Müdafiəçi Bəşər Əsədin əfv sərəncamı ilə bağlı sənədlərin məhkəməyə təqdim edilməsini istədi

Bakı Ağır Cinayətlər Məhkəməsində İraq Şam İslam Dövləti (İŞİD) terror təşkilatının tərkibində Suriyada Bəşər Əsədə qarşı döyüşlərdə iştirak edən Vilayət Həsənli, Malik Musayev, Samir Həşimov, Vasif Hacıyev, İlkin Babazadə, Mehman Balakişiyev, Azər Qəmbərov, Vüsal Bayramov, ata-oğul Vüqar və Elvin Dursunəliyevlərin cinayət işi üzrə məhkəmə prosesi davam etdirilib.

Hakim Ramella Allahverdiyevanın sədrliyi ilə keçən prosesdə cinayət işinin materialları arasında olan sənədlərin araşdırılması başa çatıb. Hakim bildirib ki, tərəflərin başqa sənədlərin araşdırılması ilə hansı təklifi var. Tərəflər məhkəmədə araşdırılan sənədlərə əlavələri olmadığını bildirib.

Hakim daha sonra qeyd edib ki, təqsirləndirilən Vasif Hacıyevin vəkili Şəms Eyyubova poçt vasitəsi ilə məhkəməyə vəsatət və sənədlər göndərilib. Hakimin səsləndirdiyi sənədlərdən məlum olub ki, vəkilin müdafiə etdiyi şəxsin əməlində cinayət tərkibi olmaması ilə bağlı bir sıra sənədlər məhkəməyə təqdim edib. Vəkilin həmçinin internet saytlarda Suriya Ərəb Respublikanın prezidenti Bəşər Əsədin 400-dən çox əcnəbi vətəndaşı əfv etməsi ilə bağlı sərəncamı da məhkəməyə təqdim edib.

Hakim bildirib ki, vəkilin məhkəməyə vəsatət şəkilində təqdim etdiyi bu sənədlər qiymətləndirici xarakter daşıyır. Onun sözlərinə görə, müdafiəçi həmin faktları müdafiə nitqində qeyd etməli və sonda bəraətverici hökmün çıxarılmasını istəməlidir: “Məhkəmə də həmin faktlara müşavirə otağında qiymət verməlidir. Buna baxmayaraq biz vəkilin məhkəməyə göndərdiyi sənədləri işə əlavə edirik və sonda qiymət veriləcək”.

Daha sonra Vilayət Həsənlinin ailə üzvləri yeni vəkillə müqavilə bağlaması üzə çıxıb. Yeni təyin olunan vəkil orderi məhkəməyə təqdim edib. Vilayət Həsənli vəkili qəbul etmədiyini deyib: “Mən məhkəməni qəbul etmirəm. İşimə şəriət məhkəməsində baxılmasını istəyirəm. Buna görə də vəkilin də müdafiə hüququndan yararlanmaq istəmirəm”.

Vilayət Həsənlinin etirazını nəzərə alan hakim yeni təyin olunmuş vəkili prosesə buraxmayıb. Bundan sonra hakim məhkəmə istintaqının tamamlanması ilə bağlı tərəflərin fikirlərini öyrənib. Prokuror Rahil İsmayılov məhkəmə istintaqının tamamlanmasını təklif edib. Təqsirləndirilən şəxslərin vəkilləri məhkəmə istintaqının tamamlanmasına etiraz etməyiblər. Amma Vasif Hacıyevin vəkili Şəms Eyyubova bildirib ki, Bəşər Əsədin əfv sərəncamı verməsi ilə bağlı məhkəmə rəsmi sorğu ilə cavab verilməsi vacibdir. Onun sözlərinə görə, həmin sənədləri Azərbaycanın Xarici İşlər Nazirliyinin vasitəsi ilə əldə etmək mümkündür. Bundan əlavə vəkil qeyd edib ki, Vasif Hacıyev ittiham sənədlərində subay kimi göstərilib: “Amma Vasif Hacıyev ailəlidir və iki övladı var”.

Hakim bildirib ki, vəkilin sorğu vermək və sorğuya cavab alması qanunla müəyyən edilib: “Müdafiəçi kimi sorğu göndərin və aldığınız cavabı məhkəməyə təqdim edin. Vasif Hacıyevin anket məlumatları öz ifadəsi əsasında qeyd edilib. Onun evli olması ilə bağlı sənədləri məhkəməyə təqdim edin, biz də həmin sənədləri işə əlavə edək”.

Hakim həmçinin qeyd edib ki, təqsirləndirilən Azər Qəmbərovun vəkili məhkəmədə iştirak etmir. Hakimin sözlərinə görə, həmin vəkilin fikirləri öyrənilmədən məhkəmə istintaqının tamamlanması mümkün deyil. Hakim bildirib ki, həmçinin prokuror ittiham nitqi ilə çıxış etməyə hazırlaşmaq üçün vaxt istəyir. Hakim məhkəmə iclasının davamını mayın 7-dək təxirə salıb.