Terror dəstəsi mayın 8-dən etibarən tərk etməyə başlayacaq

PKK terror təşkilatı Türkiyə ərazisindən çəkilməyə başlayacağı tarixi açıqlayıb. Təşkilatın rəhbərlərindən Murat Karayılan aprelin 25-də Qəndil dağındakı düşərgələrin birində mətbuat konfransı keçirərək,Türkiyəni mayın 8-dən etibarən tərk etməyə başlayacaqlarını bəyan edib. O, silahlıların mərhələ-mərhələ geri çəkiləcəyini deyib.
Bununla yanaşı Karayılan qeyd edib ki, geri çəkilmə prosesində onlara qarşı hər hansı hərbi əməliyyat olsa, müdafiə haqlarından istifadə edəcəklər və Türkiyə ərazisindən çıxmağı dərhal dayandıracaqlar.
PKK lideri deyib ki, Türkiyə ərazisindən çıxmaları kürd probleminin həlli prosesində ilk mərhələdir. Onun fikrincə, bundan sonrakı mərhələ "hər kəsin özünü ifadə edə bildiyi konstitusiyanın hazırlanması" olmalıdır. Əgər bu da həyata keçərsə, üçüncü - silahsızlaşma mərhələsi başlayacaq.

“Xəbər xidməti”