Tiflisdə etirazçılar Rustaveli küçəsini bağlayıblar.

APA-nın Gürcüstan bürosu xəbər verir ki, parlament sədrinin və daxili işlər nazirinin istefası tələbi ilə parlamentin önünə toplaşan nümayişçilər paytaxtın əsas yollarından olan Rustaveli küçəsini bağlayıblar. Hüquq-mühafizə xidmətinin əməkdaşları yolun bağlanmasına əvvəlcə icazə verməsələr də, sonradan nümayişçilər buna nail ola biliblər.

"Girçi" partiyası da artıq nümayişlərə qoşulduğunu bəyan edib. Partiyanın lideri Zurab Caparidze bildirib ki, onlar həm hökümətə, həm də patriarxlığa etiraz edirlər.

"Anlamalısınız ki, bu günkü vəziyyətin əsas səbəbkarlarından biri Gürcüstan patriarxlığıdır. Mən gəlmişəm göstərəm ki, patriarxlıq Rusiyanın bu ölkədəki əsas güclərindən biridir", - deyə Z.Cparidze bildirib.

Tiflis Dövlət Universutetinin və İlia Dövlət Universitetinin tələbələri də nümayişə qoşulacaqlarını bəyan ediblər.

"Vahid Milli Hərəkat" partiyasının sədri Qriqol Vaşadze isə hökümətə parlamentin sədri İrakli Kobaxidzenin, daxili işlər naziri Georgi Qaxariyanın və Dövlət Təhlükəsizliyi xidmətinin rəhbəri Vaxtanq Qomelaurinin istefası üçün bir saat vaxt verdiyini bəyan edib.

Tiflis ilə bərabər Gürcüstanın Poti, Batumi və bir sıra digər rayonlarında da etiraz aksiyaları keçirilib.

Qeyd edək ki, bu gün Parlamentlərarası Pravoslav Assambleyasının Tiflisdə keçirilən 26-cı Baş Assambleyası zamanı assambleyanın prezidenti, Rusiya Kommunist Partiyasının nümayəndəsi və Dövlət Dumasının deputatı Sergey Gavrilovun parlament sədrinin kürsüsündə əyləşərək assambleyaya sədrlik etməsi etirazlara səbəb olub. O, bir müddət öncə Gürcüstanı reallıqla barışmağa, Abxaziya və Cənubi Osetiyanın müstəqilliyini tanımağa çağırıb.

S.Qavrilovun artıq ölkəni tərk etdiyi bildirilir.

***

Gürcüstanın daxili işlər naziri Giorgi Qaxaria etiraz aksiyasının keçirildiyi parlamentin qarşısına gəlib.

“Report”un yerli bürosu xəbər verir ki, nazir etirazçıları polisin tələblərinə əməl etməyə çağırıb.

G.Qaxaria bildirib ki, qanunverici orqanın qarşısında baş verənlər dövlət qurumlarına hücumdur:

“Burada olan hər bir vətəndaşı polisin tələblərinə qeyd-şərtsiz tabe olmağa çağırıram”.

***

Gürcüstanda minlərlə vətəndaş parlament qarşısına toplaşaraq Rusiya parlamentinin nümayəndə heyətinin ölkəyə səfərinə qarşı etiraz aksiyası keçirirlər.

Onlar Rustaveli prospektini bağlayan etirazçılar rusiyalı deputatların dərhal ölkəni tərk etmələrini tələb edirlər.

Aksiyada iştirak edən ictimai fəallar və müxalifət partiyalarının üzvləri Gürcüstanın parlament sədri İrakli Kobaxidzenin istefasını tələb edirlər.

Həmçinin daxili işlər naziri Giorgi Qaxaria və Dövlət Təhlükəsizlik Xidmətinin rəisi Vaxtanq Qomelaurinin də istefası tələb olunur.

Tbilisidə etiraz aksiyasında iştirakçılar və polis arasında fiziki qarşıdurma yaşanıb. Qarşıdurma nəticəsində həm polis, həm vətəndaşlar tərəfdən xəsarət alanların olduğu bildirilir.

***

Tbilisidə nümayişçilər polis səddini yarıb parlament binasına daxil olmağa cəhd edirlər.

APA-nın Gürcüstan bürosu xəbər verir ki, polislə nümayiş iştirakçıları arasında toqquşmalar baş verir.

Əraziyə Daxili İşlər Nazirliyinin şəxsi heyəti və texnikası cəlb edilib. Artıq aksiyada iştirak üçün bölgələrdən də gələnlər olub. Nümayişçilər polisi və ölkədəki diplomatik korpusun nümayəndələrini onlarla birgə olmağa çağırıblar. Mitinq iştirakçıları parlament sədri İrakli Kobaxidzenin bu gecə 00:00-dək istefa verməsini, əks təqdirdə parlament binasına daxil olacaqlarını bəyan ediblər.

Qeyd edək ki, mitinqdə parlamentin spikeri ilə yanaşı, Daxili İşlər Naziri Giorgi Qaxaria və Dövlət Təhlükəsizliyi xidmətinin rəhbəri Vaxtanq Qomelaurinin istefasını tələb edilir.

Xatırladaq ki, iyunun 20-də Parlamentlərarası Pravoslav Assambleyasının Tbilisidə keçirilən 26-cı Baş Assambleyası zamanı assambleyanın prezidenti, Rusiya Kommunist Partiyasının nümayəndəsi və Dövlət Dumasının deputatı Sergey Gavrilovun parlament sədrinin kürsüsündə əyləşərək toplantıya sədrlik etməsi etirazlara səbəb olub. O, bir müddət öncə Gürcüstanı reallıqla barışmağa, Abxaziya və Cənubi Osetiyanın müstəqilliyini tanımağa çağırıb.

S.Qavrilovun artıq ölkəni tərk etdiyi bildirilir.

***

Tbilisidə parlament binasının qarşısında keçirilən etiraz aksiyası dağıdılıb.

APA-nın Gürcüstan bürosu xəbər verir ki, saat 01:30 radələrində əraziyə Daxili İşlər Nazirliyinin əlavə xüsusi təyinatlı polis dəstələri cəlb edilib.

Polis nümayişçilərin dağıdılması üçün xüsusi texnikadan və su şırnağından istifadə edib. Bundan sonra etirazçılar ətraf ərazilərə dağılmağa başlayıblar.

Hazırda parlamentin qarşısında nümayişçi qalmayıb. Ərazi polisin nəzarəti altındadır. Ətraf küçələrdə isə etirazçıların dağıdılması davam etdirilir.

***

Gürcüstan Səhiyyə Nazirliyinin məlumatına görə, Tbilisidə parament qarşısında etiraz aksiyasının iştirakçılarına xüsusi təyinatlılar tərəfindən rezin güllələrin atılması və gözyaşardıcı qadan istifadə nəticəsində 16 nəfər xəsarət alıb.

Onlardan 12 nəfərinin yüngül, 4 nəfərinin isə orta dərəcəli xəsarətlər aldığı bildirilir.

Tiflisdə baş verən toqquşmalara dair youtube platformasında olan bəzi görüntüləri təqdim edirik.