Şimali Koreya lideri Kim Çen İn haqqında yeni iddia səsləndirilib.

Pxenyana səfər edən rus millət vəkili Anton Morozovun iddiasına görə, Şimali Koreya uzaqmənzilli yeni raketlərin sınağına başlayacaq.

Açıqlamada deyilir: “Uzaqmənzilli raket sınağına hazırlaşırlar. Bizə ABŞ-ın qərb sahillərini vura biləcək riyazı hesablamaları da göstərdilər. Başa düşdük ki, yaxın vaxtlarda bu raket sınağını həyata keçirəcəklər”.

ABŞ prezidenti Donald Tramp isə Şimali Koreya probleminin tezliklə həll ediləcəyini deyib: “Şimali Koreyada hədəfimiz nüvə silahlarını ləğv etməkdir. Bu diktatorluğun, ölkəmizi və ya müttəfiqlərimizi hədələməsinə icazə verə bilmərik. Bunun qarşısını almaq üçün lazım olan hər addımı atacağıq. İnanın mənə, lazım olan kimi bütün addımlar atılacaq”.

Qeyd edək ki, II Dünya Müharibəsindən sonra illər ərzində lokal savaşlar olub. Lakin böyük atom müharibəsi olmayıb. Bunun da səbəbi nüvə silahına malik ölkələrin kifayət qədər məsuliyyətli olmasıdır. Onlar başa düşürlər ki, nüvə silahı çox təhlükəlidir. Çünki bir bomba partlasa, çox böyük fəlakətlər ola bilər. Ona görə də, nüvə silahına malik ölkələr nə qədər münasibətlər korlansa da, qarşı tərəfə nüvə silahı işlətmə kimi təhlükəli bəyanatlar verməyiblər. Vəziyyəti daha da gərginləşdirməyiblər. Çünki bu dövlətlərin rəhbərləri öz məsuliyyətlərini başa düşürlər.
İndi isə ABŞ və Şimali Koreya arasında qarşılıqlı ittiham və hədə dolu bəyanatlardan sonra dünya siyasətçiləri böyük savaşın başlayacağını bildiriblər. Ehtimal olunur ki, artıq Amerika hökuməti Kim Çen İnin “şıltaq”lığına dözməyəcək.

Azərbaycanlı siyasətçilər isə hazırda çox ziddiyyətli və ciddi bir halın yarandığını deyirlər. Politoloq İlqar Altay “Ölkə.Az”a açıqlamasında bildirib ki, müharibənin başlanması 1 nəfərin beyninin “qurdunun tərpənməsindən” asılıdır. Onun sözlərinə görə, ABŞ Şimali Koreyaya hücum etsə, onların müharibəsinə heç bir dövlət qarışmayacaq.

“ABŞ hökuməti dayanan yerdə Şimali Koreya ilə müharibəyə başlamaz. Əgər Şimali Koreya Cənubi Koreya və ya Yaponiyaya həmlə etsə, bu zaman Amerika müharibə edər. Onsuzda bu dövlət çökür. Ölkənin iqtisadiyyatı yox, sosial formulası mövcud deyil. Hökumətin heç bir siyasəti uğurlu deyil. Əgər Şimali Koreya nüvə silahından istifadə etsə, region üçün böyük fəlakət olar. Bunu da etsələr, onların arxasında heç kim dayanmayacaq. Əslində inanmıram ki, onların atdığı nüvə silahı Amerikaya çatar. Lakin ABŞ-ın müttəfiqləri olan ölkələr təhlükədədirlər. Cənubi Koreyanı və Yaponiyanı vurma ehtimalı çoxdur. Bu da Amerika üçün çox böyük problemlər yaradar.

ABŞ Şimali Koreyaya hücum etsə, onların müharibəsinə heç bir dövlət qarışmayacaq. Burada ABŞ, Şimali Koreya, Cənubi Koreya, Yaponiya rol oynayacaq. III Dünya Müharibəsi elə bir şeydir ki, orada dünya ölkələri döyüşməlidirlər. Dünyanın bir qütbü ilə digər qütbü üz-üzə gəlməlidir. Şimali Koreya isə heç bir qütbə daxil deyil. Şimali Koreya Rusiyanın hərbi müttəfiqi deyil. Onun ətrafında heç bir dövlət birləşməyəcək. Uzağı Çin yaxud Rusiya tərəfdən təkcə söz formasında Amerika tənqid oluna bilər. Deyə bilərlər ki, gərək səbr edəydiz və s.”, - deyə İlqar Altay bildirib.