Rüstəm İbrahimbəyov: “Təkcə mən yox, başqaları da seçkidə qalib gəlməyə qadirdir, çünki insanların əsas istəyi hazırkı hakimiyyətdən qurtulmaqdır”
Fransanın məşhur “Frans-press” agentliyi Azərbaycanda hazırda cərəyan edən siyasi proseslər, o cümlədən Milli Şuranın sədri və prezidentliyə vahid namizədi Rüstəm İbrahimbəyovdan bəhs edən məqalə hazırlayıb. Musavat.com Azadliq.info-ya istinadən “Azərbaycanlı rejissor prezidentə qalib gəlmək istəyir” başlıqlı məqaləni qısa ixtisarla təqdim edirik:

“Oskar” mükafatı laureatı Rüstəm İbrahimbəyov qarşıdan gələn prezident seçkilərində Ilham Əliyevi devirmək üçün vətənə qayıdaraq, öz təkliflərini irəli sürməlidir. Keçən ay Azərbaycanın əsas müxalif qüvvələrinin geniş koalisiyasının vahid namizədi seçilən Rüstəm Ibrahimbəyov hazırda Rusiya vətəndaşlığıyla bağlı problemini həll etməklə məşğuldur. Bu problem onun seçkidə iştirakını məhdudlaşdıran və ölkədən kənarda saxlayan faktordur.

“Mən demokratik müxalifətdən vahid namizəd olduğuma görə həmkarlarım məsləhət gördülər ki, ümumi işi təhlükə altına qoymamalıyıq. Ona görə də mənə hazırkı vəziyyətdə vətənə dönməməyi tövsiyə etdilər. Mən Moskvadakı işləri bitirdikdən sonra Bakıya dönəcəyəm”, - deyə R.İbrahimbəyov vurğulayıb.

1994-cü ildə “Günəşdən usanmışlar” filminə görə rusiyalı kinorejissor Nikita Mixalkovla birgə “Oskar” mükafatına layiq görülən Ibrahimbəyov Azərbaycanda nüfuzlu mədəniyyət xadimi sayılır. Rüstəm Ibrahimbəyov seçki bülleteninə namizəd kimi adını yazdırmağa nail olsa belə, o, böyük bir təhlükə ilə üzləşəcək. Çünki on illər ərzində Azərbaycanı idarə edən ailə hakimiyyəti digər keçmiş sovet respublikalarında olduğu kimi, fərqli fikirliliyə, ictimai fəallığa kəskin reaksiya verir. Hazırkı dövlət başçısı Ilham Əliyev atası - KQB generalı Heydər Əliyevin 2003-cü ildə vəfatından sonra neftlə zəngin Azərbaycanı idarə edir. Bu ilin iyun ayında Ilham Əliyev rəhbərlik etdiyi Yeni Azərbaycan Partiyasından prezidentliyə vahid namizəd irəli sürülüb. Son seçkilərdə 85 faiz səslə prezident olan Ilham Əliyev neft milyardlarına arxalanaraq, iqtisadiyyatda bir sıra inkişaf meyllərinə nail olsa da, insan hüquq və azadlıqlarına görə həmişə tənqid olunub.

İbrahimbəyov dövlət başçısı postunda yalnız iki il qalacağı, Azərbaycanı parlament respublikasına çevirmək üçün bu müddətdə islahatlar həyata keçirəcəyinə dair öhdəlik götürüb.

“Azərbaycanda dəyişikliklər üçün vəziyyət yetişib. Son 5-6 ildə Azərbaycanda korrupsiya ilə bağlı dözülməz durum yaranıb, insan haqları kobud şəkildə pozulur. Əminəm ki, təkcə mən yox, digərləri də qarşıdan gələn prezident seçkilərində qalib gəlməyə qadirdir. Əsas olan insanların hazırda hakimiyyətdə olan şəxslərdən qurtulmaq istəyidir”, - deyə Ibrahimbəyov bildirib.

Hakimiyyət düşərgəsində seçkilərlə bağlı əminliyin olmasına baxmayaraq, iqtidar hər şeyi seçkilərə bağlamaq niyyətində deyil. Güc strukturları ictimai etirazları dağıdır, onlarla müxalifətçi fəal həbsxanaya salınıb. Hüquq müdafiəçiləri bəyan edirlər ki, hakimiyyət bununla seçki öncəsi vətəndaş cəmiyyətinin fəallığının artmasının qarşısını almağa çalışır.

Bu ilin yanvar ayında hüquq-mühafizə orqanları Rüstəm İbrahimbəyovun rəhbərlik etdiyi Azərbaycan Kinematoqrafçılar Ittifaqı ilə bağlı araşdırmalar başlanıb. Yerli KIV-lərdə son zamanlar yayılan məlumatlar da bu istiqamətdə araşdırmaların aparıldığını göstərsə də, rəsmi strukturlar bunu etiraf etmir.

Los-Ancelesdə də evi olan İbrahimbəyov son bir neçə ay ərzində Qərb ölkələrinin paytaxtlarında bir sıra mühüm görüşlər keçirib.

Bununla belə, Ibrahimbəyovun Rusiya vətəndaşlığı ilə bağlı probleminin həlli seçkiyə ciddi təsir göstərə bilər.

“Rusiyanın yaranmış situasiyada necə oynayacağını söyləmək çətindir. Onlar Əliyevə kömək etmək, bu yolda maksimum siyasi kapital götürmək üçün hər şeyi edirlər. Hər bir halda, bu şübhəsiz o situasiyadır ki, Kreml baş verənlərdən mənundur”, - deyə Ibrahimbəyov vurğulayıb.

Keçmiş sovet, amma müsəlman ölkəsi olan Azərbaycanın Avropaya qaz satışı üzrə böyük idxalçıya çevrilmək istəyinə görə Bakı ilə Moskva arasında münasibətlər korlanmışdı.

Amma bu ərəfədə iki dövlət silah satışına dair iri müqaviləyə imza atıb və Putinin dövlət başçısı postuna qayıtmasından sonra Əliyevlə görüşünün keçirilməsi nəzərdən keçirilir (məqalə Putinin Bakı səfərindən öncə yazılıb-red).

“Səhranın bəyaz günəşi” adlı daha bir məşhur filmin həmmüəllifi olan Ibrahimbəyov seçkidə iştirak edib, qələbə qazanmaq əzmindədir: “Mən bu missiyanı sona çatdırmalıyam və bunu edəcəyəm”.