Bu mübarizədə prezident İslam Kərimovun iki qızı və Milli Təhlükəsizlik Xidmətinin şefi Rüstəm İnoyatovun iştirak etdiyi bildirilir
Son günlər Özbəkistanda baş verən olaylar az qala bütün dünyanın diqqət mərkəzindədir. Belə ki, bu ölkənin siyasət məkanı kifayət qədər ciddi qalmaqallara səhnə olmaqdadır. Ən əsasısa, bütün bu qalmaqalların mərkəzində məhz Özbəkistanın hakim ailəsi yer almaqdadır. Hakim ailə daxilində kifayət qədər ciddi ziddiyyətlərin mövcud olduğu artıq inkaredilməz reallıqdır. Və bu ziddiyyətlər nəzarətdən çıxdığından qalmaqallar artıq nəinki ailədaxili “qırmızı cizgilər”i keçib, hətta Özbəkistan sərhədlərini belə, aşaraq bütün dünyaya yayılıb.

Əsas qalmaqalların Özbəkistan prezidenti İslam Kərimovun böyük qızı Gülnarə Kərimovanın ətrafında cərəyan etdiyi müşahidə edilir. Üstəlik Gülnarə Kərimovanın öz davranışları və açıqlamaları ilə belə bir vəziyyətin yaranmasına stimul verdiyi də diqqətdən yayınmır. Belə ki, prezidentin qızı hücum edə biləcəyi hər kəsi hədəfə almaqdan qətiyyən çəkinmir. Atası İslam Kərimovu ölkəni doğru idarə etməməkdə, anası Tatyana Kərimovanı cadugərliklə məşğul olmaqda, Özbəkistanın siyasi elitasını və xüsusi xidmət servislərinin rəhbərlərini konkret faktlarla korrupsiyada, rüşvətxorluqda, eyş-işrətə qurşanmaqda və s. qanun pozuntularında suçlayır.

Gülnarə Kərimovanın əsas hədəflərindən biri də onun 12 ildir ki, küsülü olduğu bacısı Lalə Kərimovadır. O, öz kiçik bacısını atasının hakimiyyətini ələ keçirtməyə can atmaqda ittiham edir. Hakim ailənin qızları arasındakı uçurum İslam Kərimovun kiçik qızı Lalənin BBC-yə verdiyi müsahibədən sonra daha da dərinləşib. Və vaxtilə atasının sağ qolu sayılan Gülnarə Kərimova öz “İnstagram” səhifəsində bacısı Laləni cadu ilə atasının hakimiyyətini dağıtmağa çalışdığını yazmışdı: “Ailənin bir hissəsi xidmət edərkən, cadugərlərlə dost olan digər bölümü ona zərər verir”. Böyük bacısı Laləni öz bank hesablarına külli miqdarda pul yerləşdirməkdə və qiymətli dini əsərlərə zərər verməkdə suçlayır.

Bacısı Gülnarənin əksinə olaraq, daha sadə həyat sürən Lalə Kərimova-Tillayevanın ötən ay BBC-nin özbək bürosuna verdiyi müsahibədən sonra bacılar arasındakı 12 illik küsülülük ortaya çıxmışdı. Həyat yoldaşı və üç uşağı ilə Cenevrədə yaşayan Lalə ailə toplantılarına belə getmədiyini, bacısı Gülnarənin isə atasının varisi olma ehtimalının az olduğunu söyləmişdi. Atası ilə ancaq ildə 3 dəfə görüşdüyünü vurğulayan Lalə uşaq əməyinin istismarı və radikal dinçiliyin güclənməsi kimi məsələlərə toxunaraq, atasının iqtidarını bəyənmədiyinə də eyham vurmuşdu.

