Rusiyanın nəhəngi “Milli Media Qrup”un (MMQ) Direktorlar Şurası çərşənbə axşamı keçirdiyi səsvermə ilə yeni sədr seçib.


Anspress-in məlumatına görə, yeni sədr Rusiya prezidenti Vladimir Putinin sevgilisi olduğu iddia olunan, keçmiş deputat, Olimpiya çempionu və nəhayət gözəl xanım Alina Kabayevadır.

Qeyd edək ki, MMQ Peterburqun “Beşinci kanal”ı, REN-TV, İzvestiya qəzeti, “Rusiya xəbərlər xidməti” radiostansiyasının və “Birinci kanal”ın səhmlərinə sahibdir.

1983-cü il təvəllüdlü Alina Maratovna Kabayeva Daşkənddə doğulub və böyüyüb. O, bədii gimnastika üzrə Olimpiya çempionu, onlarla dünya və Avropa çempionatlarının qızıl medalına sahibidir. 5-ci və 6-cı çağırış Rusiya Dumasının deputatı seçilən Alina iqtidar partiyasının üzvüdür. Əməkdar idman ustası və bir çox mükafat laureatıdır.

Kabayevanın RF prezidenti Putinlə evlənməsi isə 2008-ci ildə Rusiya və Qərb mətbuatında gedən məqalələrdə iddia olunub. Kabayeva bu günə kimi xəbəri təsdiqləməyib və şəxsi həyatı barədə danışmaqdan da imtina edir.