Bakı meri Ticarət Departamentinin hesabına köşk biznesi ilə bir tərəfdən, Mənzil-Kommunal Təsərrüfatı Departamenti rəhbərinin əli ilə digər tərəfdən varlanır

İl ərzində 1 milyon manata yaxın pul büdcədən yayındırılır; BŞİH-də Rəfail Mehralıyevin Vidadi Zeynalovla ortaq işlərinin şok detalları ifşa edilib

Bakı meri Hacıbala Abutalıbov bir neçə ildir ki qəzet köşklərindən milyonlar qazanır. Amma bu gəlir heç də qəzet satışı yox, həmin köşklərdə satılan ərzaq məhsullarının hesabına əldə olunur.

“Gündəm-xəbər”in əldə etdiyi məlumata görə, təzə qəzet köşkləri qəzet yayımı adı ilə vergidən yayınırlar. Hansı ki, həmin köşklər qəzetdən başqa hər şey satırlar. Hətta spirtli içkilərin də satışını həyata keçirirlər.

Artıq neçə ildir ki bu reallıq mövcuddur. Üstəlik, Bakı şəhər İcra Hakimiyyətinin Ticarət Departamentinin məmurları köşklərin yerləşdirilməsini biznesə çeviriblər. Bu pullardan isə böyük pay Abutalıbova çatır.

Departamentin məmurları köşkü istədikləri yerə qoya bilirlər. Buna görə, 20 min manat qeyri-qanuni pul alırlar. Sonra hər ay 2000 manat haqq tələb edirlər. Odur ki, qəzet satışı həmin köşklər üçün maraqlı deyil. Bu ortada olan çirkli maliyyə dövriyyəsinin dövlət büdcəsinə heç bir aydiyyəti yoxdur.

Bakıda artıq 400 köşk fəaliyyət göstərir ki, ayda milyonlarla manatın şəxsi ciblərə axdığını iddia etmək olar. Beləliklə, çap mətbuatı Abutalıbovun biznesinə görə böyük məbləğdə ziyana düşür. Elə “Gündəm-xəbər” qəzeti yayımda ciddi şəkildə zərər edib.

Əslində görünüşcə daha modern olan bu kökşlər əksər paytaxt sakinlərinin gözünü oxşadığından bu proses elə də ciddi ictimai qınağa səbəb olmamışdı. Təbii ilk əvvəl. Amma artıq fəaliyyətə başlayan bu köşklərdən tamam fərqli məqsədlə istifadə olunduğunu görən paytaxt sakinlərinin şikayətləri də artmağa başlayıb.

Belə ki, qəzet satışı üçün nəzərdə tutulan yeni modern köşklər əslində minimarket funksiyasını həyata keçirməkdədir. Yəqin ki, bu fakt əksər oxucuların da diqqətini cəlb edib. Yeni qəzet köşklərinə kassa aparatı qoyulmayıb Bu da il ərzində 1 milyon manata yaxın pulun büdcədən yayınması deməkdir. Çap məhsullarından başqa burada hər şey satılır - ərzaq və meyvə-tərəvəzdən tutmuş, oyuncaqlara, hətta geyimə qədər… Bu da təbii ki, qəzet və jurnal nümayəndələrini narahat etməyə bilməz.

Qəzet almaq üçün oxucuların ənənəvi olaraq ilk növbədə köşkə yaxınlaşdığını nəzərə alsaq və gələcəkdə «Qasid»din köşklərinin tam şəkildə yeniləriylə əvəz olunması planlaşdırıldığından bunun yazılı KİV-in satışını minimuma endirəcəyi göz qabağındadır.

Köşklərdə gündəlik nə qədər alver getdiyinə gəlincə, satıcılar bildirdilər ki, bu, köşklərin şəhərin hansı hissəsində olmasından asılıdır: “Məsələn, metroların üstü alverin “xod getdiyi” yerlər olduğundan orada gündəlik dövriyyə 500-700 manatdır. Amma dayanacaqlar və şəhərin başqa yerlərində gündəlik 300-500 manat çıxır”.

Satıcıların sözlərinə görə, köşkün aylıq icarə haqqı da onun yerləşdiyi məkandan asılıdır. Məsələn, metro stansiyaların yaxınlığındakı köşklərin aylıq icarə haqqı 2500-3000, şəhərin nisbətən az gediş-gəliş olan yerlərində isə 2000-2500 manatdır.

