Moskvadakı “Milyarderlər ittifaqı”nın üzvü Söyun Sadıqov Azərbaycanda Milli Şuranın yaradılmasını dəstəklədiyini bəyan edib. S.Sadıqov “Turan”a müsahibəsində o belə deyib:
“Sağlam, konstruktiv müxalifət bütün ölkələr tərəfindən qəbul olunur. Azərbaycan Milli Şurası Azərbaycanda müxalifət qüvvələrini yaxşı bir platforma ətrafında birləşdirən bir qüvvədir. Amma nədənsə hakimiyyət onlardan qorxur. Bu, yanlış taktikadır. Şəxsən mənim fikrim belədir ki, Milli Şura hakim Yeni Azərbaycan Partiyasından daha çox təşəbbüskardır. Və Milli Şuranın namizədı kimi Rüstəm İbrahimbəyov həqiqətən güclü rəqibdir. Rüstəm İbrahimbəyevə görə tarix üçün, seçkilərdə saxtakarlığın qarşısını almaq üçün bütün sosial və siyasi qüvvələri, gənclər təşkilatlarını, ziyalıları və digər fəal insanları birləşdirmək vacibdir”.
Azərbaycanda R.İbrahimbəyova qarşı cinayət işinin açıla biləcəyi ehtimalına toxunan S.Sadıqov deyib ki, əgər hakimiyyət belə bir işə qol qoyarsa, onda ən böyük səhv etmiş olacaq:
“Rüstəm İbrahimbəyov təkcə Azərbaycanda deyil, bütün dünyada ictimai xadim kimi tanınır. Məşhur yazıçı və dramaturq, rejissor, nüfuzlu mükafatların sahibi, Azərbaycanın xalq yazıçısı, Azərbaycan və Rusiyanın əməkdar artisti fəxri adlarının sahibidir. Bu şəxs Azərbaycan müxtəlif sosial qrupların nümayəndələrini birləşdirməyə qadir olan adamdır. Bundan əlavə, o, “Oskar” mükafatının qalibidir. Rüstəm İbrahimbəyov, Rəşid Behbudov və Müslüm Maqomayev kimi insanların sayəsində Azərbaycan bütün dünyada məşhur olub. Bütün dünya onun müdafiəsinə qalxacaq. Və mən düşünmürəm ki, hökumət bundan udsun”.
S.Sadıqov Azərbaycanın daxili işlərinə müdaxilə etməsinə görə onu qınayanlara belə cavab verdi ki, o, ictimai fəaliyyətlə yanaşı həm də siyasi elmlərlə məşğul olur. Ona görə də onu günahlandıranlar bu məqamı unutmamalıdır:
“Mən yalnız Azərbaycandakı siyasi vəziyyət deyil, eyni zamanda həm də Gürcüstan və Ermənistandakı siyasi vəziyyətləri təhlil edirəm. Ona görə də mən heç kimin daxili işlərinə müdaxilə etmirəm və belə bir fikrim də yoxdur. Bundan əlavə, Azərbaycanın rüşvətə bulaşmış rəsmiləri bizim Abbas Abbasov və Rüstəm İbrahimbəyovla birgə Rusiyada gördüyümüz işlərin heç yarısını da görmürlər. Bu gün mən hakimiyyəti başa düşürəm. Onlara xarici düşmən tapmaq lazımdır və onlar bizi düşmən kimi qəbul edirlər. Bildiyim qədər bu gün Azərbaycanda İsraildən gəlmiş polittexnoloqlar oturublar və onlar hakimiyyətə belə məsləhətlər verirlər”.