Əbdəl Fəttah Əl-Sisi 3 gün davam edən proses zamanı səslərin 90 faizini toplayıb

Misirdə keçirilən prezident seçkilərinin qalibi ölkənin sabiq ordu rəhbəri Əbdəl Fəttah əl-Sisi oldu. Əl-Sisi 3 gün davam edən proses zamanı səslərin 90 faizini toplayıb. Onun əsas rəqibi Həmdin Sabahi isə səslərin cəmi 3.5 faizini toplaya bilib. Təşviqat kampaniyasının məlumatına görə, səsvermədə ölkə əhalisinin 46 faizi iştirak edib.
Əl-Sisi tərəfdarları ötən gün axşam saatlarında qələbəni bayram ab-havasında qeyd ediblər.
Əl-Sisinin qələbəsi əvvəlcədən gözlənilən olsa da, müxalifət rəhbərliyi seçkilərin ədalətsiz şəkildə baş tutduğunu bildirib. Həmçinin, avropalı müşahidəçilər də eyni mövqedən çıxış ediblər.
"Prosesin demokratik şəkildə keçirildiyini, bununla belə hər iki tərəf üçün bərabər rəqabət olmadığını müşahidə etdim. Namizədlərdən biri daha çox dəstəyə malik idi. Əsasən, media əl-Sisiyə daha çox yer ayırmışdı" - deyə Avropa Komissiyasının üzvü Robert Qobels bildirib.
Bununla belə, Həmdin Sabahi rəqibinə məğlub olduğunu qəbul edib.
Məlumata görə, seçkilərin ilk iki günündə səsverməyə getməyən vətəndaşlar iri məbləğdə pul cəriməsi ilə hədələniblər.