“Normal iqtisadi qanunlar və prinsiplər baxımından hakimiyyətə seçkidə üstünlük gətirəcək iqtisadi uğurlar yoxdur”.

Bunu çıqlamasında iqtisadçı-ekspert Rövşən Ağayev deyib. O bildirib ki, ölkədə azad rəqabət mühiti təmin olunmayıb, kiçik və orta sahibkarların maraqlarını müdafiə edən mexanizmlər yoxdur: “Həmçinin ölkədə orta təbəqə yoxdur. Yoxsulluğun və işsizliyin real səviyyəsi həddən artıq yüksəkdir, regionlarla paytaxtın inkişaf səviyyəsi arasında isə disbalans fantastik dərəcədə böyükdür”.

Ekspert cəmiyyətin aparıcı təbəqəsi olan təhsil, səhiyyə və elmi işçilərin məvaciblərinin ölkə üzrə rəsmi orta aylıq əmək haqqından 2-3, dövlət məmurlarının və polislərin maaşlarından isə 5-6 dəfə az olduğunu qeyd edib: “Ailələrin əksəriyyətinin yaşayışları yenə remitansların, yəni Rusiyadan və başqa ölkədən göndərilən pullar hesabına formalaşır. Azərbaycan brend kimi dünyaya çıxarılası bir normal əmtəənin ixrac potensialını belə formalaşdıra bilməyib. İşçi qüvvəsinin hələ də 65-67 faizi qeyri-rəsmi sektorda çalışır, yəni hər 10 nəfərdən 7-nin pensiya və sağlamlıq sığortası ilə bağlı hüquqi əminatı yoxdur”.

R.Ağayev təhsil və səhiyyə sektorundakı duruma da münasibət bildirib: “Təhsilin inkişafı üçün milyonlarla manat vəsait sərf edilir, lakin hər 10 məzundan yeddisi "5" ballıq sistem üzrə "2" qiymət alır. Eləcə də səhiyyə sektoruna milyonlarla manat yatırılır, amma hələ də Azərbaycan vətəndaşları müayinə və müalicə üçün İran və Türkiyəyə gedirlər”.

İqtisadçı deyib ki, büdcənin ən azı 76-77 faizi birbaşa, 80-82 faizi dolayısı ilə neftin hesabına formalaşır, ixracın da 93 faizi neftə bağlıdır. Bunlar isə yaxşı iqtisadi göstərici sayılmır.