Abidin Fərzəliyev-Şahmar İbadov tandeminin nəzarətindən kənarda nə bir sahibkar, nə kommersiya obyekti var; şimşəkləri üzərinə çəkən müavin başçını qorumaq missiyasını yerinə yetirir

Adı milyon manatlarla ölçülən daşınmaz əmlakların sənədləşdirilməsində keçən Şahmar İbadovdan prezidentə müraciətlər ünvanlanıb

Bakının mərkəzi rayonlarından biri iki məmur arasında bölüşdürülüb. Şəhərin tən ortasını sözün əsl mənasında dədə malı kimi pay-püş edən, qubernatorluq yaradan vəzifəli şəxslər bu imkanları bir-birinə yaradıb. Söhbət Nərimanov rayonundan gedir.

Fərzəliyevin priyomu

“Gündəm-xəbər”in həftə ərzində apardığı araşdırmalar və media üzərindən əldə edilən məlumatlardan belə qənaətə gəlinib ki, Nərimanov kimi mərkəzi rayon Abidin Fərzəliyev-Şahmar İbadov arasında bölünüb.

İcra başçısı və müavini paytaxtın ən strateji rayonlarından birini inhisara alıb. Onların nəzarətindən kənarda nə bir sahibkar, nə kommersiya obyekti var. Total şəkildə rayona nəzarət edən başçı-müavin tandeminin əsas praktiki Ş.İbadovdur.

A.Fərzəliyev Ş.İbadovu qabağa verərək məsuliyyəti onun üzərinə qoyub. Bu, həm ona olan etimaddan irəli gəlir, həm adının hallanmaması üçün bu priyomu istifadə edir. Məlumatlarda bildirilir ki, ciddi dayaqlara malik olan icra başçısı yüksək çinli məmurlardan bir çoxu ilə hesablaşmır.

Onun hesab verdiyi müəyyən dairələr var və bu baxımdan Nərimanov rayonunda arxayın şəkildə öz istəklərini həyata keçirir. Ş.İbadovun əl-qolunun geniş açılması, rayondakı tikinti və iaşə obyektlərinə açıq şəkildə əl qoyması da bu imkanlardan yaranıb.

İddialara görə, Nərimanov rayonundakı gəlirli sahələrin yarıbayarısı Ş.İbadovun nəzarətindədir. Bu imkanlara sahiblənməsi təbii ki, onun siyasi gücünü də artırıb. Fərzəliyev hətta rayonu ona həvalə edib istədiyi zaman istirahətə çıxa da bilər. İstər Nərimanov RİH-dəki idarəçilik, istər rayon ərazisində biznes məntəqlərinə nəzarət baxımından Şahmar İbadovdan etibarlısı yoxdur.

Əmlak sənədləşməsi “əməliyyatı”

Mənbə “Gündəm-xəbər”ə qeyd edib ki, son zamanlar icra başçısının fəndləri sayəsində adı bir çox qalmaqallı işlərdən kənarda qalıb. Əksinə, başçı müavini ön sırada olub. Bütün şimşəkləri üzərinə çəkən müavin bununla başçını qorumaq missiyasını yerinə yetirir. Ş.İbadov məmurdan çox, məhz biznes işində olduqca fərasətlidir. Bu rayonda elə bir sahibkar olmaz ki, onu tanımasın.

Nərimanov rayon icra başçısı Abidin Fərzəliyev 1-ci müavininə ən birinci imkanları yaradıb. Başçının kassiri və rayondakı kombinasiyalarının mahir ustası sayılan Şahmar İbadov Nərimanovun qubernatoru rütbəsinə yüksəlib desək yanılmarıq.

Məlumatlara görə, Ş.İbadovun səriştəsi və kassa işində peşəkarlığı Milli Məclisə qədər uzanır. Bu vəzifəsinə qədər Milli Məclisdə sektor müdiri olmuş Ş.İbadovun çox qısa zaman ərzində Nərimanov rayonu ərazisində də məharətini nümayiş etdirib.

