İsa Qəmbər: “Mən də hesab edirdim ki, bu, seçki gündəminə o qədər uyğun bir mövzu deyil”
Avropa Parlamentində təşkil olunmuş “Azərbaycanda prezident seçkiləri: Odlar yurdu üçün hansı gələcək?” adlı seminarda Azərbaycana qarşı planlaşdırılmış təxribat olub. APA-nın məlumatına görə, bunu seminarda iştirak etmiş azərbaycanlı deputatlar Fuad Muradov, Çingiz Əsədullayev və Asim Mollazadə oktyabrın 7-də Milli Məclisdə keçirdikləri mətbuat konfransında bildiriblər. Qeyd olunub ki, oktyabrın 3-də Belçikanın paytaxtı Brüsseldə keçirilən “Azərbaycanda prezident seçkiləri: Odlar yurdu üçün hansı gələcək?” adlı seminarda tədbirin mövzusuna zidd olaraq mövzu etnik separatizm, ora dəvət olunan bəzi separatçı təşkilatların Azərbaycanda etnik ayrı-seçkiliklə bağlı mövzuları olub: “Guya Azərbaycanda etnik ayrı-seçkilik baş alıb gedir, milli azlıqların hüquqları pozulur və s. Burada məqsəd Azərbaycanı Avropaya inteqrasiya yolundan separatizm vasitəsilə döndərməkdir. Bunun təxribat olduğunu bildirdik. Təbii ki, biz seminarın adına uyğun olmayan bu müzakirələrin keçirilməsinə etiraz etdik və Azərbaycana qarşı bu iddiaların əsassız olduğunu bildirdik”.

A. Mollazadə bildirib ki, hətta orada bir nəfər qalxıb üzr istəyərək deyib: “Talışların lideri Əlikram Hümmətov İrəvanda olduğu üçün özü burada iştirak etmir, mən onu təmsil edirəm”.

Azərbaycanlı deputatlar bildiriblər ki, seminarda səsləndirilən bu fikirlərə kəskin etirazlarını bildiriblər. Qeyd ediblər ki, Azərbaycan demokratik, dünyəvi ölkədir və bu gün dünyada tolerantlıq nümunəsi kimi tanınır: “Ölkəmizdə yaşayan milli azlıqlar, dinlər bərabər hüquqa malikdirlər. Bunun üçün kifayət qədər hüquqi baza mövcuddur”.

Deputatlar dünya azərbaycanlılarına da çağırış ediblər ki, Avropada baş verən bu cür hadisələrə qarşı həssas olsunlar.

Sözügedən tədbirdə Müsavat Partiyasının başqanı İsa Qəmbər də iştirak və çıxış edib. Azərbaycanlı deputatların dediyi kimi-Azərbaycana qarşı təxribat olub-olmadığını dəqiqləşdirmək üçün İsa Qəmbərlə danışdıq. İsa Qəmbər bildirdi ki, Brüsseldəki tədbir iki hissədən ibarət olub: “Birinci hissəni bizim müttəfiqlərimiz təşkil etmişdilər. Avropa Parlamentində deputat olan cənab Gerben Jan Gerbrandy o hissəyə rəhbərlik edirdi. Cənab Gerbrandy həm də bilirsiniz ki, Avronest Parlament Assambleyasının vitse-prezidentidir və onun rəhbərlik etdiyi hissədə Azərbaycanda seçkiqabağı vəziyyət müzakirə olundu. Mən həmin hissədə məruzəçi olmuşam, fikirlərimi bildirmişəm və suallara da cavab vermişəm. Amma Avropada müxtəlif qüvvələr var və müəyyən qüvvələr həmin tədbirlə yanaşı tədbirin ikinci hissəsi kimi “Azərbaycan-Avropa İttifaqı münasibətlərinin gələcəyi” mövzusunu gündəliyə salmışdılar və Azərbaycanda milli azlıqlar mövzusunu gündəmə gətirmişdilər. Mən də hesab edirdim ki, bu, seçki gündəminə o qədər uyğun bir mövzu deyil. Bu barədə fikrimi təşkilatçılara da bildirmişdim. Həmin hissəni Təmsil Olunmayan Xalqlar İttifaqı var, onun prezidenti aparırdı. Əgər hətta belə bir mövzunun müzakirəsinə ehtiyac duymuşdularsa, Azərbaycanda yaşayan milli azlıqların nümayəndələrini dəvət edə bilərdilər. Amma ora məruzəçi kimi Rusiya vətəndaşı, Moskvada fəaliyyət göstərən şəxslər dəvət olunmuşdular. Onların da çıxışlarında kifayət qədər həqiqətə uyğun olmayan tezislər var idi. Ümumiyyətlə Rusiyanın özündə o qədər problemlər ola-ola onların gəlib Azərbaycandakı problemlərlə bağlı danışması yersiz görünürdü. Həmin o ikinci hissədəki yersiz söhbətlərə qarşı seminar iştirakçılarından bir çoxları etiraz etdilər. Hətta mən hesab edirəm ki, Azərbaycandan gələn rəsmi nümayəndə heyətindən, deputatlardan daha çox sıravi seminar iştirakçıları prinsipial etirazlarını bildirdilər. Həmin hissədə Moskvadan gələn dediyim şəxslərlə yanaşı, deputatlardan biri də məruzəçilərdən idi. O istəsəydi suallara cavab hissəsində bu məsələlərə münasibət bildirə bilərdi”.

Müsavat başqanı vurğuladı ki, bütövlükdə tədbir Azərbaycanda demokratiya, insan haqları ilə bağlı məsələlərə həsr olunmuşdu: “Tədbir barədə yayılan press-relizdə, bizim orada keçirdiyimiz görüşlərdə-məsələn, Avropa Liberal Demokrat Partiyaları İttifaqının prezidenti cənab Qrem Vatsonla mənim görüşüm oldu, həmin görüş həm press-reliz şəkilndə yayıldı, həm ALDE-nin qəzetində yayılacaq. Bütün bu sənədlərdə, məlumatlarda Azərbaycanda seçki mövzuları haqqında ətraflı qeydlər edildi. Məhz Avropa Parlamentində bizim seminar keçirilən gün -3 oktyabrda Avropa İttifaqının Ketrin Eşton, Ştefan Fule kimi rəhbərlərinin Azərbaycanda seçkiqabağı vəziyyətlə bağlı birgə bəyanatla çıxış etmələri də diqqətəlayiqdir. Bütün bunlar Avropa İttifaqının Azərbaycandakı seçkilərlə bağlı tənqidi yanaşmasının əlaməti kimi qiymətləndirilə bilər”.