AXCP sədri Əli Kərimli Milli Şuranın sədri Rüstəm İbrahimbəyovun Tiflis görüşündən sonra Bakıya qayıtmaması ilə bağlı deyilən ittihamlara münasibət bildirib.
Sədr bu barədə Facebook hesabında yazıb:
"İlk gündən Milli Şuranı vuranlar, müxtəlif “arqumentlərlə” onu gözdən salmaq istəyənlər hakimiyyətin Milli Şuraya və onun vahid namizədinə yaratdığı maneələrdən çox ruhlanıblar. Milli Şuranı, onun vahid namizədini Rusiyaya bağlamaq üçün dəridən-qabıqdan çıxanlar iqtidarın Rusiyanın əli ilə Milli Şuraya yaratdığı maneədən çox məmnun görünürlər. Qalib ədası ilə hər kəsə irad tutub, ağıl verirlər.

Rejimin pulu, imkanları çoxdur. Bir çox xarici qüvvələr də (bəzi daxili qüvvələr kimi) öz maraqları üçün rejimə müxtəlif vaxtlarda, müxtəlif üsullarla kömək edirlər. Bu bizim-hakimiyyətlə səmimi mübarizə aparanların suçu deyil. Ruhdan düşmək üçün heç bir əsas yoxdur.

Səhvmi edib ən müxtəlif qüvvələri Milli Şurada birləşdirdik? Səhvmi edib Azərbaycanın bütün dünyada ən çox tanınmış ziyalısını prezidentliyə vahid namizəd irəli sürdük? Yanlış namizəd seçmişdiksə, niyə hökumət 2 aydır ki, gərginlik içindədir? Rüstəm İbrahimbəyovla seçkidə üz-üzə gəlməmək üçün niyə hər cür hiyləyə əl atır?

Rüstəm bəyə qarşı bəhanələr var desəniz, mən də cavab verərəm ki, belə rejimlərdə arzuolunmaz rəqibə qarşı bəhanə həmişə tapılır. Mənim pasport almaq haqqım kimdən azdır? Amma hökumət mənə 8 ildir ki, pasport vermir. Pasport verməməyə bəhanə tapır. AXCP-nin ofis kirayələmək hüququ başqa partiyalardan azdırmı? Amma başqalarına dövlətə aid binalardan ofis verildiyi halda AXCP-yə öz pulu ilə özəl binalarda belə ofis kirayələməyə imkan verilmir. Rüstəm bəyə qarşı da beləcə bəhanələr tapılır. Rüstəm bəy ölkəmizi bütün dünyada tanıdan bir Azərbaycan vətəndaşıdır. Milli Şura onu prezidentliyə vahid namizəd irəli sürdükdən dərhal sonra da Rusiya vətəndaşlığından rəsmi ərizə ilə imtina edib. Niyə onun namizəd olmaq haqqı olmasın? Aydın deyilmi ki, yaradılan maneələr məqsədlidir?

Nəhayət, Milli Şuranın yaranmasının, onun vahid namizədinin irəli sürülməsinin alternativi nə idi? Nədir? Ayrı-ayrı namizədlərlə nəticəsi əvvəlcədən də bəlli olan seçkiyə getmək xalqımıza nə verə bilər? Yeri gəlmişkən, param-parça olub, çoxsaylı namizədlərlə seçkiyə getmək “alternativ” variantı heç vaxt gec deyil.

Milli Şura və onun indiki vahid namizədi qələbə vəd edən variantdır. Bu variant üçün təkid etməliyik. Rüstəm bəy də israrlı olmalıdır. Əvvəlcə Rusiya bürokratiyasından haqqını almağı bacarmalıdır ki, sonra da hamımız birlikdə Azərbaycandakı avtoritar rejimi onun hüquqlarını tanımağa məcbur edək".