İcra başçısı ölkənin ən nüfuzlu generalını ləkələyir

Zakir Fərəcov dövlət rəhbərliyinin illərdir etimad göstərdiyi, kifayət qədər reytinqi olan Bəylər Əyyubovun imicinə zərbə vurmaqdan çəkinmir

Şəhər rəhbərinin müdhiş əməllərinin sensasion gizlinləri və sahibkarların prezidentə məktubu “Gündəm-xəbər”də...

Sumqayıtın icra başçısı bütün sərhədləri aşmağa başlayıb. Zakir Fərəcov ölkənin ən nüfuzlu və etibarlı şəxslərinin adından sui-istifadə hallarına yol verməkdədir.

İcra başçısı tərəfindən dövlət rəhbərliyinin illərdir etimad göstərdiyi nüfuzlu kadrların imicinə, reputasiyasına xələl gətirilir.

Generalın adından sui-istifadə

Z.Fərəcov cəmiyyətdə kifayət qədər reytinqi olan və dövlət rəhbərliyində mühüm mövqeyə malik bir generalın adından istifadə etməklə sumqayıtlıların “dərisinə saman təpir”.

Sumqayıt merinin öz şəxsi mənfəəti, biznes maraqlarına görə nüfuzlu generalın adı ona layiq olmayan işlərdə hallanır. Bu barədə “Gündəm-xəbər”in əldə etdiyi məlumatda qeyd olunur.

Xəbərdə bildirilir ki, Xüsusi Dövlət Mühafizə Xidməti rəisinin birinci müavini, Prezidentin Təhlükəsizlik Xidmətinin rəisi, general-polkovnik Bəylər Əyyubovun adına xoşagəlməz informasiyalar çıxarılır.

Bu xəbərlərin tirajlanmasında və Sumqayıtda yayılmasında Z.Fərəcovun dolayısı ilə iştirakının olduğu iddia edilir.

Məlumatlara görə, Sumqayıtın rəhbəri generalın himayəsində olduğunu el arasında məxfi xəbər kimi sızdırır. Guya general onun dayağıdır və kimsə icra başçısına bata bilməz.

B.Əyyubovun nüfuzundan sui-istifadə edən icra başçısı şəhərdə onun adından müxtəlif neqativ işlər həyata keçirir. Prezidentin etimad göstərdiyi və güvəndiyi bir kadrın adına yaraşmayan şaiyələr yayan Z.Fərəcov öz istəklərini reallaşdırır.

Hətta bir qrup sahibkarın ölkə başçısına müraciət etdiyi və teleqramda Fərəcovun əməllərindən bəhs olunduğu bildirilir.

İş adamları B.Əyyubovu hörmətli bir şəxs, nüfuzlu general kimi tanıdıqlarını, onun belə xırda işlərə baş qoşmadığına inandıqlarını, Sumqayıtın icra başçısının özfəaliyyəti olduğunu teleqramda vurğulyıblar.

Prezidentə Fərəcovdan şikayət

Prezidentdən xahiş olunur ki, generalın adından sui-istifadə edən icra başçısı barəsində tədbir görülsün. Sahibkarlara xatırladıblar ki, ölkə başçısının iş adamlarının fəaliyyətinə imkan yaradılması barədə məmurlara xəbərdarlığı var. Z.Fərəcov isə tərəddüd etmədən nüfuzlu generalın adını neqativ işlərə qarışdırıb.

“Azərbaycan Bayrağı” ordeni və 2-ci dərəcəli “Vətənə xidmətə görə” ordeni ilə təltif olunmuş prezidentin şəxsi mühafizə xidmətinin rəhbərinin adından sui-istifadə etmək yalnız Sumqayıt şefinin ağlına gələ bilər, nə ilə nəticələnəcəyi isə bilinməz. Belə ki,

Sumqayıtda hər qanun pozuntusunda B.Əyyubovun adından istifadə olunur. Sahibkarların pulunun mənimsənilməsində, iri ticarət mərkəzi sahiblərindən xərac toplanmasında generalın adı çəkilir.

İş adamlarından bac yığanlar Fərəcovun Əyyubovun adamı olduğunu, ondan göstəriş gəldiyini və özlərinin bu işdə yalnız icraçı olduqlarını bəhanə gətirirlər.

Bu bəhanə isə Fərəcovun ağlına gəlib və adamlarına tapşırıb. O, generalın nüfuzundan istifadə edə biləcəyini təxmin edib və ŞİH-dəki nümayəndələrini təlimatlandırıb. B.Əyyubovun isə bu özbaşınalıqdan məlumatı olmadığı hiss olunur.

“Gündəm-xəbər”ə daxil olan məlumatda bildirilir ki, Z.Fərəcovun bu siyasəti həm generala, həm dövlətə hörmətsizlikdir. Bir qrup sahibkarın prezidentə ünvanladığı müraciətdə deyilir ki, B.Əyyubovun da məsələyə biganə qalmayacağına inam var.

