Novella Cəfəroğlu: “Bizim siyahıda 42 siyasi məhbus var”
Ötən həftə prezident İlham Əliyev Brüsseldə keçirdiyi mətbuat konfransında Azərbaycanda siyasi məhbus olmadığını bildirib. Ölkə başçısının sözlərinə görə, ötən ilin yanvar ayında AŞ PA-da bu məsələ ilə bağlı geniş müzakirələr keçirilib və Azərbaycanda siyasi məhbusların mövcudluğu fikrinin tərəfdarlarının təqdim etdiyi qətnamə iflasa uğrayıb:
“Assambleyada böyük əksəriyyət bu kampaniyaya qoşulmayıb. Bu o deməkdir ki, mənim əvvəllər dediyim kimi, Azərbaycanda siyasi məhbus yoxdur və bu, Avropanın, dünyanın mühüm institutlarından biri tərəfindən təsdiqlənib”. Prezident Azərbaycanın 10 ildən artıqdır Avropa Şurasının, eləcə də Avropa İnsan Haqları Məhkəməsinin üzvü olduğunu xatırladaraq bildirib ki, kiminləsə ədalətsiz davranıblarsa, Avropa Məhkəməsinə müraciət edə bilər. Həmçinin İlham Əliyev “siyasi məhbus” anlayışının dəqiq tərifinin olmadığını vurğulayıb: “Əgər rəsmi təyinat olarsa, məsələn, AŞ PA bunu qəbul edərsə, o zaman kimin siyasi məhbus olub-olmadığını müəyyənləşdirmək asan olacaq”. Mövzu ilə bağlı söhbətləşdiyimiz hüquq müdafiəçisi Novella Cəfəroğlu İlham Əliyevin bu çıxışını normal qarşıladığını dedi: “Prezident deməlidir ki, siyasi məhbus yoxdur. Bütün ölkələrin prezidentləri bu sözü deyir. Amma bu o demək deyil ki, Azərbaycanda siyasi məhbus yoxdur. Bunu hamı bilir ki, Azərbaycanda siyasi məhbus var”.

N. Cəfəroğlu bildirdi ki, Azərbaycanda 42 siyasi məhbus var: “Bizim siyahıda 42 siyasi məhbus var. Onların içində bəziləri var ki, məhkəmə prosesləri hələ davam edir. Amma biz onları siyasi məhbus kimi tanıyırıq. Bunu hamı bilir ki, Azərbaycanda siyasi məhbus var. Sözsüz ki, biz bu siyahını Avropa Şurasına göndərmişik və onlar da Azərbaycanda siyasi məhbusların olduğundan xəbərdardırlar. Məlumdur ki, 2014-cü il Avropa Şurasında Azərbaycan üçün önəmli il olacaq. Çünki bu il Azərbaycan Avropa Şurası Nazirlər Komitəsinə sədrlik edəcək. İlham Əliyevin aprel-may ayında AŞ PA-da çıxışı olacaq. O vaxta qədər bütün siyasi məhbuslar azad edilməlidir. Azərbaycan üçün ən gözəl məqamdır ki, bu çıxışda ancaq Qarabağ məsələsindən danışılsın. Bizim 500 mindən çox yurd-yuvalarından didərgin düşmüş hüquqları pozulan insanlarımız var. Bu çıxışda ancaq Qarabağ haqqında danışmaq, bizə üstünlük qazanmaq üçün böyük şansdır. Prezidentə də məktubumuzda yazıb xahiş etmişik ki, bizim AŞ PA-da sədrliyimizdən qabaq bütün siyasi məhbusları azad etsin”.

Hüquq müdafiəçisi Azərbaycanda məhkəmə sisteminin çox bərbad olduğunu dedi: “Bizdə ümumiyyətlə məhkəmələr işləmir. Siyasi məhbuslardan başqa bizə minlərlə məktublar gəlir ki, məhkəmələr onların hüquqlarını pozublar. Bu da böyük bir qəbahətdir. Bu iddialar da Avropa Şurasına gedir. Minlərlə insanın Avropa Şurasında ərizəsi var. Azərbaycanda ilk növbədə məhkəmə sistemi düzəlməlidir. Məhkəmələr heç kəsdən asılı olmamalıdır. Məhkəmələrdəki korrupsiya halları aradan qaldırılmalıdır. Elə məhkəmə qərarları var ki, Avropa Məhkəməsinə gedib çıxanda bütün dünya bizə güləcək. Bu səbəbdən də Azərbaycan hökuməti ilk növbədə məhkəmə sisteminə diqqətlə yanaşmalıdır”.