Azərbaycanda unudulan bir çox futbolçular olub. Onlardan biri karyerasının böyük hissəsini Latviya klublarında keçirən Vüqar Əsgərovdur. Təcrübəli futbolçu ilə karyerasını bitirməsi, sonra yenidən bərpa etməsi, Azərbaycan millisinin hazırkı vəziyyəti ilə bağlı mövzulardan söhbət etdik.

-Karyeranızı bitirdiz, amma il yarım sonra yenidən bərpa etdiz. Bu necə baş verdi?

-Bəli, il yarım idi peşəkar karyeramı başa vurmuşdum. Amma həvəskar kimi futbol oynamağa davam etdim. Bir müddət aşağı liqa klubu “Salaspisk”in heyətində oynayaraq 15 qolla bombardir oldum. Müəyyən qədər futzalda da özümü sınadım. İş elə gətirdi ki, vaxtilə birlikdə futbol oynadığım dostlarım Latviya virsliqasında çıxış edən “Super Nova” klubunun məşqçilər korpusunda yer aldılar. Məhz onlar məni yenidən karyeramı bərpa edib təcrübəli futbolçu kimi komanlarında görmək istədiklərini israrla bildirdilər. Təklifi müsbət qiymətləndirərək yanvarda bir illik müqavilə bağladım. 

-9 turdan sonra “Super Nova”  üç xalla 10 komanda arasında 9-cu yerdə qərarlaşıb. Autsayder sırasında olmanız nə ilə bağlıdır?

-Komandamız cavanlardan təşkil olunub. Heyətdəkilərin mütləq əksəriyyəti 2001-03-cü il təvəllüdlü gənclərdir. Çoxları peşəkar karyeralarının ilk ilinə yaşayır. İnanıram ki, onlar təcrübə topladıqca komandamız daha da irəliləyəcək. Hələ qarşıda çox oyunlarımız var. Qarşımıza qoyulan əsas məqsəd elitada qalmaqdır.

-Hazırda “Super Nova” komandasının həm ən yaşlı oyuçusu, həm də kapitanısan. 36 yaşında top qovmaq çətinlik yaratmır?

-Əslində mayın 14-də 37 yaşımı qeyd edəcəm. Səmimi deyim, bu yaşda oynayarkən həm tez yorulur, həm də yorğunluğumu tez bərpa edirəm (gülür).

-37 yaşında futbol oynamaq əlavə motivasiya verir?

-Hələki motivasiya görmürəm. Qol imkanlarım olur, amma son nöqtəni qoya bilmirəm. Sonra qaçırdığım fürsətlər barədə düşünür və gülürəm.

-Bəs assistentlik necə?

-Hərdən olur (gülür).

-Latviya Virsliqasının da ən yaşlı futbolçususuz?

-Ən yaşlılar siyahısındayam. Bu baxımdan 39 yaşlı Valeri Afanasyev birinci, mən ikinci,  35 yaşlı Oleq Layzans üçüncüdür.

-Hazırda dünyanın ən qocaman futbolçusu 55 yaşlı yapon Kadzuyoşi Miuradır. Vüqar Əsgərov samuray qədər oynamağı düşünürsüz?

-Belə bir iddiam yoxdur, əks halda yerimdən qalxa bilməyəcəm (gülür).

-Neçə yaşına kimi oynamağı düşünürsüz?

-Dəqiq bilmirəm. Düşünürəm ki, gücüm tükənsə bu mövsüm karyeramda sonuncu olacaq.

-Hazırda Azərbaycan Premyer Liqasında Asif Məmmədov 36 yaşında olmasına rəğmən, yaxşı formadadır, qollar vurur, assistentlik edir, “Qəbələ”nin əsas oyunçularından biridir. Təcrübəli Vüqar Əsgərovu da yenidən ölkə çempionatımızda görə bilərikmi?

-Asif Məmmədovun oyunlarını izləyirəm, həqiqətən yaxşı futbolçudur. Ona uzun ömür, can sağlığı, zədələrdən uzaq olmağı və gücü çatdığı qədər oynamağı arzu edirəm. Bu yaşımda Azərbaycan çempionatında oynamağım real deyil. Heç bu barədə düşünmürəm.

-Deməli Azərbaycan çempionatını izləyirsiz

-Bəli. “Qarabağ” çempion oldu, onları təbrik edirəm. Doğma şəhərim Sumqayıtın eyni adlı komandasının mövcud durumu məni çox üzür. “Sumqayıt” döyüşkənliyi ilə daim orta pillələr uğrunda mübarizə aparıb, ölkə futboluna yetərincə futbolçular qazandırıb. Bu komanda autsayder olmağı haqq etmir.

