Milli Şura sədri Cəmil Həsənli Facebook səhifəsində Azərbaycan məhkəmələrində baş verən qanunsuzluqlar, istintaq altında olan şəxslərin ağır işgəncələrə məruz qalmasından yazıb:

“Dostlar! Son günlər Bakı Ağır Cinayətlərə dair məhkəmə binasında “Nardaran işi”, “Beynəlxalq Bankın yüksək vəzifəli şəxslərinin işi”, ötən ilin may ayının 19-da çoxlu insan təlafatı ilə nəticələnmiş “Yanan bina işi” və digər proseslər aparılırdı. Sonuncu işlə bağlı açılan faktlar heyrətamizdir. Təqsirləndirilən şəxslərin ifadələrindən aydın olur ki, keçmiş MTN binalara “ölüm üzlükləri” çəkən şirkətlərdən iri məbləğdə rüşvət tələb edib. Binada yanğın baş verən zaman insanları xilas etmək əvəzi nazirliyin çoxsaylı əməliyyyat işçiləri “Global Construction” şirkətinin ofisində əməliyyat keçiriblər. Şirkətin rəhbəri Miryusif Mahmudovun ifadəsindən bəlli olur ki, 19 may hadisəsindən öncə MTN şəhərin müxtəlif yerlərində lokal yanğınlar törədib. Deməli ölkənin təhlükəsizliyinə cavabdeh olan mühüm dövlət qurumunun çəkilən üzlüklərin insan həyatı üçün təhlükəli olmasından xəbəri olub. Dünən mən “Nardaran prosesi” də iştirak etdim. Dünənki proses işgəncə faktların ağlasığmaz xarakteri və bu işgəncələr əsasında saxlanılan şəxslərdən Azərbaycan vətəndaşları əleyhinə ifadə vermələrinə məcbur edilmələri ilə yadda qaldı. Təqsirləndirilən şəxslərdən Əlibala Vəliyev başına gətirilən müsibətlərdən danışdı. O dedi ki, Fərahimi mebel maşınında döyüb öldürdülər, Hacı Taleyin belini sındırmaq istəyirdilər: “Döyüləndən sonra şükr eləyirdim, çünki elə əxlaqsız işgəncələr verirdilər ki, onların yanında «dubinka» ilə ayağın altına vurmaq heç nə idi”. Məhz bu əxlaqsız işgəncələrin təhdidi ilə “Bandotdeldə” Əlibalada Tale Bağırzadə və Abbas Hüseynin əleyhinə ifadələr alıblar. Verilən işgəncələrin miqyasına toxunduqdan sonra Əlibala dedi: “Fikirləşdim ki, Taleh və Abbas başıma gətirilənləri bilsə, onlara atılan iftiralara görə mənə halallıq verərlər”. Elə prosesin gedişində Hacı Tale də, Abbas Hüseyn də Əlibalaya öz halallığını verdilər, amma ondan xahiş etdilər ki, “Bandotdeldə” başına gətirilən müsibətin, ona verilən işgəncələrin olduğu kimi mənzərəsini yaratsın. Əlibala ilk olaraq elə idarənin həyətində baş barmağının sındırıldığını dedi. Sonrakı gün həkim barmağına revanol tökəndə idarənin məsul işçisi həkimə öz xəbərdarlıq edib ki, onun barmağına revanol yox, kislata tökmək lazımdır. Sorğu sual nəticəsində bəlli oldu ki, saxlanılan şəxs tələb olunan ifadəni verməzdisə onu dəyənək yeridilməsi ilə təhdid edəcəklərini bildiriblər. Məhz bu əxlaqsız təhdiddən sonra Əlibala Hacı Tale və Abbas Hüseyn əleyhinə “Bandotdeldə” quraşdırılan ifadələri vermək məcburiyyətində qalıb. Hadisə yerində təsdiqləyici çəkiliş aparmaq üçün Əlibala ilə “Bandotdeldə” 3-4 gün məşq ediblər. Onun dediyinə görə bütün məşqlərin video çəkilişi aparılıb. Əlibala hadisə yerində Hacı Taleyin harada oturulduğun, silahların hansı qapıdan gətirildiyin, Abbas Hüseynin həmin silahları necə paylamasın göstərməli idi. “Bandotdel” bütün hazırlıq məşqlərini başa çatdırdıqdan sonra Nardaranda silahlı dövlət çevrilişinə cəhd olduğunun sübutu kimi özləri tərəfindən hazırlanmış ssenari əsasında Əlibalanı hadisə yerində çəkiblər. Əli bala isə dəmir barmaqlıqlar arasından Quranı-Kərimi məhkəmə zalına göstərib bəyan etdi ki, bu Qurana and olsun ki, o videoda çəkilənlər və mənim orada dediklərim hamısı yalandır və hamısı “Bandotdeldə” quraşdırılıb. Ondan sonra sərbəst ifadə verən Cabbar Cabbarov dedi: Bizə elə işgəncələr verirdilər ki, məcburam, üstüörtülü də olsa, deyim. Təsəvvür edin, əllərimiz bağlı vəziyyətdə yerə uzadıb, cinsiyyət orqanımızın üstünə çıxıb tapdalayırdılar. Bu cür əxlaqsız yollarla bizdən ifadə almağa çalışırdılar. Mən işgəncələrə görə məcbur olub damarlarımı doğradım. Mənə dedilər ki, “burada artistlik eləmə, ya qol çəkəcəksən, ya da öldürüləcəksən”. Bu ifadələrdən görünən odur ki, MTN-dən sonra ölkənin daha bir əsas güc qurumu əməlli-başlı işgəncə orqanına, qanunsuzluq yuvasına çevrilib və ölkədə konstitusion nəzarətindən çıxıb.
