatda gedən xəbərlərdə deyilir ki, hakimiyyət strukturlarında gülənçilər qalır və onlar siyasi hakimiyyət üçün hər an təhlükə yarada bilərlər. Onlardan biri də Prezident yanında Strateji Araşdırmalar Mərkəzinin direktoru Fərhad Məmmədovdur.
SAM-a direktor təyin olunan gündən bu gənc gülənçi heç nə ilə yadda qalmayıb. Bu adamın adı davamlı olaraq Gülən təriqəti ilə hallanır. Əsas funksiyası elmi-tədqiqat, elmi-təşkilatçılıq, analitik-informasiya və elmi-nəşriyyat işi olan SAM F.Məmmədovun rəhbərliyində ciddi nəticələr qazana bilməyib.
Mərkəz daxili və xarici siyasət sahələrində araşdırmalar aparmalı, Azərbaycanın dünyada tanıdılması ilə bağlı işlər görməlidir. Bu yaxınlarda keçirilən toplantıların birində F.Məmmədov bildirib ki, bu günə qədər mərkəz ümumilikdə 56 tədbir həyata keçirib ki, bunlardan 28-i Azərbaycanda, 28-i xaricdə baş tutub.
SAM dünya beyin mərkəzləri siyahısında 123-cü sırada qərarlaşıb. Fərhad Məmmədovun Avtoreferatında göstərilən məqalələrinin siyahısında xaricdə dərc olunmaq adı ilə 2 məqaləsinin adı yer alıb.
Bu məqalələrin hər ikisi İstanbulda Gülən camaatının (nurçular) ciddi nəzarəti altında olan “Dialoq Avrasiya” jurnalının 18 və 22-ci nömrələrində dərc olunub. “Dialoq Avrasiya” jurnalı həm də elmi jurnal olmadığından AAK ümumiyyətlə bu jurnalı tanımır.
Rafiq Qara