Gözdən-könüldən iraq yerlərdə isə icarə haqqı 1500 manata düşür. Gündəlik 500 manatlıq alver edən köşk sadələşdirilmiş vergi ilə gündəlik dövriyyənin 4 faizini, yəni 20 manatını vergi kimi büdcəyə ödəməlidir. Bu da ay ərzində 600, il ərzində isə 7200 manat edir.

Abutalıbov təkcə köşk biznesindən qazanmır. “Gündəm-xəbər”ə verilən məlumata görə, Bakı şəhər İcra Hakimiyyətinin Mənzil-Kommunal Təsərrüfatı Departamentinə rəhbəri də merə milyonlar qazandırıb. Bakı şəhər İcra Hakimiyyətinin Mənzil-Kommunal Təsərrüfatı Departamenti ölkənin ən gəlirli dövlət idarələrindən biri hesab olunur. Departament yüksək məbləğlərdə qeyri-qanuni gəlirlərin əldə olunması üçün ən münasib qurumlardan biri kimi tanınır.

Departamentin tabeliyində Mənzil-Kommunal Təsərrüfatı Birlikləri, “Lifttəmir” İstehsalat Birliyi, Sahibsiz Heyvanlara Qarşı Mübarizə İdarəsi, Əhaliyə Vətəndaşlıq Xidməti Tresti, Bakı Şəhər Yollarının İstismarı İdarəsi, İnzibati Binaların İstismarı İdarəsi, Xüsusi Təyinatlı Avtonəqliyyət İdarəsi, Təchizat və Komplektləşdirmə İdarəsi, Bakı Şəhər Fəvvarələrin İstismarı İdarəsi kimi qurumlar fəaliyyət göstərir.

Bu amil daha az diqqət göstərilən bu idarələrə ayrılan külli miqdarda vəsaitlərin mənimsənilməsi üçün münbit şərait yaradır. Departamentə rəhbərlik edən Rəfael Mehrəliyevin özü də bu məsləllərdə böyük ad çıxarmış şəxslərdən hesab olunur.

Belə ki, Mənzil-Kommunal Təsərrüfatı Departamentinin rəhbəri bugünədək çalışdığı bütün vəzifələrdə müxtəlif rüşvət yığımlarında, mənimsəmə hallarında adının çəkilməsilə dəfələrlə medianın gündəminə gəlib.

Maraqlıdır ki, məlum “MTN işi” ilə əlaqədar Rabitə və Yüksək Texnologiyalar Nazirliyinin keçmiş aparat rəhbəri Vidadi Zeynalovun həbsindən dərhal sonra, mətbuat səhifələrində bu şəxsin bacısı oğlu Rəfael Mehrəliyevin də bilavasitə iştirak etdiyi bir çox iri miqyaslı maxinasiyalar barədə açıqlamalar yer almağa başladı.

Vidadi Zeynalovun vəzifədə olduğu vaxtlarda da dayı-bacıoğlu haqqında mətbuatda geniş məlumtlar dərc olunurdu. Dayı-bacıoğlu "rüşvət donoru" adlandırılan bu şəxslərdən birinin Hacıbala Abutalıbova, digərinin isə Əli Abbasova rüşvət daşıdığı deyilirdi.

İddialara görə, Vidadi Zeynalov 1995-1999-cu illər ərzində Bakı şəhər Maliyyə İdarəsinin rəisi vəzifəsində çalışdığı dövrdə Bakı şəhərinin mənzil kommunal təsərrüfat sisteminə də edib.

Daha dəqiq desək bu sahəyə ayrılan büdcə vəsaitlərinin xərclənməsinə nəzarəti məhz o, həyata keçirib. Elə həmin vaxt Bakı şəhər Mənzil Kommunal Təsərrüfatı İdarəsinin maliyyə şöbəsinə öz qohumu Rəfail Mehralıyevi təyin etdirib.

Mətbuatda yazılanlara görə, 1999-cu ildə Vidadi Zeynalovun Maliyyə Nazirliyinin Kollegiyasının qərarı ilə işdən qovulmasının əsas səbələrindən biri də, məhz elə paytaxtın mənzil kommunal təsərrüfatı

sahəsinə ayrılan büdcə vəsaitlərinin istifadə olunmasında yol verdiyi ciddi pozuntuları olub. Amma dayısının işdən qovulması Rəfael Mehrəliyevin statusuna təsir göstərməyib.

