Eldar Namazov hərəkatı partiyaya çevirib keçmiş naziri sədr etmək istəyir
Son zamanlar Eldar Namazovun əsasını qoyduğu “El” Hərəkatının eyni adda partiyaya çevriləcəyi haqda xəbərlər yayılıb. Namazovun özü də mətbuata açıqlamasında bunu təkzib etməyib və belə bir niyyətdə olduqlarını söyləyib. O, yaxın gələcəkdə bu istiqamətdə addımlar atılacağını da vurğulayıb.

Qeyd edək ki, “El” Partiyası adda siyasi təsisat yaratmaq ideyası sabiq təhsil naziri Firudin Cəlilova məxsus olub. O, bir neçə il əvvəl mətbuata açıqlamasında belə partiya yaratmaq niyyətində olduğunu elan etmişdi. Amma maliyyə tapmaması səbəbindən partiyanı yaratmadı.

Müxbirimiz isə bu mövzuda maraqlı bir məlumat əldə edib. Məlum olub ki, “El” Hərəkatlını siyasi partiyaya çevirməkdə əsas məqsəd heç də Namazovun sədr postunu tutaraq siyasi iddia ilə çıxış etməsi ilə bağlı deyil. Əslində burada məqsəd başqadır. Bütün bu hazırlıqlar isə hazırda korrupsiya və işində yol verdiyi nöqsanlara görə, habelə dövlət çevrilişinə cəhd ittihamı ilə həbs olunan keçmiş səhiyyə naziri Əli İnsanovla bağlıdır. İnsanov 2005-ci ilin noyabrında, Milli Məclis seçkilərindən dərhal sonra həbs edilib. Həbsdə olduğu müddətdə müxalifətə keçib və illərlə əleyhinə bəyanat verdiyi şəxslərin yanında olduğunu elan edib. Son zamanlar isə Avropa İnsan Hüquqları Məhkəməsi Əli İnsanovla bağlı qərar qəbul edib. Məhkəmə Azərbaycana tövsiyə edib ki, onun işinə yenidən baxılsın. Məhz bu məsələni əsas götürən “El” Hərəkatının rəhbərliyi dərhal toplaşaraq qurumun siyasi partiyaya çevrilməsi və gələcəkdə Əli İnsanovun bu partiyanın rəhbərliyinə gətirilməsi haqda müzakirələr aparıblar. Sonda ümumi rəy belə olub ki, hərəkat partiyaya çevrilsin. Yaxın üç ay müddətində Azərbaycan Ali Məhkəməsi Əli İnsanovun işinə baxmalıdır. Əgər məhkəmə İnsanovun azadlığa buraxılması haqda qərar versə, bu zaman keçmiş nazirin siyasətə gələ biləcəyini qeyd etmək olar. Yox, əgər İnsanov ona verilən cəzanın çəkilməmiş daha 3 ilini həbsdə oturmalı olsa, bu zaman “El” Hərəkatının siyasi niyyəti iflasa uğraya bilər. Ancaq görünən budur ki, indilikdə bir qrup şəxs İnsanovu siyasətə çəkmək üçün əlindən gələni edir. Məhz onların səyi nəticəsində İnsanov seçkilərdə Cəmil Həsənlini müdafiə etdi. Ancaq ehtimallara görə, qəfildən hər şey dəyişə və İnsanov bütün bu işlərdən imtina edə bilər. Bu məsələ ilə məşğul olan şəxslərdən biri isə deyib ki, İnsanov yalnız özünün düşündüyü planlarda yer ala bilər. Onun başqa birisinin, xüsusilə Namazovun ortaya atdığı ssenaridə rol alması mümkün deyil. Çünki ortada Rüstəm İbrahimbəyov reallığı var