-Azərbaycanda “Sumqayıt”, “Araz-Naxçıvan”, “Zirə” klublarında çıxış etsəniz də, hər birində uğursuzluğa rast gələrək, sonda karyeranızı birdəfəlik Latviya klubları ilə bağladız. Niyə belə alındı?

-Həmin dövrü yenidən xatırlayıb, danışmaq istəmirəm. Qısaca onu deyim ki, vətənimi sevirəm, azərbaycanlıyam. 

-Hazırda Azərbaycan millisi də yaxşı günlərini yaşamır. Sizcə millimiz nə vaxt tərəqqi edəcək?

-Azərbaycan millisinin vəziyyəti həqiqətən ürəkaçan deyil. Bunun səbəbi nəsil dəyişkənliyi, yoxsa baş məşqçi amiliylə bağlıdır, deyə bilmərəm. Hər halda nikbin olmaq və inanmaq lazımdır ki, zamanla millimiz daha yaxşı nəticələr göstərəcək.

-Yığmaya yerli, yoxsa əcnəbi məşqçi rəhbərlik etməlidir?

-Şəxsən mən hər zaman öz futbolçularımıza və mütəxəssislərimə daha çox şans verilməsini istəyərəm. Yetəri qədər “PRO” kateqoriyalı məşqçilərimiz var, niyə onlara yığmada işləməyə şərait yaradılmır? Ayxan Abbasovu yaxından izləyirdim, həm gənc, həm də iddialı məşqçidir. “Sumqayıt”la da yaxşı uğurları oldu, komandanı ilk dəfə “Konfrans liqa”sına çıxarmaqla tarix yazdı. Ayxan Abbasovun Azərbaycan millisinə rəhbərlik edə bilər deyə düşünürəm. Həmçinin U-21 millimizə də rəhbərlik edə biləcək yetəri qədər gənc məşqçilərimiz var. Sadəcə onlara şans vermək lazımdır. Əcnəbilərə o qədər pullar tökməkdənsə özümüzünkülər işləsin və qazansın. 

-Karyeranızın böyük bir hissəsi Latviya klubları ilə bağlıdır, hətta 2018-ci ildə “Dauqavpils” klubu ilə 1-ci liqada həm çempion, həm də 31 qolla mövsümün bombardiri olmusuz. Karyeranızda xüsusi önəm kəsb edən klub hansıdır?

-Futbolçu kimi karyerama Latviyanın Lipeya şəhərinin “Metallurq” klubunda başlamışam. Bu klubla bağlı yaxşı xatirələrim var. 2014-cü ildə “Metallurq” klubunun fəaliyyətini dayandırması məni çox üzdü. Hər dəfə “Metallurq”dakı günlərimi xatırlayanda çox xoş hislər keçirirəm

-Sabiq komandanız “Dauqavpils”də hazırda iki gənc azərbaycanlı futbolçular – Asim Əlizadə ilə Şakir Seyidov çıxış edir. Onlarla görüşür, təcrübənizi bölüşürsünüzmü?

-Əlbəttə. Seyidov Latviyaya gələndə onu özüm qarşılamışdım. Vaxt aşırı hər iki futbolçu ilə görüşürəm. Mənə görə onlar Latviya çempionatına gələn ən güclü azərbaycanlı futbolçulardır. 

-Necə düşünürsüz gələcəkdə onlar daha güclü Avropa liqalarında çıxış edə bilərmi?

-Əlbəttə çıxış edərlər. Düşünürəm ki, Latviya çempionatı onların gələcəkdə daha güclü ölkələrin liqalarına keçid üçün təməl olacaq. 

-Nə vaxtsa Vüqar Əsgərovu baş məşqçi kimi Azərbaycan çempionatında görə bilərikmi? Elə sizə doğma olan “Sumqayıt”ın sükanı arxasına keçməklə tarix yazmağı düşünürsüzmü?

-Ümumiyyətlə məşqçi karyerası haqqında düşünməmişəm. Amma AFFA-dan ürəyimcə iş təklifi olsa fikirləşərəm (gülür).

-Sonda nə demək istərdiz?

-Vətənimdə məni yada salan hər kəsə dərin minnətdarlığımı bildirirəm. Mən öz xalqımı, vətənimi bütün ruhumla sevirəm. 

Abdulla İsmayıloğlu