15:30 

“Hazırda əsas hücum hədəflərindən biri olan Ukraynanın Nikolayev vilayətində 14 min azərbaycanlı yaşayır”. Bunu Ukrayna Azərbaycanlıları Radasının Nikolayev vilayəti üzrə baş katibi Adil Babayev bildirib. Onun sözlərinə görə, Nikolayevdəki azərbaycanlı tələbələrin evakuasiyasına da başlanılıb: "Dünən 21 nəfər avtobusla yola salınıb, Rumıniyadan təyyarə ilə Azərbaycana yola salınacaqlar. Bu gün Azərbaycan vətəndaşlarının təxliyəsi üçün ayrılmış və Kiyevdən yola düşmüş qatarla da 16 tələbə yola salınacaq”.

A.Babayev onu da deyib ki, Xersona nəzarəti təmin edən Rusiya Ordusunun bölmələrinin dünən Nikolayev şəhərinə hücum cəhdi nəticəsiz qalıb: “Bu gün səhər saatlarında Qara dənizdən qanadlı raketlərlə Nikolayevdəki hərbi aerodroma zərbə endirdilər. Daha sonra isə Balovna və Kalinovka kəndlərinə desant çıxardılar. Desant hücumunun da qarşısı alındı. Nikolayev şəhəri 3 gündür müdafiə olunur. Azərbaycanlılar da şəhərin müdafiəsində fəal iştirak edirlər”.

A.Babayev qeyd edib ki, hazırda şəhərdə supermarketlər, mağazalar bağlıdır: “Azərbaycanlılar evlərindən ərzaq, yemək gətirərək şəhər müdafiəçilərinin bu sahədə təminatında da fəal iştirak edirlər”.

***

12:35

“Bu gün də Xarkovdan azərbaycanlıların təxliyəsi həyata keçiriləcək”. Bunu Ukrayna-Azərbaycan Dostluq Cəmiyyətinin sədri Murad Ömərov deyib. O bildirib ki, dünən çoxu tələbələr olmaqla, 650 nəfər soydaşımız təxliyə olunub: “Artıq 2 gündür Xarkov bombardman edilir. Azərbaycanlılar da kütləvi surətdə Xarkovu tərk etməyə başlayıb. Onların müəyyən hissəsi Azərbaycana, Ukrayna vətəndaşı olan azərbaycanlılar isə Ukraynanın nisbətən daha təhlükəsiz olan regionlarına gedirlər. Bu gün artıq səhər saat 7.00-da bir qatar Lvova yola düşüb. Vağzala gələn qatarda insanlar üst-üstə minməyə çalışır, vəziyyət həddən artıq çətindir. Bu gün günorta saatlarında daha bir qatar da Xarkovdan yola düşəcək”.

M.Ömərov diqqətə çatdırıb ki, bombardman bu şəkildə davam edərsə, burada yaşamaq çox çətinləşəcək: “Dünən səhər saat 8-də Xarkovun mərkəzində yerləşən Administrasiyanın binası bombalandı, 10 nəfər adam orada həlak oldu, 35 nəfər yaralandı. Günorta saatlarında Xarkov Aviasiya Zavodu bombalandı. Qırıcı təyyarələr Xarkova bombalar tökürlər. Bu bombalar partlayanda bombanın təsirindən bütün şəhər silkələnir, elə bil atom bombası partlayır. Şəhərdə bir çox binaları partladıblar. Gecə sakit olsa da, səhərdən yenə şəhər bombardman edilir, artilleriya atəşinə tutulur. Şəhərin 3 rayonunda qaz, işıq, su verilmir. Şəhər meriyası bu işdə çox böyük əziyyət çəkir. Çünki hava soyuqdur, onlar gecə-gündüz çalışırlar ki, şəhərə qaz, su, işıq verilişi dayanmasın”. 

M.Ömərov qeyd edib ki, ölən və xəsarət alanlar arasında azərbaycanlıların olub-olmamasını dəqiqləşdirmək artıq çox çətindir. (APA)

Qeyd edək ki, bu gün səhər Ukraynadakı vəziyyətlə bağlı təxliyə olunmuş daha 168 Azərbaycan vətəndaşı Bakıya gətirilib. Üçüncü çarter reysi bu gün saat 9:20 radələrində Heydər Əliyev Beynəlxalq Hava Limanına eniş edib. Təxliyə olunanların əksəriyyəti qadın və uşaqlardır. Ümumilikdə Ukraynadan Azərbaycana 510 nəfər təxliyə olunub.

Daha yüz nəfərdən çox Azərbaycan vətəndaşı Odessadan Moldova sərhədinə yola salınıb. Diasporla İş üzrə Dövlət Komitəsinin mətbuat xidmətindən bildirilib ki, bu müddətdə soydaşlarımız Odessadakı Azərbaycan Evində saxlanılıb, onların bütün ehtiyacları qarşılanıb. Ukrayna-Moldova sərhədində onlar Azərbaycanın müvafiq dövlət orqanlarının nümayəndələri tərəfindən qarşılanacaq və uyğun şərait yaranan kimi Bakıya təxliyə olunacaqlar.

Azərbaycanın Moldovadakı səfiri Qüdsi Osmanov isə yerli KİV-lərə bildirib ki, ümumilikdə bu gün Moldovadan daha 700-ə yaxın azərbaycanlının təxliyə ediləcək. Hazırda Moldovada Ukraynadan təxliyə olunan azərbaycanlıların sayı 4 minə çatır. Təxliyə avtobuslarla olacaq. Hər avtobus 70 nəfər sərnişin daşıyacaq. Bundan başqa 174 nəfər təyyarə ilə Rumıniyadan ölkəmizə təxliyə ediləcək. Bir çox vətəndaşımıza isə şəxsi avtomobilləri ilə təxliyə olunmaları üçün şərait yaradılıb. Qüdsi Osmanovun sözlərinə görə, əvvəlki günlər avtobusla təxliyə edilən azərbaycanlılar artıq İstanbula çatıblar.

10:57

"Xarkov Ukraynada ən çox bombalanan şəhərdir. Rusiya ordusu neçə gündür şəhəri fasiləsiz atəşə tutur. Dövlət əhəmiyyətli binalarla yanaşı, bir neçə yaşayış binası da dağıdılıb". Bunu Xarkov vilayəti Azərbaycan-Ukrayna Dostluq Cəmiyyətinin sədri Murad Ömərov deyib. 

O bildirib ki, martın 1-nə qədər Xarkovdan çıxarılanlar əsasən tələbələr idisə, hazırda Ukrayna vətəndaşı olan azərbaycanlıların da təxliyəsi aparılır: “Ötən gün axşama kimi artıq 650 nəfər həmvətənimiz təxliyə olunub. Bu gün səhər saat 7-də birinci qatar yola düşüb, yarım saat sonra isə ikinci qatar ya Lvova, ya da Moldova sərhədinə gedəcək. Gün ərzində təxliyə olunacaqların sayını dəqiq demək mümkün deyil, amma təxminən 150 nəfərin Xarkovdan çıxarılacağı gözlənilir. Çünki həm qatarlar xaotik hərəkət edir, həm də insanlar vağzallara gəlməkdə çətinlik çəkir. Nəzərə alsaq ki, günorta 15:00-dan artıq şəhərdə komendant saatı başlayır”.

M.Ömərov qeyd edib ki, hazırda vağzal insanlarla doludur. Şəhərdən təxliyə olanları səfirlik əməkdaşları qarşılayır, onların yerləşdirilməsinə və ölkəyə yola salınmasına yardım edir. 

Gundemxeber.Az