Onun adı milyon manatlarla ölçülən daşınmaz əmlakların sənədləşdirilməsində hallanır. İddia olunur ki, başçı müavini Fərzəliyevin himayəsi və göstərişləri əsasında, bəzən isə onun xəbəri olmadan bir sıra əməliyyatlar həyata keçirməyə müvəffəq olub.

İbadovun misilsiz əməlləri

Daşınmaz əmlak qeydiyyatından əlavə, binaların sökülməsi, plana düşən tikililərə görə kompensasiyaların bölüşdürülməsi işlərinə də sahiblik edib. Bəzi qaynaqlardan gələn xəbərlərdə bildirilir ki, İbadov Nərimanov ərazisində poluiteran materialların binalara üzlənməsində belə baş məsləhətçi olub.

İddialara görə, bu keyfiyyətsiz üzlüklərin rayondakı binaların fasadına yamaq etməkdə müavinin mənfəəti olub. Mənbə qeyd edir ki, Fərzəliyev bu məsələdən heç də xəbərsiz olmayıb və onun istəkləri reallaşıb. Artıq həmin üzlüklər sökülüb. Ş.İbadov qısa müddət ərzində böyük qazanc əldə edib.

Bundan əlavə, Həsən Əliyev küçəsinin Azərbaycan Müəllimlər İnstitutu ilə bitişdiyi ərazidə 5 mərtəbəli binaların söküntü işləri aparılıb. Yerində isə yeni binaların tikintisi hələ də davam edir. Şahmar İbadov bu prosesdən çox böyük qazanc əldə edib.

İcra Hakimiyyətinin birbaşa nəzarəti altında tikilən ərazidəki yeni binaların 1-ci mərtəbələrinin obyekt kimi satılması və ya yaxınlarının adına rəsmiləşdirilməsi kimi işlər də İbadovun əli ilə gerçəkləşib. Bütün bu faktlar yetərli olmalıydı ki, İbadovun personası haqda təsəvvürlər yaransın.

Sahibkarları sıxışdırmaq

Amma başçı müavini barəsində məlumatlar bununla məhdudlaşmır. Təbii ki, Hesablama Palatası yoxlama aparsa, Maliyyə Nazirliyi araşdırmalara başlasa iki əməmurun Nərimanov rayonunda hansı işlərə qol qoyduğunu ifşa edə bilər.

Eyni zamanda dövlət başçısına ünvanlanan müraciətlər Şahmar İbadovun əməlləri haqda şikayətlər yer alıb. Sahibkarların da etdiyi müraciət və məktublarda başçı müavininə ciddi ittihamlar var. Onun sahibkarların fəaliyyətinə əngəl olduğu, sıxışdırma mexanizmini işə saldığı iddia edilir.

Yada salaq ki, prezident İlham Əliyev iş adamlarına şərait yaradılması haqda xüsusi tapşırıq verib, onlar 2 illik vergidən azad olunub, məmurlara ciddi xəbərdarlıq edilib. Ş.İbadov isə A.Fərzəliyevə arxayınlaşaraq öz fəaliyyətini davam etdirməkdədir. Yəni, rayonun qeyri-rəsmi hegemonu İbadov sayılır. Elə media siyasətində də rolu az deyil.

Məsələn, icra başçısı ilə müavini Qaradağ rayon rəhbərliyini də himayə edir. Süleyman Mikayılova qahmar çıxan bu iki qüvvə onun barəsində yazılanları ört-basdır etməyə çalışır. Bütün bunlar Nərimanov rəhbərliyinin siyasi və iqtisadi gücü haqda bilgilər idi.

“Moyka” biznesi

Rayondakı sosial problemlərə gəlincə, Nərimanov rayon icra başçısı avtoyuma biznesi açıb. Abdin Fərzəliyev rayondakı əksər məntəqələri yaxın adamlarına həvalə edib. Nərimanov rayonunda 50 kvadrat metrlik boş yerlərin hamısı nəzarətə alınıb və onlar avtoyuma məntəqələri açmaq istəyənlərə satılır. Məlumatlara görə, Nərimanov rayonunda avtoyuma məntəqələrinin çoxluğu kifayət qədər narazılığa da səbəb olur.

