Partiya “Göyçə-Zəngəzur Respublikası”nın yaradılmasını da qətiyyətlə pisləyib

Dünən ADP İdarə Heyətinin ölkə və beynəlxalq aləmdə baş verən ictimai-siyasi vəziyyətə dair növbəti toplantısı keçirilib. Partiyanın mətbuat xidmətindən “Hürriyyət”ə verilən məlumata əsasən, toplantı iştirakçıları ilk növbədə Rusiyanın Ukraynaya qarşı başlatdığı hərbi təcavüzün, beynəlxalq təzyiqlərə baxmayaraq daha amansız formada davam etməsindən, hərbi əməliyyat adı ilə davam edən bu hərbi müdaxilənin qismən səfərbərlik elan edilməsi ilə daha geniş miqyas almasından, Ukraynanın bir sıra ərazilərində qeyri-qanuni olaraq referendum keçirməklə ilhaq siyasətini reallaşdırmaq cəhdlərindən ciddi narahat olduğunu bildirib.

Referendum məsələsinə diqqət çəkən partiya yetkililəri bu aktın beynəlxalq hüququn prinsip və normalarına zidd olduğunu, müstəqil bir ölkənin suveren hüquqlarına, ərazi bütövlüyünə qarşı yönəldiyini, separatizmin alovlanmasına xidmət etdiyini qeyd edib və dünya güclərini Rusiyanın bu avantürist, hüquqa, insani dəyərlərə zidd addımının qarşısını almaq üçün daha təsirli, daha effektli addımlar atmağa, Rusiyanı beynəlxalq müqavilələrlə üzərinə götürdüyü öhdəlikləri yerinə yetirməyə məcbur etməyə çağırıb.

Rusiyada yaşayan azərbaycanlıların da bu səfərbərliyə zorən cəlb edilməsi məsələsinə toxunan rəsmilər bu tədbirlərin, Azərbaycan vətəndaşlığından çıxmayan soydaşlarımız üçün keçərli olmadığını qeyd edib. Hələ bir il öncə Rusiyada yaşayan soydaşlarımıza qeyd-şərtsiz Rusiya vətəndaşlığı verilməsinin sadələşdirilməsi ilə bağlı rəsmi çağırışlarının arxasında məhz bu günkü səfərbərlikdə onların iştirakını təmin etmək məqsədinin durduğuna diqqət çəkən İdarə Heyəti bu faktı indi aparılan hərbi müdaxilənin tərkib hissəsi kimi dəyərləndirib və soydaşlarımızı Ukrayanaya qarşı müharibədə yer almamağa səsləyib.

İdarə Heyəti son günlər bir qrup avantürist tərəfindən “Göyçə-Zəngəzur Türk Respublikası”nın yaradılmasını elan etməsini qətiyyətlə pisləyib, bu addımın Azərbaycanın milli maraqlarına xidmət etmədiyini, bütöv Azərbaycan ruhuna zidd olduğunu, ölkəmizin beynəlxalq aləmdəki imicinə zərbə olduğunu bildirib və hakimiyyəti reallıqdan uzaq, millətimizi avantüraya sürükləyən bu şəxslər barədə lazımı tədbirlər görməyə çağırıb.

İdarə Heyəti İranda baş verən son hadisələrdən, rejiminin, öz haqları uğrunda mübarizəyə qalxan dinc vətəndaşlara qarşı tətbiq etdiyi zorakılıqlardan, gənc bir qızın rejim cəlladlarının qurbanına çevrilməsindən sonra hakimiyyət qüvvələri ilə geniş əhali kütləsi arasında qarşıdurmaların daha geniş vüsət almasından ciddi narahat olduğunu bildirib və bu faktın arxasında İrandakı teokratk rejimin orada yaşayan xalqlara qarşı etnik ayrı seçkilik siyasətinin, zəngün bir ölkə vətəndaşlarının yaşayış səviyyəsinə görə ən miskin durumda qalması, milli kimliklərinin iqnor edilməsi, sosial-iqtisadi vəziyyətinin günü-gündən acınacaqlı hala düşməsi, insan hüquq və azadlıqlarının ən kobud formada pozulması, qadın azadlığının iyrənc üsullarla boğulması faktının durduğunu qeyd edib və İran yetkililərini insan haqlarına qarşı sayqı göstərməyə, hər cür zorakılığa son qoymağa çağırıb. İdarə Heyəti eyni zamanda hakimiyyəti hadisələrin məcradan çıxdığı, soydaşlarımıza qarşı fars rejimi tərəfindən hər hansı etnik zəmində təzyiqlər göstərildiyi halda onların hüquqlarını müdafiə etməyə, milyonlarla türk soydaşımızın haqq səsinə səs verməyə, onlara həyan olmağa çağırıb.

İdarə Heyəti son vaxtlar Ermənistanın siyasi orientasiyasında Qərbə meylliyin artması, əhalinin anti-Rusiya mövqe sərgiləməsi fonunda Azərbaycanda bu keçici vəziyyəti əsas gətirərək bəzi qüvvələrin Rusiya ilə daha da yaxınlaşmaya, Qərbdən üz döndərməyə üstünlük verməsi, dünyadan təcrid olunmuş Rusiya ilə hərtərəfli ilişkilər qurulması üçün canfəşanlıq etməsindən narahat olduğunu bildirib və xalqımızı bu ruspərəst qüvvərə qarşı ayıq-sayıq olmağa, öz gələcəyini iqtisadi, siyasi baxımdan geri qalan, daim tarixi, mədəni varlığımız üçün təhlükə mənbəyi olan Putin Rusiyası ilə deyil, sivil Qərb dünyası ilə birgə qurmağa çağırıb.

İdarə Heyəti son zamanlar ölkədə gündəlik tələbat mallarının qiymətlərinin durmadan artması məsələsinə də münasibət bildirib. İdarə Heyəti baş verənlərin heç bir iqtisadi əsaslarının olmadığını, bu halın əhalinin aztəminatlı təbəqəsinin var-yoxdan çıxmasına gətirib çıxmasına xidmət etdiyini qeyd edərək, hakimiyyəti ölkədə süni qiymət artımının qarşısının alınması istiqamətində təxirəsalınmaz tədbirlər görməyə çağırıb.

Gundemxeber.az