Müxalif liderin sağalacağı, amma siyasətdən kənar qalacağı açıqlandı, onu FTB izləyibmiş; Verzilov, Kara-Murza və Politkovskaya da belə zəhərlənib; ekspert: “Xabarovsk etirazları Moskvaya sıçraya bilər”

Rusiyalı müxalifətçi Aleksey Navalnı tezliklə sağalacaq. GundemXeber.Az xəbər verir ki, bu sözləri Almaniyanın “Cinema for Peace” adlı humanitar təşkilatının rəhbəri Yaka Bizil “Bild”ə açıqlamasında deyib.

“Navalnı tezliklə sağalacaq, amma bir neçə ay siyasətlə məşğul ola bilməyəcək. Bu zəhərlənmə bloggerin sağlamlığında çox ağır nəticələr qoya bilər. Blogger hətta öz işini davam etdirməyə də bilər”, - Bizil bildirib.

Bu üzücü xəbər rusiyalı müxaliflərdə məyusluq doğurub. Bizil istisna etmir ki, Navalnı siyasətə qayıtmaya bilər.

Beləliklə, onu zəhərləyənlər arzusuna çatmış sayılır. Tərəfdarları hesab edir ki, zəhərləyiblər. Hətta Navalnı ondan əvvəl ciddi nəzarət altında olub.

“Moskovskiy komsomolets” qəzetinin məlumatına əsasən, Sibirə səfərdən sonra təyyarədə özünü piss edən Navalnı Federal Təhlükəsizlik Xidmətinin (FTB) zabitləri, onun hərəkət marşrutu isə kameralar tərəfindən izlənilib.

Navalnı Omsk şəhərindən evakuasiya olunmazdan əvvəl süni komaya salınıb. Onun Berlində müalicə olunduğu “Şarite” klinikasından hələlik məlumat verilməyib.

“Moskovskiy komsomolets” qəzeti xusisi xidmət orqanlarındakı mənbələrə istinadən Navalnının marşrutu, komandasının otellərdə tutduğu nömrələrin sayı və Navalnının onun üçün rezerv edilmiş otaqda gecələmək istəmədiyinə qədər təfərrüatlar haqda detallı məlumat verib.

Qəzetin bildirdiyinə görə, kirayə edilmiş mənzillərdən birinin ünvanı polis nəzarəti nəticəsində Navalnı tərəfdarlarından birinin suşi sifariş etdiyi zaman aşkar edilib.

Rusiya siyasətində güclü müxalif liderlər tez-tez yetişmir. Son illərdə Nemtsovun yoxluğunda Navalnı populyar fiqur idi.

Rusiyalı fəal və “Mediazona”nın qurucusu Pyotr Verzilov bütün bunların 2 il əvvəl özünün zəhərləndiyi halı xatırlatdığını deyib.

O da Almaniyada müalicə olunub. Alman həkimlər Verzilovu zəhərləmək üçün hiostindən istifadə olunduğunu güman ediblər.

Digər bir müxalif siyasətçi Vladimir Kara-Murza da özünə aid 2 digər cəhdi xatırladıb. İlk dəfə 2015-ci ilin mayında, müxalif siyasətçi Boris Nemtsov Kremlin divarlarından bir neçə yüz metr aralıda öldürüldükdən bir qədər sonra.

Ölümündən əvvəl o və Kara-Murza “Maqnitski Qanunu”, insan haqlarının pozulmasına görə Putinin adamlarına sanksiya tətbiq edilməsini hədəfləyən qanun layihəsini dəstəkləyiblər.

Kara-Murza sağ qalıb, ancaq həkimlər onun qanında toksin tapmayıb və anti-depresan maddələri həddindən artıq qəbul etdiyini iddia ediblər. Qanından, saçından və dırnaqlarından nümunələr Fransaya göndərilib, burada mütəxəssislər yüksək metal konsentrasiyasını tapıblar.

İkinci cəhd 2017-ci ildə reallaşıb. Kara-Murzanın sağlamlığı qəfil pisləşib və yenə də qanında toksin tapılmayıb. Bütün bu hallar məşhur jurnalist Anna Politkovskayanın zəhərlənməsinə oxşayır.

İstanbulda yaşayan azərbaycanlı politoloq Ramiyə Məmmədova “Yeni Müsavat”a Navalnıya görə Putini nələrin gözlədiyini açıqladı.

Onun fikrincə, müxalifət liderinin tərəfdarları Moskvada etiraz aksiyalarına başlaya bilər, amma bu, Putin hakimiyyətinin sonunu gətirməyəcək.

“Xabarovskdakı etirazlar Putin üçün yeni bir imtahandır. O, bu dəfə gözləmədiyi reaksiya ilə qarşılaşıb. Rusiyanın Uzaq Şərqində qubernator Sergey Furqalın həbsiylə bağlı yaranmış həmin gərginlik Navalnı hadisəsindən sonra alovlana, böyük şəhərləri və Moskvanı əhatə edə bilər.

Xüsusən yeni nəsil hazırkı hakimiyyətdən çox narazıdır. Amma lokal aksiyalardan o tərəfə keçəcəyəni güman etmirəm", - deyə analitik vurğuladı.

Ekspertin sözlərinə görə, Navalnı Nemtsovdan fərqli olaraq Qərbin kadrı deyil: “İşləri korlayan reallıq onun rus millətçisi olmasıdır. Yəni Navalnı nə demokrat, nə liberal ideyaların təbliğatçısı deyil.

Bu baxımdan Avropada Navalnı personasına perspektiv kimi baxmırlar. Sadəcə, Putinin opponenti olan və məmurların korrupsiya əməllərini ifşa edən bir siyasətçi zəhərləndiyi üçün Almaniya ona qucaq açıb.

Nemtsov isə liberal idi, hətta ona metroseksual siyasətçi, qızların sevimlisi kimi baxırdılar. Navalnı isə sağçıdır, Putini sərt tənqid etsə də, amerikanpərəst siyasətçi saymaq olmaz.

Bu mənada onun zəhərlənməsi faktından ölkədə böyük səs-küy qoparacağı, xalq kütlələrinin etirazlara qalxması ilə nəticələnəcəyi gözlənilən deyil. Üstəlik, ölməyib və Putin hökuməti də onun sağalmasını arzulayır".

GundemXeber.Az