Rusiya Türkiyənin Suriyanın şimalına qurudan müdaxilə edəcəyi halda kürdləri müdafiə edəcəyinə dar vəd verib.

Bu barədə “Suriya Kürdüstanı”nın Moskvada bir neçə gün əvvəl fəaliyyətə başlayan nümayəndəliyinin rəhbəri Rodi Osman “Bloomberg”ə açıqlamasında deyib. Onun sözlərinə görə, Ankara müdaxilə etsə bu, “böyük müharibəyə” gətirib çıxaracaq.

“Rusiya bu müdaxiləyə reaksiya verəcək. Bu, təkcə kürdlərə aid deyil, Rusiya Suriyanın ərazi bütövlüyünü müdafiə edəcək”-Rodi Osman deyb. Kürd nümayəndəliyinin rəhbəri bildirib ki, Rusiyanın hava-kosmik qüvvələri Suriyanın şimalında Türkiyə sərhədlərinə doğru hücum əməliyyatları aparan kürd qüvvələrinə havadan dəstək verir. O, əlavə edib ki, Türkiyə mane olmasaydı bu hücum əməliyyatları daha sürətlə gedərdi.



Suriya müxalifətinin Moskvadakı nümayəndəsi Kadri Camil isə deyib ki, havadan dəstəkdən əlavə Rusiya kürdlərə silah-sursat da verir.

Hazırda kürd qüvvələri Suriyanın şimalındakı strateji əhəmiyyətli Azez qəsəbəsinə doğru irəliləyirlər. Bu qəsəbə ələ keçirilsə Suriyanın şimalında YPG və PYD qüvvələrinin nəzarətində olan kürd kantonları birləşəcək, Türkiyənin sərhədi boyu yeni kürd “dövləti” meydana çıxacaq.

“The Financial Times” qəzetinin yazdığına görə belə vəziyyətdə Türkiyənin ABŞ-ın icazəsi olmadan Suriyanın şimalında müdaxiləsi gözlənilmir. Türkiyə çalışır ki, ABŞ-ın və ərəb müttəfiqlərinin köməyi ilə Suriyanın içərilərin doğru bir neçə kilometr irəliləsin, orada bufer zonası yaratsın. Bu bufer zonası Əsədə qarşı döyüşən müxaliflər və qaçqınlar üçün sığınacaq rolunu oynaya bilərdi. Lakin NATO üçün Suriyanın şimalında, Rusiyanın nəzarət zonasında alyans üzvlərindən birinin hərbi qüvvələrinin yer alması ehtimalı olduqca narahatedicidir. Çünki bu, alyansla Rusiya arasında hərbi toqquşma riskini atırır.



Bu baxımdan analitiklər Suriyanın şimalında hazırda çox mürəkkəb vəziyyət yaramdığını deyirlər. Belə vəziyyətdə ABŞ Suriyaya müdaxilə variantını dəstəkləmir, ancaq xüsusi əməliyyatları artırmağı və müxaliflərə silah dəstəyini genişləndirməyi nəzərdə tutur. “Əsl məsələ ruslara Suriyada mümkün qədər ağır əvəz ödətdirməkdir, ancaq bunu necə edəcəyimizi demək çətindir”-yüksək rütbəli qərbli siyasətçi deyib.

Türkiy üçün vəziyyəti dramatikləşdirən həm də odur ki, ABŞ YPG-ni terror təşkilatı hesab etmir, əksinə, İŞİD-ə qarşı mübarizədə onu müttəfiq kimi görür. Və beləliklə də kürdlər üçün şərtlər heç vaxt olmayan qədər əlverişlidir: indi onlar eyni vaxtda dünyanın iki böyük dövlətindən dəstək alırlar...