Çünki Fərzəliyevin pul qazanmaq üçün satdığı yerlərin bəziləri kiçik məhəllələrdə yerləşir. Bu isə avtomobillərin hərəkət etməsinə mane olmaqla yanaşı, həm də istifadə olunmuş suyun normal qaydada kanalizasiyaya axmasına əngəl olur.

Nəticədə, məhəllə içlərindəki avtoyuma məntəqələrinin istifadə etdikləri sular evlərin zirzəmilərinə dolmağa başlayır. Onu da bildirək ki, Nərimanov rayonunda 50 kvadratlıq avtoyuma yerlərinin qiyməti heç də ucuz deyil. Bunun üçün sahibkar ən azından 25 min manatından keçməlidir. Nərimanov rayon İcra Hakimiyyətinin xüsusi təyin olunmuş işçiləri isə Fərzəliyevə aid olmayan məntəqələrdən aylıq haqq yığır.

Bəs, Fərzəliyev kimdir?

Fərzəliyev Abdin Ələsgər oğlu 1967-ci ildə Naxçıvan Muxtar Respublikasının Şərur rayonunda anadan olmuşdur. 1974-84-cü illərdə orta Ümumtəhsil məktəbində təhsil almışdır. Əmək fəaliyyətinə 1984-85-ci illərdə H.Z.Tağıyev adına Bakı Tikiş Toxuculuq Kombinatında fəhlə kimi başlayan A.Fərzəliyev 1985-ci ildə N.Tusi adına Azərbaycan Dövlət Pedaqoji Universitetinin «Kimya-biologiya» fakültəsinə daxil olmuş, 1985-87-ci illərdə Moskva vilayətində keçmiş Sovet Ordusunda hərbi xidmət keçmiş, 1992-ci ildə isə N.Tusi adına Azərbaycan Dövlət Pedaqoji Universitetini fərqlənmə diplomu ilə bitirmişdir. Həmin ilin oktyabr ayından 1993-cü ilin fevral ayına qədər «Naxçıvan» qəzetinin müxbiri vəzifəsində çalışmışdır.

1993-cü ilin fevral ayından noyabr ayına qədər «Əlincə» Xeyriyyə Cəmiyyətinin təşkilat şöbəsinin müdiri vəzifəsində, 1993-cü ilin noyabr ayından 1994-cü ilin avqust ayına qədər isə Yeni Azərbaycan Partiyasının Mərkəzi Aparatında məsul işçi, təşkilat şöbəsinin baş təlimatçısı vəzifəsində işləmişdir. 1994-cü ilin sentyabr ayından 1998-ci ilin fevral ayına qədər Azərbaycan Respublikası Gənclər və İdman Nazirliyinin Ərazi İdarəetmə orqanları ilə iş və kadr hazırlığı İdarəsinin rəis müavini, rəisi vəzifələrində işləmişdir. 1998-ci ilin fevral ayından 2003-cü ilin aprel ayına qədər Bakı Şəhər İcra Hakimiyyəti Başçısı Aparatının Gənclər, İdman və Turizm Baş İdarəsinin rəisi vəzifəsində işləmişdir.

2001-2004-cü illərdə Milli Olimpiya Komitəsinin İcraiyyə Komitəsinin üzvü olmuş, hal-hazırda da üzv kimi fəaliyyət göstərir. 2001-ci ildə Azərbaycan Respublikasının Prezidenti yanında Dövlət İdarəçilik Akademiyasının «Dövlət və Bələdiyyə İdarəetməsi» fakültəsini bitirmişdir.

2003-cü ilin aprel ayında Azərbaycan Respublikası Prezidentinin Sərəncamı ilə Bakı şəhəri Nizami Rayonu İcra Hakimiyyətinin Başçısı vəzifəsinə təyin edilmişdir. 2005-ci ilin dekabr ayından isə Azərbaycan Respublikası Prezidentinin Sərəncamı ilə Bakı şəhəri Nərimanov Rayonu İcra Hakimiyyətinin Başçısı vəzifəsində çalışır.

Zöhrab Təmrazov