Ermənistan Tükiyə ilə münasibətləri normallaşdırmaq üçün planı 10 gün əvvəl Əhməd Davudoğluna çatdırıb

Türkiyə xarici işlər nazirinin İrəvana səfərinə az qalmış Ermənistan XİN-in iki ölkə arasında münasibətləri normallaşdırmaq üçün rəsmi Ankafaya “yol xəritəsi” təqdim etdiyi açıqlanıb.

Ermənistanın iqtidaryönlü “Aravot” qəzeti XİN-dəki mənbəyə istinadən yazır ki, bu təklif 10 gün əvvəl diplomatik kanallarla Tükiyənin xarici işlər naziri Əhməd Davudoğluna çatdırılıb.

Ə.Davudoğlu dekabrın 12-də Qara Dəniz İqtisadi Əməkdaşlıq Təşkilatının xarici işlər nazirlərinin toplantısına qatılmaq üçün İrəvana səfər edəcək. Səfər zamanı Türkiyə ilə Ermənistan arasında münasibətlərin normallaşması məsələsi də müzakirə olunacaq. Ə.Davudoğlu bu məqsədlə prezident Serj Sərkisyan və xarici işlər naziri Edvard Nalbəndyanla ayrıca görüşlər planlaşdırır.

Ə.Davudoğlu səfər ərəfəsində Türkiyə KİV-lərinə bildirib ki, rəsmi Ankara Ermənistanla münasibətlərin normallaşması və sərhədlərin açılması üçün İrəvana təkliflərini çatdıracaq. Bu təkliflərə əsasən Ermənistan Dağlıq Qarabağ ətrafında işğal edilmiş 7 rayondan ikisini boşaltmağa razılıq versə, Türkiyə sərhədləri açacaq.



Lakin Ermənistan tərəfinin təqdim etdiyi “yol xəritəsi” Türkiyənin təkliflərinə diametral şəkildə ziddir. Mənbənin bildirdiyinə görə, “yol xəritəsi”ində 3 konkret bənd yer alır:

1. Türkiyə “erməni soyqırımı”nı rəsmən tanıyır, öz məsuliyyətini boynuna alır və erməni diasporu qarşısında üzr istəyir;

2. Ermənistanla sərhədləri dərhal açır və diplomatik münasibətlər qurur;

3. Yalnız bundan sonra Türkiyə Dağlıq Qarabağ münaqişəsinin nizamlanması məsələsində sülh səyləri ilə çıxış edə, hərbi ritorikanın azaldılması, təmas xəttində insidentlərin qarşısının alınması, snayperlərin geri çəkilməsi və xalqların sülhə hazırlanması məsələsində ictimai proqramların reallaşdırılması hüququ qazanır.

Gözlənilir ki, Davudoğlunun İrəvana səfəri zamanı onun bu təkliflə bağlı Ankaranın cavabını erməni həmkarı Edvard Nalbəndyana təqdim etməyə imkanı olacaq.

Əgər qəzetin yazdıqlarına inansaq, erməni tərəfinin Ankaraya təqdim etdiyi “yol xəritəsi”nin Türkiyə üçün nə dərəcədə alçaldıcı olduğuna şübhə yoxdur.

Bu təkliflərdən də göründüyü kimi, Ermənistanın Türkiyə ilə münasibətəri normallaşdırmaq üçün 2009-cu ildən bəri mövqeyində dəyişiklik olmayıb. İndi guya erməni tərəfi iki təslimçi şərtin yerinə yetirilməsindən sonra Türkiyənin Qarabağ prosesində əhəmiyyətsiz rol almasına imkan yaratmağa hazırdır.



Əgər belədirsə, Türkiyə diplomatiyasının “biz regionda sülh yaratmaq üçün hərəkətə keçirik” kimi pafoslu bəyanatlarının səbəbini anlamaq olmur. Hansı sülh yaratma səylərindən söhbət gedə bilər ki, Ermənistan Türkiyənin münasibətləri normallaşdırmaq üçün Qarabağ məsələsinə bu və ya digər formada istinad etməsini yaxına belə buraxmır?! Hansı ki, neçə gündür Türkiyə iqtidarına bağlı media durmadan “Davudoğlu İrəvana 2 rayon təklifi ilə gedir” məzmununda xəbərlər yaymaqdadır.

Belə görünür ki, Türkiyə hökuməti Davudoğlunun İrəvana Ermənistanın indiki mövqeyi baxımından heç də yerinə düşməyən səfəri ilə bağlı Azərbaycan ictimaiyyətini sakitləşdirmək üçün bu cür informasiya-təbliğat kampaniyası aparır. Məqsəd Azərbaycan ictimaiyyətini inandırmağa çalışmaqdır ki, Davudoğlu İrəvanda Qarabağ şərtini kənara qoyub hansısa sövdələşməyə getməyəcək.

2009-cu ildə də Türkiyə hökuməti Azərbaycanı bu cür inandırmağa çalışırdı, ancaq sonda gizli sövdələşmə açıldı. Ona görə də Azərbaycan Türkiyə iqtidarının rəsmi mövqeyini qəbul etməklə bərabər ehtiyatını da əldən verməməlidir.