Azərbaycanda futbola ən çox pul yatırımı edən iki iş adamının xarici mətbuata verdikləri açıqlamalar bir neçə gündür ciddi müzakirə olunur.

Bu müzakirələrin yaranmasına səbəb isə futbola külli miqdarda pul ayıran iş adamlarımızın xarici mətbuat qarşısında həddən artıq şişirdilmiş rəqəmlərlə çıxış etməsidir.

Belə ki, Azərbaycanın “Bakı” və Fransanın “Lans” klubunun sahibi, “Hafka” ləqəbli iş adamı Hafiz Məmmədovun Fransa mətbuatında dərc olunan “9 milyonluq Azərbaycan xalqı “Lans” klubunu dəstəkləyir” fikirləri və “Xəzər Lənkəran” klubunun sahibi, Türkiyədə yaşayan iş adamı Mübariz Mənsimovun Türkiyə mətbuatına müsahibəsində səsləndirdiyi “Azərbaycan əhalisinin 3 milyonu “Xəzər Lənkəran”ı dəstəkləyir” ifadələri birmənalı qarşılanmadı. Əsasən də yerli idman jurnalistlərimizin əksəriyyəti sözün əsil mənasında bu iki iş adamını “topa” tutdu.



Onlar haqlı olaraq bildirir ki, yerli futbolumuzun beynəlxalq aləmdə bərbad olan imicinə belə şişirdilmiş fikirlərlə daha da ağır zərbə endirilir. Çünki H.Məmmədov və M.Mənsimov xarici mətbuata daha çox iş adamları kimi müsahibə verirlər. Onlar verdikləri açıqlamalarda futbolla bağlı fikirlərini səsləndirərkən daha çox rəhbərlik etdikləri klublarla bağlı tərifə üstünlük verirlər. Onların dedikləri də bu üzdən birtərəfli olur.

Mövzu ilə bağlı idman yazrlarının fikirlərinin öyrəndik. “Komanda” qəzetinin redaktoru, tanınmış köşə yazarı Natiq Muxtarlı virtualaz.org saytına açıqlamasında iş adamlarının bu cür açıqlamalarını sərt tənqid etdi: “Bu ölkədə Azərbaycan xalqının adından artıq çobanlar da danışır. Məsələn, hansısa çoban qoyunlarını tərifləmək istəyəndə “bütün Azərbaycan xalqı bu qoyunların ətinin kababını sevir” deyir. Hafiz Məmmədovun “Bakı”sının oyunlarına 50-60 azarkeş gəlir. Amma Hafiz müəllim fransızları inandırmağa çalışır ki, bütün Azərbaycan xalqı “Lans”a azarkeşlik edir. Adama durub sual verərlər ki, Azərbaycan xalqı “Lans”a axı niyə azarkeşlik etməlidir. Azərbaycan xalqına məxsus sərvəti fransız klubuna xərclədiklərinə görə? Məsələn, mənim üçün maraqlıdır: ayda 100-150 manat məvacib alan Azərbaycan müəllimi, həkimi, jurnalisti “Lans”a niyə azarkeşlik etsin ki?”



Azərbaycanlıların “fransız xalqının kef eləməsinə” həmişə həsəd apardığını deyən jurnalist bildirdi ki, əvvəllər fransız xalqı öz puluna kef edirdisə, indi Hafiz Məmmədovun sayəsində azərbaycanlıların pulu hesabına kef edir. Bu da təzad yaradır.

N.Muxtarlının sözlərinə görə, Hafiz Məmmədova baxanda Mübariz Mənsimov bir az insaflı danışıb: “Bu da var ki, “Xəzər Lənkəran”a 3 milyon adam azarkeşlik edirsə, 6 milyon da Mənsimovun klubunda havaya sovrulan vəsaitə heyfslənir. Fransızlar, ispanlar Hafiz Məmmədovun, Mübariz Mənsimovun “Bakı”ya, “Xəzər Lənkəran”a xərclədiyi vəsaitdən də az vəsaitlə elə komanda qururlar ki, hətta azərbaycanlılar da ispan, fransız klublarına azarkeşlik edirlər. Amma bunların “Bakı”sı, “Xəzər Lənkəran”ı azarkeşlər üçün ancaq dərd yoğurur. Aarada pulu gedən də xalqdır, dərd tapan da xalqdır, boynuna minnət qoyulan da xalqdır. Eşitmişəm ki, Hafiz Məmmədov “Porto”nu da dolandırmaq istəyir. Bundan sonra Azərbaycan xalqı “kimə azarkeşlik edək” məsələsində çaşıb qalacaq. Yaxşı olardı ki, Hafiz müəllim bu məsələni nizamlasın ki, xalq Fransa ilə Portuqliyanın arasnda haça-paça vəziyyətində qalmasın. Hələ ortada İspaniya da var. Hafiz müəllimin reklamı naminə “Atletiko”ya da azarkeşlik etmək lazımdır, ya yox?!”



İdman jurnalisti Elnur Əşrəfoğlu isə virtualaz.org-a açıqlamasında bildirdi ki, bu fikirlər normal qarşılanmalıdır: “Çünki “Xəzər Lənkəran” ölkəmizdə ən çox azarkeş dəstəyi alan komandadır. İstər Lənkəranda, istərsə də Bakıda keçirilən oyunlarda bunun şahidi oluruq. “Neftçi” ilə Bakıda keçirilən oyunda belə lənkəranlı azarkeşlər üstünlük təşkil edir. Amma dəqiq deyə bilmərəm ki, bu rəqəm 3 milyondur, ya yox”.



E.Əşrəfoğlu bununla bağlı nümunə də gətirdi: “Fatih Terim “Milan”ın baş məşqçisi olarkən demişdi ki, 70 milyonluq Türkiyədə belə “Milan”ın azarkeşləri var. Bu açıqlamalar ümumi açıqlamalardır. Yəqin Hafiz Məmmədov da belə fikirlər səsləndirərkən düşünüb ki, klubun formasının üzərində “Land of fire Azerbaijan” və “Baku-2015” yazılıbsa, istər-istəməz bütün Azərbaycanın həmin kluba rəğbəti olacaq. Xaricdə psixologiya belədir, bizdə isə yox. Mən şəxsən bu cür açıqlamaları normal qarşılayıram”.

Bu açıqlamalarda qəbahətli heç nə olmadığını deyən E.Əşrəfoğlu rəqəmlərin bir az düzgün səsləndirilmədiyi ilə razılaşsa da bunun sevgidən irəli gələrək deyildiyi qənaətindədir.