Kiyev ətrafı və Ukraynanın şimalında uğur qazana bilməyən Rusiya bu dəfə diqqətini şərqə, Donbasa yönəldib.

Məlumatlara görə dünən gecə saatlarından başlayaraq Rusiya ordusu Donbass istiqamətində genişmiqyaslı hərbi əməliyyatlara start verib. Qərb, xüsusən də Böyük Britaniya kəşfiyyatı bir müddət idi ki, Moskvanın məhz Donbass istiqamətində aktivləşəcəyini bəyan edirdi. Burada Rusiyanın başlıca məqsədi Donbası tamamilə "azad”etməkdən ibarətdir. Görünən odur ki, Putin müharibənin ilk mərhələsindəki uğursuzluğu Donbasla kompensasiya etmək niyyətindədir.

Qeyd edək ki, fevralın 24-dən başladıqları müharibə fonunda rus ordusu ancaq müəyyən qədər məhz Donbasın da daxil olduğu şərq istiqamətində irəliləməyə nail olub, onlar burada bir sıra kiçik yaşayış məntəqələrini zəbt ediblər. Mariupol ətrafında halqa daralsa da, Ukrayna ordusu hələ də müqavimət göstərməkdədir. Donbass istiqamətində başlanan yeni geniş miqyaslı döyüşlərə gəldikdə, Ukraynanın burada da hücum edənlərə ciddi müqavimət göstərəcəyi gözlənilir. Yəni Moskva burada da Ukraynanın şimalında olduğu kimi ciddi müqavimətlə üz-üzə qalacaq və ona yeni əraziləri tutmaq heç də asan başa gəlməyəcək. Gözlənililir ki, bu fonda Qərbin Ukraynaya hərbi və siyasi dəstəyi daha da artsın. Amma bütün hallarda, Donbass bölgəsində rus əhalisinin çoxluq təşkil etməsini nəzərə alsaq, Moskvanın bu amildən istifadə edərək müəyyən uğurlar əldə edəcəyi də istisna edilməməlidir.

Belə ki, bölgənin rus sakinlərinin fürsət yaranan kimi Moskvanın qucağına atılacaqlarını da güman etmək olar. Digər tərəfdən, rus komandanlığı müharibənin əvvəlində yol verdiyi taktiki səhvlərdən nəticə çıxararaq, ola bilsin bu dəfə prosesə daha peşəkarcasına yanaşsın. Bu isə müharibənin hazırkı mərhələsinin Ukrayna üçün daha çətin keçəcəyindən xəbər verir. Hər halda, müharibənin belə tezliklə başa çatacağı gözlənilmir. Rus ordusu Donbasda irəliləsə də, yenə də bu niyyətinə heç də asan çatmayacaq. Hətta Rusiyanın Donbası tamamilə nəzarəti altına alması belə ukraynalıların müqavimətinin qırılması, dayandırılması anlamına gəlməyəcək. Qərbin dəstəyini alan ukraynalılar bundan sonra Donbasda partizan müharibələrinə başlaya bilər. Ukraynalıların partizan hərəkatında böyük təcrübəyə malik olduqlarını nəzərə alsaq, yaranmış vəziyyət hələ uzun illər Kremlə baş ağrısı verməkdə davam edəcək.

GundemXeber.Az