Abşerondan Sumqayıta qədər Əyyubov adı

Abşeron rayonunda Zakir Fərəcov “şah” olan dövrdə obyekt sahibləri, sahibkarlar çox problemlərlə üzləşmişdilər. Onlar bu məmurun hər ay tələb etdiyi rüşvəti ödəmək məcburiyyətində qalır və onun haqsız tələblərini icra edirdilər.

Hətta hər bayram ərəfəsində Zakir Fərəcovu “görüb” onun bayramını “təbrik etmək” məcburiyyət sayılırdı. Z.Fərəcovun istəkləri isə tükənmir və obyektlərdən yığılan rüşvət icra başçısını qane etmirdi.

Abşeronda torpaq satışı da icra başçısından xəbərsiz həyata keçirilə bilməzdi. Torpaq almaq istəyən vətəndaş merin qohumlarını görməli və onların razılığını almalı idi. Nəticədə torpaqlara tətbiq olunan rüşvət ödədildikdən sonra vətəndaş torpaq sahibi ola bilərdi. Zakir Fərəcovun qanunsuz əməlləri təkcə bununla bitmir. Bu şəxs sənədləri qaydasında olan və qanunla özünə ev tikmək istəyən vətəndaşları da öz şəxsi qaydalarına və tələblərinə əməl etməyə məcbur edirdi.

Vətəndaş əgər torpaq sahəsində ev tikmək istəyirsə mütləq rayon icra hakimiyyətinə getməli idi. İcra hakimiyyətində isə onu qəribə tələblər gözləyirdi.

Həmin tələblərdə Zakir Fərəcovun istəkləri qeyd olunmuş rüşvət cədvəli vətəndaşa təqdim olunurdu. Tikilən evin mərtəbəsindən və otaqların sayına uyğun olaraq İcra başçısının rüşvətini ödəmək mütləq şərt idi.

Əgər vətəndaş bu istəyi yerinə yetirməkdən imtina edirdisə onda onun tikdirdiyi evi icra başçısının qoçuları uçurdurdular. Haqsızlıqdan olunan şikayətlərə isə cavab verən tapılmırdı. Çünki Z.Fərəcov Abşeronda da B.Əyyubovun adından istifadə edirmiş.

Bələdiyyə sədrliyindən bilinirdi ki...

Abşerona “divan tutan”dan sonra Sumqayıt şəhərinə icra başçısı təyin olunan Zakir Fərəcov şəhər sakinlərini məyus etdi.

Bu şəxs sələfi olan Eldar Əzizova qarşı illərlə mübarizə aparırdı. Hətta aralarında düşmənçilik o qədər dərinləşmişdi ki, sadə vətəndaşlar da bu barədə ətraflı məlumatlı idi.

Eldar Əzizovla uzun müddət davam edən çəkişmədən sonra qələbə çalan Fərəcov indi sumqayıtlıların ən ağır bəlasına çevrilib. Bu şəxsin təyinatı baş verən gün Sumqayıtda çox az sayda vətəndaşın sevindiyini görmək olardı. O sevinənlər də Zakir Fərəcovu yaxından tanımayan və ya Eldar Əzizovla düşmən olan fərəcovlar idi.

Sumqayıtlıların təyinatdan narazı qalmasının səbəbi bu məmuru keçmişdəki fəaliyyəti ilə bağlıdır. Şəhərdə illər öncə, 1999-2005-ci illərdə bələdiyyə sədri işləmiş şəxsin etdiyi qanunsuzluqlar unudulmamışdı.

Sumqayıtın bir çox sakinlərini haqsız yerə incidən, torpaq satışı zamanı rüşvəti qaldıran şəxs indi icra başçısı kimi fərqli fəaliyyət göstərə bilməzdi.

Məhz sumqayıtlılar yaxşı bilirdi ki, yeni icra başçısı şəhərdə qanunsuz tələblərini irəli sürəcək və hamını rüşvətxor istəkləri ilə hesablaşmağa məcbur edəcək. Bu belə də oldu və Sumqayıt bu gün Fərəcovların şəxsi mülki kimi idarə olunmaqdadır. Sumqayıta mer kimi yenicə qədəm basan şəxsin ilk hədəfi böyük ticarət obyektləri oldu. Yeni təyin olunan icra başçısı böyük ticarət mərkəzlərindən 500 min manat rüşvət tələb etdi. Bu tələbi yerinə-yetirməkdən imtina etməyə cəhd edənlər təzyiqlə üzləşməli oldu.

