ABŞ-da Türkiyə əleyhinə olan qruplar “F-16” qırıcılarının Ankaraya satışının qarşısını almaq üçün #NoJetsForTurkey (“Türkiyəyə təyyarə yoxdur”) adlı kampaniyaya başlayıb.

Kampaniyanın təşkilatçısı erməni və yunan diasporuna bağlı təşkilatlardır.

Kampaniya ABŞ-da hər kəsin birbaşa senatorlara müraciət edə biləcəyi petisiya şəklində təşkil edilib.

Anti-Türkiyə kampaniyasına dəstək verən qruplar arasında Yunan-Amerika Şurası, Amerika Erməniləri Milli Komitəsi (ANCA), Kipr üçün Ədalət Beynəlxalq Koordinasiya Komitəsi (PSEKA), Kaliforniya Amerika Yunan Şurası, Hindu Amerika Fondu kimi təşkilatlar var.

ABŞ Dövlət Departamenti aprelin 16-da Co Bayden administrasiyasının Türkiyəyə “F-16” döyüş təyyarələri satması ilə bağlı Konqresə məktub göndərib.

Məktubda “F-16”ların Türkiyəyə potensial satışının ABŞ-ın milli təhlükəsizlik maraqlarına uyğun olacağı və eyni zamanda NATO-nun uzunmüddətli birliyinə xidmət edəcəyi bildirilib./Teleqraf.com