Sadəcə olaraq, onun tərəfindən bəzi əməliyyatlar müvəqqəti olaraq dondurulub. Lakin bu hal da uzun davam etməyib. Belə ki, Vidadi Zeynalov Əli Abbasov tərəfindən Rabitə və Yüksək Texnologiyalar Nazirliyinə yeni vəzifəyə gətiriləndən sonra o, Rəfael Mehrəliyevin də mövqeylərini möhkəmlətməyə nail ola bilib.

Həmin vaxt Əli Abbasov Bakı şəhər İcra Hakimiyyətinin başçısı Hacıbala Abutalıbovla yaxın qohumluq əlaqələrində olduğundan, Rəfael Mehrəliyevin də karyera yüksəlişi asan həyata keçir.

Nəhayət 2012-ci ildən, bu məmur Bakı şəhər Mənzil Kommunal Təsərrüfatı Departamentinə rəhbərlik etməyə başlayır. Vidadi Zeynalov isə Rabitə və Yüksək Texnologiyalar Nazirliyində əyləşməklə, paytaxtın kommunal təsərrüfatına ayrılan külli-miqdarda vəsaitlərin xərclənməsinə nəzarətini daha da gücləndirmiş olur.

Məlumata görə bir müddət əvvəl Hesablama Palatası tərəfindən Bakı şəhər Mənzil Kommunal Təsərrüfatı Departamentində aparılan yoxlamalar nəticəsində ortaya fantastik rəqəmdə vəsaitin mənimsənilməsi faktı çıxıb.

Palatanın bu yoxlamasından ciddi şəkildə narahatlıq keçirən departament rəisinin vəziyyətinin o qədər də yaxşı olmadığı iddia edilir. Ortaya çıxan mənimsəmənin ört-basdır ediləməsi üçün Rafael Mehrəliyevin müxtəlif yollara əl atdığı və hələlik istəyinə nail olduğu bildirilir.

Ümumiyyətlə, Mehrəliyevin rəhbərlik etdiyi qurum Bakı Şəhər İcra Hakimiyyəti tərəfindən verilmiş səlahiyyətlər dairəsində abadlıq, tikinti, habelə mənzil fondunun və kommunal təyinatlı obyektlərin əsaslı təmiri, modernləşdirilməsi və qurulması, aşınmalara uğramış liftlərin dəyişdirilməsi və texniki xidməti, şəhər yollarının istismarı və cari təmiri, xiyabanların və qəbiristanlıq təsərrüfatının saxlanması və abadlığı, xidmət sahələrinin inventarlarla təchizatının təmin edilməsi, fəvvarələr və yeraltı keçidlərin istismarı və təmiri, şəhərin mənzil-kommunal təsərrüfatı ilə bağlı digər funksiyaları həyata keçirir.

İddialara görə, hazırda həbsdə olan Vidadi Zeynalovun obyektləri, əmlakları bacısı oğlu Rafael Mehrəliyevin nəzarəti altındadır. Vidaid Zeynalov hələ həbs edilməmişdən əvvəl mal-mülkünü başqa-başqa şəxslərin adına keçirməklə varidatının bir hissəsini gizlədib.

Rafael Mehrəliyev hazırda həbsdə olan dayısının obyektlərinin bir hissəsini gizli şəkildə sataraq keçmiş aparat rəhbərinin ailəsinə verdiyi deyilir. Ancaq bununla belə Rabitə və Yüksək Texnologiyalar Nazirliyinin vasitəsi ilə milyonlar mənisəyən Vidadi Zeynalovun hələ xeyli sayda obyektinə Rafael Mehrəliyevin gizlin şəkildə nəzarət etdiyi deyilir.

Görünür dayısı Vidadi Zeynalovun həbs olunması belə Rafael Mehrəliyevi o qədərdə qorxutmayıb. Çünki olduqca böyük "məmur oliqarxa" çevrilən Mehrəliyevin Vidadi Zeynalovun həbsindən dərhal sonra mal-mülükün bir hissəsini Rusiya və Türkiyəyə transfer etməsi barədə söz-söhbətlər gəzir.

Yəni əllərində olan obyektlər, əmlakların böyük əksəriyyətini "sığortalayan" dayı-bacıoğlu həbsdən belə qormurlar. İndi isə növbənin məhz bacıoğluna çatdığı ehtimallarının yüksək olduğu deyilir.

Rafiq Qara

gundemxeber.az