"Zənnimcə, son hadisələrdən sonra Rusiya ilə münasibətlər çox barışmaz və kateqorik forma alacaq”.
Bu sözləri Axar.az-a politoloq Qabil Hüseynli Ukraynada sərnişin təyyarəsinin vurulmasından sonra Rusiya üçün yaranacaq beynəlxalq vəziyyəti şərh edərkən söyləyib. O, dünyanın bundan sonra Putinin nazıyla çox oynamayacağını bildirib:
"NATO ilə Rusiya arasında müharibənin olacağını istisna etmirəm. Çünki Putin çoxdan qırmızı xətti keçib. Təyyarənin vurulması çox böyük hadisədir. Mən bunu 1983-cü ildə SSRİ tərəfindən Cənubi Koreya sərnişin təyyarəsinin vurulmasıyla müqayisə edərdim. Məhz həmin hadisədən sonra SSRİ-nin genişmiqyaslı izolyasiya prosesi başladı. Həmin dövrdə Reyqan çox ciddi bəyanat verərək dedi ki, SSRİ şər imperiyasıdır və onun da vəzifəsi bu imperiyanı cəhənnəmə vasil etməkdir. Göründüyü kimi, Reyqan dediyi sözə əməl etdi. Hələ ki, ABŞ-ın vəzifəli şəxslərindən yalnız Hillari Klinton sərt açıqlama ilə çıxış edib. O, Putini yerində oturtmağın vacibliyini vurğulayıb.
Putinin bu addımı dünyaya mesajdır. Əgər dünya bunu lazımınca dəyərləndirməsə, o, yeni addımlar atacaq. Amma inanmıram ki, dünya bundan daha artığına dözəcək”.
Politoloq Rusiyaya qarşı Pentaqon tərəfindən yeni planların hazırlandığını deyib:
"Bu dəqiqə Pentaqon və Mərkəzi Kəşfiyyat İdarəsi tərəfindən Rusiyaya qarşı müxtəlif planlar üzərində iş gedir. Bu variantlardan biri Rusiyanın ən azı 8 hissəyə parçalanmasından ibarətdir. Bu məqsədlə 30 milyard dollardan artıq pul ayrılıb. İkinci istiqamət isə Rusiyaya kəskin iqtisadi zərbələr vurmaqla onun çöküşünü hazırlamaq və əhalinin sosial qiyamının yaradılmasından ibarətdir. Bu qiyama milli görkəm də verilməsi nəzərdə tutulub. Hazırda Rusiyada 100-dən artıq millətin nümayəndəsi var. Bunların içərisində çoxsaylı xalqlar var ki, qəti şəkildə müstəqilliyə hazırdırlar. Məsələn, çeçenlər, Dağıstanda yaşayan müxtəlif xalqlar, başqırdlar, tatarlar, altaylar, komi-saxallar və başqalarını bura aid etmək olar. Burada milli müstəqillik haqqında fikirlər artıq uzun illərdir ki, müzakirə edilir. Hətta Tatarıstanın paytaxtı Kazanda dəfələrlə millətçilərin mitinqi keçirilib. Bu daktlar göstərir ki, Rusiyada millətlərarası münasibətlər çox kövrəkdir. Yəni o, müxtəlif hissələrə parçalana bilər. Zənnimcə, son hadisələrdən sonra Rusiya ilə münasibətlər çox barışmaz və kateqorik forma alacaq. O, bu münasibətlərdən kifayət qədər ağır vəziyyətə düşəcək”.
Qeyd edək ki, Ukraynanın şərqindəki terrorçular iyulun 17-də Malaziya Hava Yollarına aid təyyarəni vurublar. Təyyarənin vurulması nəticəsində 300-ə yaxın sərnişinin hamısı ölüb. Son açıqlamalara görə, qəzada ölənlər 10 müxtəlif ölkənin vətəndaşıdır. Bəzi analitiklər Rusiyanın məhz bu qəzaya görə ciddi cavab verəcəyini deyiblər.