Qeyd edək ki, “Karvan”, “Cavid” və “Sumqayıt” kimi ticarət mərkəzləri alış verişə, satıcılığa üstünlük verən şəhər sakinlərinin daimi iş yerinə, qazanc məybəyinə çevrildi. Ölkəyə gələn neft pullarının artması nəticəsində bu gəlirlər bir az da artdı, biznes mühiti də nisbətən yaxşılaşdı.

Amma ardıcıl 2 il “Karvan” ticarət mərkəzinin 2 dəfə yan(dırıl)ması bu inkişafa müəyyən fəsadlar verdi, təxminən 2 min icarədar və satıcı iş yerindən məhrum oldu. Bu böyük ticarət mərkəzinin işini dayandırması Sumqayıt iqtisadiyyatına və memarlığına böyük zərbə vurdu.

Zərər çəkən, qazancını itirən Sumqayıt sakinləri ya şəhərin digər ticarət mərkəzlərində icarə yeri tapmağa, yaxud müxtəlif küçə və xiyabanlarda obyekt tikməyə başladılar. Sumqayıtda çökən biznes mühiti Zakir Fərəcov Sumqayıtda “sahibkar üsyanı” yetişdirir.

Rusiyaya qarşı tətbiq edilən sanksiyalar, cari ildə manatın devalvasiyası, iş yerlərinin azalması, kütləvi ixtisarlar Azərbaycanın hər yerində olduğu kimi, Sumqayıtda da mənfi təsirlərini göstərməyə başladı.

Sumqayıt Texnologiyalar Parkından, “Azərikimya”nın zavodlarından, Sumqayıt Trikotaj Fabriki, həmçinin su, qaz və işıq idarələrindən ümumilikdə minlərlə işçı ixtisara düşdü.

Bu da onminlərlə ailənin maddi cəhətdən çıxılmaz duruma düşməsi deməkdir. Üstəlik, onsuz da zəif olan biznes mühiti də geriləməyə, alış veriş zəifləməyə istiqamət aldı.

Şəhərə yeni icra başçısı – Zakir Fərəcov təyin olunduqdan sonra sumqayıtlıların qəlbində ümidlər yarandı. İcra başçısı müxtəlif sahələr üzrə genişmiqyaslı işlərə, təmir-tikinti fəaliyyətinə başladı.

Qısa müddət ərzində işlərin miqyası və sürəti artmağa başlasa da, yeni başçı gözlənilməz qadağalar, yeni qərarlar qəbul etməyə başladı. Bunlardan ən acınacaqlısı Sumqayıtda qeyri-hökumət işlərində çalışan – ticarətlə məşğul olan sumqayıtlılar üçün oldu.

Fərəcov kimdir?

Zakir Fərəcov 1954-cü ildə fevral ayının 3-də Laçın rayonunun Qazıdərə kəndində anadan olmuşdur. 1961-1971-ci illərdə orta ümumtəhsil məktəbində təhsil almışdır. Əmək fəaliyyətini 1971-ci ildə Sumqayıt Superfosfat zavodunda fəhlə kimi başlamışdır.

1972-ci ilin noyabr ayından 1974-cü ilin noyabr ayınadək Murmansk vilayətinin Severomorsk şəhərində keçmiş Sovet Ordusunda həqiqi hərbi xitmətdə olmuşdur.

1971-ci ilin yanvar ayında Sumqayıt şəhəri Mənzil Kommunal Təsərrufatı İstehsalat birliyində texnik kimi işə başlamışdır. 1975-ci ildə D.Bünyadzadə adına Xalq Təsərrufatı İnstitutunun "Sənaye İqtisadiyyatı" fakültəsin axşam şöbəsinə daxil olmuş, 1980-cı ildə həmin İnstitutu bitirmişdir.

1978-ci ildə Sumqayıt şəhəri Mənzil Kommunal Təsərrufatı birliyində şöbə rəisi, 1981-ci ildə baş direktorun müavini, 1988-ci ildə Mənzil Kommunal İstehsalat birliyinə baş direktor təyin olunmuşdur.

1999-cu ildə keçirilən bələdiyyə seçkilərində iştirak etmiş və Sumqayıt şəhər bələdiyyəsinin sədri seçilmişdir. 2005-2015-ci illərdə isə Abşeron Rayon İcra Hakimiyyətinin başçısı vəzifəsində çalışmışdır.

Azərbaycan Respublikası Prezidentinin 2 sentyabr 2015-ci il tarixili Sərəncamı ilə Sumqayıt şəhər İcra Hakimiyyətinin başçısı təyin olunmuşdur. Ailəlidir, 4 qızı, 1 oğlu, 5 nəvəsi var.

P.S. Yazıda ittiham olunan şəxslər və barəsində iddialar səslənən kəslərin mövqeyini, həmçinin Suqmayıt ŞİH-nin münasibətini dərc etməyə hazırıq.

Rafiq Qara
gundemxeber.az