Beynəlxalq Bankın pezidenti Cahangir Hacıyevin də həmin gün keçirilən məhkəməsindən maraqlı məlumatları elə ağır cinayətlər məhkəməsinin binasında aldıq. Yeri gəlmişkən onun nə dərəcədə günahkar olub olmadığını indi demək çətindir. Amma onu və Beynəlxalq Bankın işi ilə bağlı olan yüzlərlə iş adamını “Bandotdeldən” keçiriblər. Cənab Hacıyev onun təqsirli bilindiyi işin bu idarəyə heç bir aidiyyəti olmadığını və onun “Bandotdeldə” saxlanmasının qanunsuz olduğunu ilk məhkəmə prosesində bəyan edib. Yeri gəlmişkən, maliyyə və iqtisadi qurumlarla “Bandotel” dilində danışılması ölkəni bürüyən iqtisadi-maliyyə böhranının əsas səbəblərindən biridir. 2015-ci ilin yayında “Bandotdelin” iş adamları üzərinə total hücumu çoxlu müəssisələrin bağlanması, xaricə kapital axınının güclənməsi, iş adamlarının mülkiyyətinin əlindən alınması ilə nəticələndi. Məhkəmə prosesində Cahangir Hacıyev ölkənin maliyyə nazirinin də onunla birlikdə dəmir barmaqlıqlar arasında oturmalı olduğunu tələb etdi. Bu ölkənin maliyyə həyatında baş verənlərin bir anonsu idi. Necə olur ki, devalvasiyadan vəzifəli şəxslərin bankları qazanır, xalqın var-yoxu əlindən çıxır. Deməli adamlar tutduqları vəzifədən yararlanaraq dövlət siyasətindən özlərinin və özlərinə yaxın qurumlarının varlanmasına şərait yaradıblar. Beynəlxalqın Bankın ən böyük kredit borclusu hakim dairələrə bağlılığı ilə seçilən “Akkord” şirkətidir. Bu şirkətin yalnız bu bankdan aldığı kreditlərin həcmi “Bandotdeldə” istintaqa cəlb edilmiş bütün iş adamlarının birilkdə aldıqları kreditlərdən dəfələrlə çoxdur. Hələ kredit ödənişlərinin müddəti bitməmiş iş adamları “Bandotdeldə” təhdid edildikləri halda Bankın belə böyük borclusu haqqında hər kəs susmağa üstünlük verir. Yəqin Beynəlxalq Bankın işində bu məsələyə də aydınlıq gətiriləcək. Cahangir Hacıyevin istintaqının “Bandotdeldə” aparılmasının digər maraqlı nüansları vardır. Məlum olduğu kimi təxminən on il DİN-də yuva salmış insan qətlləri və adam oğurluğu ilə məşğul olan cinayətkar dəstə Cahangir Hacıyevin həyat yoldaşı Zamirə Hacıyevanı oğurlamışdı. O, zaman da DİN naziri Ramil Usubov idi, indi Cahangir Hacıyev “Bandotdeldə” istintaq ediləndə də DİN naziri Ramil Usubovdur. Halbuki, ölkənin mövcud qanunlarına görə Beynəlxalq Bank ətrafında yaranmış maliyyə qalmaqalı bilavasitə inzibati-iqtisad məhkəməsində araşdırılmalı idi. Bu halda hansı məqsədlə bu iş “Bandotdelə” göndərilib? Görünür bütün bu suallara məhkəmədə təqsirləndirilən şəxslər aydınlıq gətirəcəklər”.