Şərqi Azərbaycanın Culfa şəhərindən olan azərbaycanlı müəllim və həmkarlar ittifaqı fəalı Əli Hacı İnzibati Ədalət Məhkəməsi tərəfindən bəraət alıb. Əvvəllər ona 6 ay müddətinə işdən kənarlaşdırılma cəzası verilmişdi.

Əli Hacının sosial media hesabında yayımladığı məhkəmə hökmünə əsasən, İnzibati Ədalət Məhkəməsinin 25 saylı apellyasiya şöbəsi Təhsil İdarəsinin əvvəlki qərarını ləğv edərək ona bəraət verib.
Əvvəlki qərara əsasən, o, 6 ay müddətinə tədris fəaliyyətindən uzaqlaşdırılmış və bu qərar Təhsil Nazirliyinin apellyasiya şurası tərəfindən də təsdiq olunmuşdu. Lakin son məhkəmə qərarı ilə Əli Hacı yeni dərs ilindən yenidən müəllim kimi fəaliyyət göstərə biləcək.
Müəllimə qarşı bu cəza 2022-ci ildə İranda baş verən kütləvi etirazlara dəstək nümayiş etdirməsi və sosial media hesablarında hökumətin repressiya siyasətini tənqid etməsi səbəbilə verilmişdi. Nəticədə onun məktəblə əlaqəsi kəsilmiş və əmək haqqı dayandırılmışdı.
25 illik təcrübəyə malik Əli Hacı uzun illərdir müəllimlərin hüquqlarını müdafiə etdiyi və hökuməti tənqid etdiyi üçün təzyiqlərə məruz qalıb.
İranda ictimai və siyasi fəallar sosial mediada hökuməti tənqid etdiklərinə görə davamlı təzyiqlərlə üzləşirlər. Bundan əvvəl Urmiyədə yaşayan azərbaycanlı müəllim Kərim Bostançı da sosial media hesablarında hökuməti tənqid edən məzmunlu yazılar dərc etdiyinə görə müxtəlif ittihamlarla mühakimə olunub və 3 aylıq həbs cəzasına məhkum edilmişdi.
Hökumət adətən bu fəallara qarşı müxtəlif ittihamlarla məhkəmə işləri qaldıraraq onların ifadə azadlığını ciddi şəkildə məhdudlaşdırır. Bu vəziyyət ölkədə söz azadlığının pozulmasını və vətəndaş cəmiyyətinə qarşı genişmiqyaslı təzyiqləri ortaya qoyur.