ABŞ-ın keçmiş prezidenti Barak Obamanın administrasiyası “Hizbullah” təşkilatı ilə başladılan narkotiklərin qaçaqmalçılığı üzrə araşdırmanı bağlayıb.

Bu haqda “New York Post” nəşri bildirib.
“Kassandra layihəsi” kampaniyası 2008-ci ildə “Hizbullah”ın çirkli pulların yuyulması, narkotik və silah ticarəti ilə məşğul olması, həmçinin başqa cinayətkar hərəkətlərdə iştirakı ilə bağlı sübutların aşkar edilməsindən sonra başlanmışdı. İddiaya görə, təşkilat bu yollarla hər il milyard dollara yaxın pul qazanırdı.
Narkotiklərlə mübarizə üzrə İdarənin əməkdaşları təxminən on il müddətində bu iş üzərində işləyərək cinayətkar şəbəkələrin xəritəsini, həmçinin çirkli pulların yuyulması sxemini təşkil etməyi bacarıblar.
Ancaq keçmiş Amerika liderinin administrasiyası bu işi Tehranın nüvə sazişindən imtina etməməsi naminə bağlamağa qərar verib. Xüsusi halda, Amerika hakimiyyəti əlavə maliyyələşmə ayırmır və şübhəlilər barəsində cinayət işlərinin qaldırılması üzrə sorğuları rədd edirdi.
Qeyd edək ki, İranın atom proqramının çoxillik probleminin nizama salınması haqqında razılaşma 2015-ci il iyulun 14-də İranla beynəlxalq vasitəçilərin yer aldığı “altılıq” (BMT Təhlükəsizlik Şurasının beş daimi üzvü və Almaniya –red.) arasında imzalanıb. Razılaşmaya əsasən, Birgə hərtərəfli iş Planı qəbul edilib. 2016-cı il yanvarın 16-dan qüvvəyə minən planın icrası BMT, ABŞ və Avropa İttifaqı tərəfindən İrana qarşı qəbul edilən maliyyə və iqtisadi sanksiyaların ləğvini nəzərdə tuturdu.