Əli Kərimli Azərbaycanı Ermənistanın səhvindən yararlanmağa çağırdı

AXCP sədri Əli Kərimli Facebook səhifəsində Qarabağ problemindən yazıb.

Virtualaz.org bildirir ki, partiya lideri Qarabağ probleminin həlli üçün yeni imkanlar yarandığını qeyd edib: “Yeni imkanları Ermənistanın səhvi yaradıb. Bu səhvdən dərhal istifadə etmək lazımdır. Moskvanın təzyiqi ilə Ermənistan, nəhayət, seçim etdi. Rusiyanın liderlik etdiyi Gömrük İttifaqına qoşulacağını bəyan etdi və ilk dəfə Qərbdən sərt reaksiya ilə üzləşdi. Avropa Birliyi açıq şəkildə bildirdi ki, Ermənistan Gömrük İttifaqına qoşulduğu üçün artıq assosiasiya sazişi imzalaya bilməz. Başqa sözlə, daha eyni vaxtda iki stulda oturmaq mümkün olmayacaq.

Bu günlərdə isə Avropa Parlamenti Azərbaycanın ərazi bütövlüyünə və BMT Təhlükəsizlik Şurasının Qarabağla bağlı qətnamələrinə növbəti dəfə öz dəstəyini ifadə etdi. Daha əvvəl NATO sammiti Azərbaycanın ərazi bütövlüyünə dəstək ifadə etmişdi. Günümüzün reallığı isə ondan ibarətdir ki, ərazi münaqişələrində (regional güclərin də marağı nəzərə alınmaqla) son sözü ABŞ və Avropa Birliyi deyir. Sübut üçün Kosovo və digər münaqişələrin taleyini yada salmaq kifayətdir.

Üstəlik, Azərbaycanın İslam Əməkdaşlıq Təşkilatından da tam dəstəyi var. Beləliklə, Azərbaycan Avropa Birliyinə inteqrasiya xətti seçməklə, Rusiya və onun peykləri istisna olmaqla, öz ərazi bütövlüyünə bütün dünyanın dəstəyini təmin edə bilər. Bu isə Ermənistanın təcridinə və bir gün bu reallıqla barışmasına gətirib çıxarar.

Amma bütün bunların baş verməsi üçün Qarabağın taleyi gərək Azərbaycan hökuməti üçün də önəmli olsun. Avropaya inteqrasiya üçün Azərbaycandan çox şey tələb olunmur”.

Ə. Kərimlinin fikrincə, bunun üçün Azərbaycan ATƏT və Avropa Birliyinin demokratikləşmə paketini qəbul etməlidir ki, ölkəmizin Avropaya, Qarabağın da Azərbaycana yolu açılsın.