Elxan Şahinoğlu: “Putinin siyasəti onun sözlərində deyil, əməlindədir”
“Rusiya prezidenti mesaj verdi ki, Ermənistan onun quberniyasıdır və bu quberniyanı özü istədiyi kimi idarə edəcək...”
Rusiya prezidenti Vladimir Putinin Ermənistana səfəri başa çatdı. Ermənistanda bir sıra görüşlər keçirən Kreml rəhbəri 102-ci rus hərbi bazasına baş çəkdi və burada bir sıra mühüm mesajlar verdi. Məsələn, Putin bildirdi ki, Rusiya Qafqazdan getməyə hazırlaşmır, əksinə, bu regionda daha da möhkəmlənməyə hazırlaşır.

Bundan başqa, Rusiya prezidenti Qarabağ münaqişəsi haqda danışarkən erməni jurnalistin münaqişə ilə bağlı “militarist təcavüz” sözünü işlətməsinə belə cavab verdi: “Bu sözü belə tez-tez və ucadan təkrarlamaq regionda sülhün nizamlanmasına mənfi təsir göstərəcək. Biz Rusiya ilə həmsərhəd olan və sıx əlaqələrə malik olan bir ərazidə nə Ermənistan vətəndaşının, nə də Azərbaycan vətəndaşının qanının axmasını istəmərik”.
“Atlas” Araşdırmalar Mərkəzinin rəhbəri, analitik Elxan Şahinoğlunun fikrincə, Putin hər iki Cənubi Qafqaz respublikası ilə siyasi manevr edir. Analitikin fikrincə, Rusiya prezidenti İrəvanı əlindən buraxmamağa çalışır: “Putinin siyasəti sərt olduğu qədər hiyləgərdir. Rusiya Ermənistanın müttəfiqi olsa da, Kreml sahibi növbəti dəfə prezident seçildikdən sonra İrəvana deyil, Bakıya səfər etdi. Putinin Bakıya avqust ayındakı səfəri daha çox Azərbaycanda prezident seçkisi ilə bağlı idi ki, Kreml sahibi dolayısıyla İlham Əliyevə dəstəyini ifadə edirdi. Ancaq Bakı səfərinin bir başqa mənası da var idi. Həmin günlər İrəvan Brüssellə intensiv danışıqlar aparırdı, Ermənistan hakimiyyəti Avropa Birliyi ilə assosiativ anlaşmanı müzakirə edirdi. Putin Bakıya səfər etməklə İrəvana mesaj yolladı ki, Ermənistan prezidenti Avropa Birliyinin layihəsində iştirak etsə, Kreml Azərbaycanla əməkdaşlığa da üstünlük verə bilər. Bu mesajı həm də belə oxumaq lazım idi ki, Moskva Qarabağ məsələsində İrəvana dəstəyindən vaz keçə bilər. Ermənistan prezidenti Serj Sərkisyan Putinin Bakı səfərindən qorxdu, Dağlıq Qarabağı itirə biləcəyindən ehtiyat etdi və ona görə də az sonra Kreml sahibinin hüzuruna gedərək onun Gömrük İttifaqına üzvlük istəyini yerinə yetirdi”.

E.Şahinoğluna görə, hazırda vəziyyət fərqlidir və Putin İrəvana səfər edərək, bu dəfə Bakıya dolayı mesajlar göndərir, bununla da Bakını təzyiq altında saxlamağa çalışır: “Birinci mesaj ondan ibarətdir ki, Putin Ermənistandakı hərbi bazalarını gücləndirməkdə davam edəcək. Belə baxanda oradakı hərbi bazalar ya Azərbaycana, ya da Türkiyəyə qarşıdır. Putin sözdə həm Ankara, həm də Bakı ilə strateji tərəfdaşlığa malik olduğunu deyir. Belə olan halda Moskvanın Ermənistandakı hərbi bazalarını modernləşdirmək kimə və nəyə lazımdır? Aydındır ki, Ermənistandakı bazalar həm Azərbaycanı, həm də Türkiyəni və eləcə də Ermənistan hakimiyyətinin özünü şantaj etmək məqsədi daşıyır. Putin hamıya mesaj yollayır ki, Ermənistan faktiki Rusiyanın quberniyasıdır və quberniyanı da özü istədiyi kimi idarə edəcək”.

Ekspert deyir ki, Putin İrəvandakı mətbuat konfransında erməni jurnalistin “Azərbaycan hərbi əməliyyatla başlayarsa, Rusiyanın reaksiyası necə olacaq” sualına ilk baxışdan korrekt - diplomatik cavab verib: “Putin rusiyalı generallar kimi birbaşa deməyib ki, Azərbaycan müharibəyə başlasa Rusiya Ermənistanı müdafiə edəcək. Sadəcə, söyləyib ki, Rusiya sərhədində sabitliyin tərəfdarıdır və Dağlıq Qarabağda bundan sonra heç vaxt heç kimin - həm azərbaycanlıların, həm də ermənilərin qanının tökülməsini istəmir. Ancaq bu sözlər heç nə ifadə etmir. Putinin siyasəti onun sözlərində deyil, əməlindədir. Əməl isə bundan ibarətdir ki, Kreml sahibi Ermənistanın Azərbaycan qarşısında zəifləməsini istəmir. Ona görə də elə bu səfər zamanı Putin Ermənistana ucuz qiymətə silah və qaz satmaq barədə qərarını elan edib. O ki qaldı mümkün hərbi əməliyyatların başlamasına, hadisələrin bu istiqamətdə inkişafı halında Rusiyanın nəinki Ermənistana, hətta Qarabağ separatçılarına əməli dəstək verəcəyinə şübhəm yoxdur. Bu tarixi biz bir neçə dəfə yaşamışıq”.