Ancaq bəzi məlumatlara görə, bacılar arasında baş verənlər, eləcə də Özbəkistanda cərəyan edən son proseslər hakimiyyət uğrunda mübarizənin təzahürləridir. Əsas səbəb isə Özbəkistan prezidenti İslam Kərimovun həm qocalması, həm də onun xəstəliyinin qarşısıalınmaz xarakter alması ilə izah olunur. İddia edilir ki, prezident İ.Kərimovun sağlıq durumunun ümidsizliyi hakimiyyət uğrunda mübarizəni intensivləşdirir. Bir tərəfdən prezidentin qızları hakimiyyəti ələ keçirtməyə çalışırlar. Böyük bacı son vaxtlara qədər İ.Kərimovun siyasi varisi kimi qəbul edilirdi. Bununla barışmayan kiçik bacı da hücuma keçərək Gülnarə Kərimovanın Özbəkistanı idarə etməyə layiq olmadığını bir sıra faktlarla – onun mafioz şəbəkə yaratmaq, futbol ulduzu Kristiano Ronaldu da daxil olmaqla, dünyanın bir sıra tanınmış şəxsləri ilə eşq məcarası yaşaması, dövlət vəsaitlərini ələ keçirməsi ilə bağlı ittihamlarla sübuta yetirməyə çalışır. Və bəzi məlumatlara görə, bütün bunları etməkdə Lalə Kərimovanın əsas məqsədi hakimiyyətə sahiblənmək məsələsində böyük bacısını qabaqlamaqdır.

Ancaq Özbəkistanda hakimiyyət uğrunda mübarizənin iştirakçılarının sırası yalnız bu iki şıltaq və idarəedilməz bacılarla məhdudlaşmır. Bu mübarizənin iştirakçıları sırasında onların kifayət qədər güclü bir rəqibləri də var. Belə ki, Özbəkistan Milli Təhlükəsizlik Xidmətinin (MTX) rəhbəri Rüstəm İnoyatov da bu amansız mübarizənin içərisində hesab olunur. Hesab edilir ki, MTX-nin rəhbəri prezidentin xəstəliyini və onun qızları arasındakı bu çəkişməni özünün hakimiyyətə sahiblənə bilməsi üçün real fürsət kimi dəyərləndirir. Bütün bunlardan xəbərdar olan Gülnarə Kərimova bir müddət öncə hətta MTX-nin rəhbərini fürsətcillikdə və hakimiyyəti ələ keçirtmək niyyətində suçlamışdı. Gülnarə Kərimova birdimdi ki, MTX-nin rəhbəri onun xalq arasında populyar olmasından qorxur. Və bu səbəbdən də, ona qarşı “müharibə”yə başlayıb.

Əslində Gülnarə Kərimovun bu iddiaları tam əsassız da deyil. Belə ki, bəzi məlumatlara görə, MTX rəhbəri Rüstəm İnoyatov prezident İ.Kərimovla onun böyük qızının arasında münasibətləri korlaya bilib. Hazırda prezidentin qızına qarşı qəzəbli olduğu bildirilir. Bu səbəbdən də, İ.Kərimov MTX-nin Gülnarə Kərimova üzərində yaratdığı gərgin situsiyaya reaksiyasız qalmaqdadır. Yəni ata öz qızını demək olar ki, müdafizə etmir. Nəticədə G.Kərimovaya qarşı təzyiqlər hər ötəh gün daha da intensivləşir və onun həbs edilərək polis idarəsinə aparılması da artıq heç kəsi təəccübləndirmir.

Bütün bunlar onu göstərir ki, Özbəkistanda hakimiyyət uğrunda mübarizə intensivləşib. Hətta savaş o qədər ciddiləşib ki, Gülnarə Kərimova artıq buna tam gətirməkdə çətinlik çəkir. Hər halda, G.Kərimovanın artıq prezidentliyə iddia etmədiyini şəxsən bəyan etməsi onun geri çəkilmək məcburiyyətində qaldığını göstərir. Ancaq buna baxmayaraq, Özbəkistanda hakimiyyət uğrunda mübarizənin qalibinin məlum olmasından danışmaq hələ çox tezdir. Çünki bu Orta Asiya dövlətində hər an istənilən siyasi sürprizlər baş verə bilər.