Rəsul Quliyev Milli Şura sədrinin Bakıya 31 iyul qayıdışı ilə bağlı şok iddialarla çıxış etdi

“Azərbaycan hakimiyyəti indiyə qədər heç vaxt güclü rəqibini seçkilərə buraxmayıb. Qorxduqları rəqiblərini seçkilərə buraxmamaq üçün onlara qarşı müxtəlif çeşidli cinayət işləri açıb, ən yaxşı variant kimi ölkədən didərgin salıblar. Bu gün hakimiyyətin qorxduğu yeganə şəxs Rüstəm İbrahimbəyovdur”.

Virtualaz.org-un məlumatına görə, bunu Rüstəm İbrahimbəyovun Bakıya qayıtdıqdan sonra həbs olunacağını qətiyyətlə vurğulayan eks-spiker Rəsul Quliyev deyib. R.Quliyev bu fikirlərini bu gün öz facebook hesabında paylaşıb.

“O, caamat arasında populyardır, xarici ölkələrin incəsənət adamları və son 3-4 ayda siyasətçiləri tərəfindən qəbul olunmuş şəxsdir. Bunun nəticəsidir ki, ABŞ konqresmənləri bu yaxınlarda Azərbaycanda olarkən prezidentlə görüşlərində ilk məsələ olaraq İbrahimbəyovun Azərbaycana gəlib seçkidə namizəd kimi iştirak etməsinə şəraitin yaradılması tələbini irəli sürüblər. Faktdır ki, Vaşinqtonda Helsinki Komissiyasının müzakirələrində iştirak edən ABŞ dövlət adamlarının hamısı çıxışlarında Milli Şuranın namizədi kimi İbrahimbəyova şərait yaradılmasını tələb ediblər, başqa sözlə, seçkinin leqitimliyinin bu faktordan asılı olduğunu qeyd ediblər. Bu dinləmələrdə iştirak edən Azərbaycanın Vaşinqtondakı səfirinin hesabatı rejimin təşvişini bir qədər də artırıb. İlham Əliyevin konqresmenlərə verdiyi vədin - "onsuz da xalq məni seçəcək, İbrahimbəyov gəlsin, seçkilərdə iştirak etsin, ona heç kim mane olmayacaq" vədinin ömrü heç bir ay da çəkmədi”- deyə Rəsul Quliyev qeyd edib.



Eks-spiker hakmiyyətin məqsədinin İbrahimbəyovu Bakıya buraxmamaq olduğunu deyib: “İbrahimbəyovun gündən-günə artan nüfuzunun qarşısını almaq üçün ancaq özlərinə xas olan metodlara əl atırlar. Bu gün İbrahimbəyova qarşı yazılan ssenari artıq detalları ilə məlumdur. Heydər və İlham Əliyevlərin yaxın keçmişdə İbrahimbəyov barəsində söylədikləri “qeyri-adi talant”, “prinsipial şəxsiyyət” kimi təriflər bir kənara qoyulub, onu korrupsioner, pul mənimsəyən kimi təqdim etmək niyyətindədirlər. Əsas məqsəd onu Azərbaycana buraxmamaq, seçkidə iştirak etməsinə imkan verməməkdir. İbrahimbəyov iyulun 31-də Bakıya gələrsə, onu qarşılamağa gedənləri amansızcasına dağıtmaq, kimlərisə həbs etmək komandası artıq verilib. Bunun üçün inandıqları xüsusi polis dəstələrində 2 mindən artıq kommandos yaradılıb. İbrahimbəyovu isə aeroportda həbs edib 2 gün ərzində açılmış "cinayət" işi ilə əlaqədar həbsxanadan buraxmamaqdır. Siz bu ssenari ilə son 20 ildə yüzlərlə insanların həbs edildiyinin şahidisiniz”.

İbrahimbəyovla birgə işləmiş adamları intensiv şəkildə istintaqa çağırıldığını deyən R.Quliyev vurğulayıb ki, İbrahimbəyov üçün `cinayət` işləri formalaşdırırlar: “Haqq-ədalətin olmadığı bir ölkədə bu işləri görməyin nə dərəcədə asan bir şey olduğunu hər birimiz bilirik. Bu hazırlıq işindən sonra məqsəd tez bir zamanda onun üzərində məhkəmə prosesi başlamaq və cinayətkar kimi bir neçə illiyə həbs etməkdir. Başqa sözlə, seçkidə iştirakına icazə verməməkdir. Çox ehtimal ki, İbrahimbəyovun törətdiyi çoxsaylı "cinayətlər" barədə 30 iyulda teleşou da hazırlanır”.

ACP lideri iyulun 31-də Bakıya gələcəyi gözlənilən İbrahimbəyova öz məsləhətlərini də verib: “Əgər onu müdafiə edə bilməyəcəyiksə, verdiyi sözə əməl edib iyulun 31-də Bakıya gəlib cəmiyyətdən tədric edilməsi nə qədər məqsədəuyğundur məsələsi bu gün bizim hər birimizi narahat etməlidir. Düşünürəm ki, İbrahimbəyov Bakıya gəlməmişdən öncə hansısa bir ölkədə Milli Şuranın bir sıra üzvləri ilə görüşməli və dərindən müzakirə etməlidir. Gərək bütün qüvvələri hökumətin bu müdhiş, xalqın əleyhinə olan siyasətinin qarşısını almaq üçün mobilizasiya etməyin yollarını axtaraq. Məqsəd bir olmalıdır: ya İbrahimbəyov seçkilərdə iştirak edəcək, ya da seçkilərin keçrilməsinə imkan verməyəcəyik. İbrahimbəyovun xalqdan təcrid edilməsi ölümə bərabər bir şeydir. Biz buna yol verə bilmərik”.

Sonda Azərbaycan xalqına və Milli Şura üzvlərinə səslənən Rəsul Quliyev İbrahimbəyovun Bakıya qayıdışı ilə bağlı öz şərtlərini açıqlayıb:

“1. İbrahimbəyov hökmən prezident seçkisinin namizədi olmalıdır, hamı bir nəfər kimi buna çalışmalıdır.

2. İbrahimbəyov onun müdafiəsini real təşkil etdikdən sonra Bakıya gəlməlidir.

3. Bunun üçün onun MŞ-nin bir sıra üzvləri ilə görüşüb real vəziyyəti müzakirə etməsi zəruridir.

4. İbrahimbəyovun namizədliyi qeydə alınmasa, prezident seçkilərinin keçrilməsinə ümumiyyətlə imkan verməməliyik”.