Prezident Administrasiyasının rəsmisi “Azadlıq” radiosunun müxbirinə: “Deyəsən, pornoqrafik görüntülərinin çəkilməsi ürəyincədir...”

Bu gün ATƏT-in Tiflisdə işə başlayan Cənubi Qafqaz media konfransında Azərbaycandan olan iştirakçılar arasında ciddi mübahisə baş verib.

Virtualaz.org saytı konfransı izləyən erməni və gürcü KİV-lərinin məlumatlarına istinadən verdiyi xəbərə görə, Azərbaycan nümayəndə heyətinin üzvü - Prezident Administrasiyasının ictimai-siyasi şöbəsinin sektor müdiri Vüqar Əliyev çıxışında ölkədə söz və mətbuat azadlığının dəstəklənməsi yönündə dövlətin gördüyü işlər haqda danışıb (PA rəsmisinin çıxışından xəbəri APA yayıb).

Vüqar Əliyev “Medianın azadlığı üzrə ATƏT-in öhdəliklərinin dərk edilməsi” mövzusunda X Cənubi Qafqaz media konfransında bildirib ki, Azərbaycan son 10 il ərzində ATƏT-in söz və mətbuat azadlığı ilə bağlı keçirilən konfransında mütəmadi olaraq iştirak edərək ölkədə KİV-in vəziyyəti, söz və mətbuat azadlığı barədə həqiqətləri tədbir iştirakçılarına çatdırır: “Müstəqillik dövründə, ümumiyyətlə, son 10 il müddətində Azərbaycan KİV-in, söz və ifadə azadlığının inkişafı yolunda böyük inkişaf yolu keçib. Azərbaycan faktiki olaraq 1998-ci ildə senzuranı ləğv etdi və 2000-ci ildə mətbuat və informasiya nazirliyinin ləğvi ilə KİV-in üzərində dövlət nəzarəti funksiyasından imtina etdi”.



V.Əliyev Azərbaycanda jurnalistlərin sosial şəraitinin yaxşılaşdırılması üçün addımlar atıldığını da diqqətə çatdırıb: “Azərbaycanda jurnalistlərin sosial vəziyyətinin yaxşılaşdırılması üçün bir çox tədbirlər də həyata keçirilib. Bu il 156 jurnalist evlə təmin olunub və 240 jurnalist üçün tikiləcək yeni binanın təməli qoyulub. Azərbaycanda jurnalistlərin təhlükəsizliyinin təmin olunması və onların fəaliyyəti üçün zəruri şəraitin yaradılması işləri davam etdirilir. Azərbaycanda media sahəsində mövcud vəziyyət alqışlanmalıdır. Azərbaycanın ATƏT-lə əməkdaşlıq çərçivəsində yerinə yetirdiyi öhdəliklərlə bağlı hər hansı qüsur və mənfi hal müşahidə olunmur. Biz bəzi QHT və digər dairələrin mövqeyini əsla qəbul etmirik. Hesab edirik ki, Azərbaycan müstəqil dövlətdir və onun daxili və xarici siyasəti var. Bu siyasət çərçivəsində işlərimizi uğurla davam etdirəcəyik”.

Ermənistanın news.am agentliyi isə xəbər verir ki, V.Əliyevdən sonra “Turan” agentliyinin direktoru Mehman Əliyev çıxış edib. O, jurnalistlərə və mətbuata qarşı təzyiqlərdən danışıb. Bundan sonra zaldan məruzəçilərə suallar ünvanlanıb.

RATİ rəhbəri Emin Hüseynov Azərbaycan hakimiyyətinin peyk kanallarının siqnallarını, o cümlədən “Azadlıq” radiosunun televiziya variantının yayımını əngəlləmək cəhdləri haqda sual verib. “Azadlıq” radiosunun əməkdaşı Xədicə İsmayılova isə hakimiyyət nümayəndəsinin media sahəsində situasiyanı “əxlaqsız şəkildə” təqdim etdiyini deyib.

Bu zaman mübahisə yaranıb. X.İsmayılova pornoqrafik görüntülərinin internetdə yayılması məsələsindən danışıb. V.Əliyev isə bildirib ki, onda yaranan təəssürata görə, X.İsmayılova pornoqrafik görüntülərinin çəkilməsi ilə fəxr edir.

Mübahisə uzandığı üçün erməni iştirakçılar Azərbaycandan olan məruzəçilərə sual verə bilməyiblər. Konfrans işini sabah davam etdirəcək.