Deputat belə bir hadisə olacağı təqdirdə Müdafiə Nazirliyinin qiyama müqavimət göstərəcəyinə şübhə etdiyini bildirib

Fazil Mustafa vətəndaşlara pulsuz dəniz havası almaq hüququ verilməsini, Qüdrət Həsənquliyev dövlət qurumlarında milli kadrların önə çəkilməsini təklif etdi
Milli Məclisin növbədənkənar iclası spiker Oqtay Əsədovun sədrliyi ilə öz işinə başlayıb.

Cari məsələlərdə çıxış edən deputat Məlahət İbrahimqızı 15 iyun qurtuluş günündən danışdı. Zahid Oruc isə MTN-nin keçirdiyi əməliyyat nəticəsində həyata keçirilən həbslərdən danışdı: “Son hadisələr sübut edir ki, İran Ermənistanla təkcə iqtisadi-siyasi müttəfiq deyil, həm də Qarabağda narkotərəfdaşdırlar. Bu maddəni Azərbaycana göndərmək həm də bir silahdır. Bizim insanlar ağrı-acının qarşısında qalacaqlar, ermənilər həm də bu silahla bizi vurdular. Biz Ermənistanda və Qarabağdakı hərbi rejimə qarşı müxtəlif səviyyələrdə davalar açmalıyıq”.

Z.Oruc Türkiyədəki proseslərin Azərbaycan insanını da üzdüyünü bildirdi. PKK məsələsinin sona çatdığı bu dövrdə baş verənlər mahiyyətcə Azərbaycanı da təhdid edir.
Fazil Mustafa Xəzər dənizinin hasarlanmasından danışdı: “Görməmişlik, acgözlük o səviyyədədir ki, dənizlə insanlar arasında məsafə yaradılıb. Mən maraqlanmışam, Şıx çimərliyində çimmək 2 manat, Bilgəh 20, Nardaran 15, Şüvəlan 20 manatdır. Ona görə də mən qanun layihəsi təqdim etmək niyyətindəyəm. İstəyirəm orda əks olunsun ki, vətəndaşa ayda 5 gün havayı dənizdə çimmək, 10 gün dənizin sahilində təmiz hava almaq hüququ verilsin. Vətəndaş bir çimərliyə havayı gedə bilmir. Vaxtilə Heydər Əliyev də bu məsələ ilə bağlı mövqeyini bildirmişdi, ancaq nəticəsi yoxdur”.
Qənirə Paşayeva bakalvrlara və magistrlərə hərbi xidmətdən möhlət hüququnun verilməsi il bağlı məsələni qaldırdı. Bu istiqamətdə hansısa addımların olub-olmayacağı barədə tələbələrin narahatçılığını çatdırdı: Bu uşaqlara möhlət hüququnun verilməsi müsbət addım olardı. Biz magistraturanı qazanan gənclərə magistraturanı bitirənədək möhlət hüququ versək, bu elmin inkişafına da müsbət töhfə verər”. Deputat növbəti iclasda bu məsələyə baxılmasını xahiş etdi. Q.Paşayeva qəhrəman analara, çoxuşaqlı ailələrə dəstək istiqamətində addımın atılmasını da zəruri saydı.
Qüdrət Həsənquliyev öncə həmkarı Asim Molllazadəni 60 illik yubileyi münasibətilə təbrik etdi. O, Asim Mollazadənin müxalifət təmsilçisi olaraq “Şöhrət” ordeni ilə təltif olunmasını xatırlatdı: “Asim bəy həm də Əbülfəz Elçibəyin müavini olub. Bu, yaxşı bir işin başlanğıcıdır. Seçki ilində müxalifətlə iqtidarın dialoqa girməsinə çox böyük ehtiyac var”.

Daha sonra Q.Həsənquliyev Gəncə hadisələrindən bəhs etdi və ilginc məqamlara toxundu: “1993-cü ildə Gəncədə hərbi qiyam başlayanda hamımız bilirdik ki, xarici güclər bu qıyanım arxasında dayanmışdılar. Bu gün Müdafiə Nazirliyi rəhbərliyində təmsil olunan şəxslər o zaman da Müdafiə Nazirliyinin rəhbərliyində təmsil olunurdu. Ancaq onlar ölkədə sabitliyi qoruya, qiyamın qarşısını ala bilmədilər. Mən sual etmək istərdim, yenə də belə bir təhlükə yaranarsa, onlar Ali Baş Komandanı və dövləti müdafiə edəcəklərmi? Müdafiə Nazirliyi və digər hökumət qurumları milli kadrlarla gücləndirməlidir”.
Spiker dedi ki, bununla bağlı daxildə hər hansı bir narahatlıq yoxdur: “Düzdür, xarici qüvvələr bu sabitliyi pozmağa çalışırlar. Onları da bilirik. Hesab edirik ki, müvafiq qurumlar bunun qarşısını alacaq”.
Aydın Mirzəzadə isə Q.Həsənquliyeviin iyun hadisələrini dövlət çevrilişi adlandırmasına etiraz etdi. O dedi ki, o zaman ölkə prezidentinə etimadsızlıq göstərildi və yeni prezident seçildi.
İqbal Ağazadə dedi ki, seçki ilində siyasi məhbuslarla bağlı problem aradan qaldırılmalıdır: “İyunun 18-də İsmayılı hadisələri ilə bağlı həbs olunan İlqar Məmmədov və Tofiq Yaqublunun həbsi ilə bağlı Avropa Məhkəməsinin Azərbaycana verdiyi vaxt başa çatır. Onlar, həmçinin NİDA-çəı gənclər həbsdən azad olunmalıdır”.
Deputat onu da dedi ki, Azərbaycan dövlət himni səslənərkən nə Milli Məclis, nə idman komandaları buna heç biri reaksiya vermir: “Qanuna dəyişiklik edilməli, məcburi qaydada həm milli komandalar, həm də dövlət tədbirlərində himnin oxunması vacib hesab olunmalı, hər kəs dövlət himnini oxumalıdır”.
Siyavuş Novruzov həbsdə olanların siyasi məhbus olmadığını iddia edərək onları aşağılayan ifadələr səsləndirdi.
Sabir Rüstəmxanlı dedi ki, son vaxtlar tarixi qəhrəmanlarımıza qarşı kampaniya aparılır. Bu mənada o, Şah İsmayıl Xətaiyə qarşı Türkiyənin Kanal24-də aparılan aşağılayıcı kampaniyanı xatırlatdı: “Mən eşitdiyimə görə bu kanalı ARDNŞ alıb. Xahiş edirəm ARDNŞ-ın rəhbərliyi buna aydınlıq gətirsin”.