İranın evdar qadın olan birinci xanımı kimdir?
BBC - Persian İranın yeni birinci xanımı barədə bir sıra məlumatlar əldə edə bilib. BBC Persian-ın islam ölkəsinin birinci xanımları barədə hazırladığı qısa videosujetdə Həsən Ruhaninin həyat yoldaşı haqqında məhdud informasiyalar yer alıb. İranın yeni birinci xanımının adı Sahibə Ərəbidir. O evdar qadındır. Təhsili diplom səviyyəsindədir.

İranın şiə məzhəbindən olan yeni prezidenti Həsən Ruhaninin xanımı Sahibə Ərəbi qatı dindar ailədə doğulub.

Prezidentin 86 yaşlı anası Səkinə Peyvəndi oğlunun 14 yaşlı xalası qızıyla evləndiyini bildirib.

Qeyd edək ki, İranın birinci lediləri haqqında məlumatlar məhduddur. İran prezidentlərindən yalnız Məhəmməd Hatəminin xanımı Zöhrə Sadiqi ictimai həyatda və xeyriyyə işlərində fəal olub.

Prezident postundan getməyə hazırlaşan Mahmud Əhmədinejadın xanımı Əzəm Fərəhi isə cəmi 3-4 rəsmi görüşdə həyat yoldaşını müşayiət edib.

Yeni prezident Həsən Ruhaninin evdar xanımı Sahibə Ərəbi onunla kəbin yolu ilə evlənib.

64 yaşlı Həsən Ruhani valideynlərinin seçimi ilə ailə həyatı qurub. Kəbin kəsilərkən Həsən Ruhaninin 20, Sahibə xanımın isə 14 yaşı olub.

Məlumatlara görə, Həsən Ruhani və Sahibə Ərəbinin 4 övladı var.

Həsən Ruhani 1948-ci il noyabrən 12-də İranın Səmnan yaxınlığıdakı Sorhəh şəhərində şah əleyhdarı ailəsində anadan olub. Dini təhsilə 1960-cı ildə Səmnan mədrəsəsində başlayıb. 1961-ci ildən isə Qum şəhərindəki mədrəsədə təhsilini davam etdirib. Onun müəllimləri dövrünün məşhur ilahiyyatçıları olan Seyid Mohaqqiq Damad, Şeyx Murtuz Hayəri, Fazil Lənkərani, şeyx Məhəmməd Şahabadi və Seyid Məhəmməd Rza Qolpəyəgani olub.

Bundan əlavə o, dünyəvi təhsil də alıb. 1969-cu ildə Tehran Universitetinə daxil olan Ruhani 1972-ci ildə bu universiteti məhkəmə hüququ üzrə bakalavr dərəcəsi ilə bitirib. Bundan sonra təhsilini Avropada davam etdirərək 1995-ci ildə Qlazqo Universitetini magistr dərəcəsini alıb. 1999-cu ildə isə elmlər namizədi adını alıb.

Ruhani gənc yaşlarından ayətullah Xomeyninin ideyalarını dəstəkləyərək şah əleyhinə təbliğat aparmağa başlayıb. Buna görə şah hakimiyyəti tərəfindən dəfələrlə həbs olunub. Ona ictimai yerlərdə çıxış etmək qadağan edilib. 1977-ci ilin noyabrında Mustafa Xomeyninin anım tədbirində Həsən Ruhani ilk dəfə ayətullah Xomeyninin ünvanına “İmam” sözünü işlədib. Buna görə təqiblərə məruz qalacağına görə ayətullah Məhəmməd Behiçtinin məsləhəti ilə ölkəni tərk edib, Parisə gedib.

1980-ci ildə Həsən Ruhani İran İslam Şura Məclisinə üzv seçilib. 20 il (1980-2000) məclis üzvü olduğu müddətdə müxtəlif vəzifələri icra edib.

İran-İraq müharibəsi dövründə 1982-ci ildən 1988-ci ilə qədər Ali Müdafiə Şurasının üzvü, Müharibəyə Dəstək komissiyasının üzvü həm də onun icra komitəsinin sədri (1986-1988), İran Ordu komandanının müavini (1983-1985), İran Hərbi Hava Qüvvələrinin komandanı (1986-1991) və s. vəzifələr icra edib.

Müharibədəki xidmətlərinə görə Fəth (Qələbə) medalı ilə mükafatlandırılıb.

İranın Ali Dini lideri Ayətullah Xomeyninin Məclisdəki nümayəndəsi təyin edilən Həsən Ruhani 1989-cu ildən 2005-ci ilə qədər 16 il müddətində Təhlükəsizlik Şurasının katibi olub. O həmçinin sabiq İran prezidenti Hatəminin 2000-2005-ci illərdə Təhlükəsizlik məsələləri üzrə müşaviri vəzifəsini tutub.

Həsən Ruhani məsul vəzifələrlə yanaşı, elmi fəaliyyətini də davam etdirib. 1995-1999-cu illərdə Tehran Universitetinin hamilər şurasının üzvü olub. 1991-ci ildən Strateji Araşdırmalar Mərkəzində çalışan Həsən Ruhani araşdırmaçı-professor adı alıb və fars, ərəb və ingilis dillərində çoxlu elmi kitab və məqalələrin müəllifidir.

İranın Qərblə nüvə proqramı ilə bağlı danışıqlarda iştirak edən əsas sima Həsən Ruhani olub. O, Təhlükəsizlik Şurasının katibi və Məclisin vise-spikeri kimi xarici nümayəndələrlə nüvə proqramı barədə diplomatik müzakirələrdə, o cümlədən MAQATE-ilə danışıqlarda iştirak edib. Buna görə ölkəsində ona “Diplomatiyanın şeyxi” adı da verilib.