“Korrupsiya və rüşvət dosyesində yer alan layihələr onun razılığı ilə həyata keçirilib…”

Ətraf mühit və şəhərsalma naziri vəzifəsindən istefa verən Ərdoğan Bayraktar millət vəkilliyindən də istefa verib. Bayraktar NTV-yə açıqlamasında baş nazir Rəcəb Tayyib Ərdoğanı da istefa verməyə çağırıb.

Bayraktarın açıqlaması belədir: “İcazənizlə mətbuat üçün qısa açıqlama vermək istəyirəm. Dekabrın 17-də həyata keçirilən əməliyyat dosyesində şəxsimi məyus edəcək və ya izahını verə bilməyəcəyim heç bir məqam yoxdur. Lakin hörmətli baş nazirin istədiyi nazirlə çalışmaq və istədiyini vəzifədən almaq kimi təbii haqqı, səlahiyyəti var.

Bununla belə rüşvət və korrupsiya ifadələrinin yer aldığı əməliyyat səbəbiylə istefa verin və ya məni rahatladacaq bəyanatla çıxış edin şəklində şəxsimə təzyiq göstərilməsini qəbul etmirəm. Qəbul etmirəm ona görə ki, araşdırma dosyesində yer alan və təsdiqlənən inşaat layihələrinin böyük bir qismi baş nazirin razılığı ilə həyata keçirilib.

Bu milləti və vətəni rahatlatmaq üçün hörmətli baş nazirin də istefa verməsinə inandığımı ifadə edir, uca millətimə hörmətlərimi bildirirəm”.

* * *15:34

Türkiyənin İnşaat və ekologiya naziri Ərdoğan Bayraktar vəzifəsindən istefa verib.

Virtualaz.org xəbər verir ki, oğlu rüşvət və korrupsiya faktına görə həbs olunan nazir bu dəqiqələrdə millət vəkilliyindən və nazirlikdən istefa verib.

* * * 13:15

Türkiyə hökumətinin adı rüşvət qalmaqalında keçən daha iki nazirinin gün ərzində istefa verməsi gözlənilir.

Virtualaz.org Türkiyə KİV-lərinə istinadən xəbər verir ki, daxili işlər naziri Muammer Gülər və iqtisadiyyat naziri Zəfər Çağlayanın istefasından sonar nəzərlər ətraf mühit və şəhərsalma naziri Ərdoğan Baytarktara və Avropa işləri üzrə nazir Egemen Bağışa yönəlib.

Ətraf mühit və şəhərsalma nazirinə yaxın qaynaqlar Ərdoğan Bayraktarın da istefaya çox yaxın olduğunu, onun qərarını yaxın bir saatda açıqlamasının gözlənildiyini deyiblər. Ərdoğan Bayraktarın oğlu dekabrın 17-də həbs olunanların arasında olub, ancaq iki gün sonra məhkəmə onu istintaqın davam etməsi şərti ilə azadlığa buraxıb. Nazir isə oğlunun təmiz olduğunu və rüşvət almadığını açıqlayıb.

Egemen Bağışın adı isə rüşvət qalmaqalında İran əsilli azərbaycanlı iş adamı Rza Zərrabdan milyonlarla dollar rüşvət almaqda keçir. İstanbul polisinin həyata keçirdiyi izləmə zamanı Rza Zərrabın adamlarının Egemen Bağışa rüşvət verdiyinə dair dəlillər əldə edilib.

Nazirin rüşvət aldığına dair telefon danışıqlarının və görüntülərin olduğu bildirilir. Gözlənilir ki, Egemen Bağış da istefa verəcək.

İstefalar baş nazir Ərdoğanın Pakistana səfərdən qayıdandan sonar dekabrın - 24-də axşam nazirlərlə keçirdiyi qapalı görüşün nəticəsi olaraq başlayıb.

Bununla belə Ərdoğan toplantıdan əvvəl adı rüşvət qalmaqalında keçən nazirlərini yanına alaraq onlarla əl-ələ vermişdi və şəkil çəkdirmişdi. Siyasi kuluarlarda dolaşan məlumatlara görə, Ərdoğan nazirlərin istefa verməsinə əvvəlcə qarşı olub. Adı rüşvətdə keçən nazirləri kabinetdə dəyişikliklər çərçivəsində işdən uzaqlaşdırmağı planlaşdırıb.

Lakin prezident Abdulla Gül Ərdoğanla uzun-uzadı söhbətində onu nazirlərin öz ərizələri ilə istefaya getməsinin ictimai rəydə AKP-yə dəyən zərbəni azaltmaq baxımından ən doğru yol olduğuna inandıra bilib.

Bu arada Ərdoğan Pakistandan dönərkən jurnalistlərə açıqlamasında 17 dekabr həbslərinə sanksiya verən, vaxtilə “Ergenekon” adı altında yüzlərlə generalı, ziyalını, jurnalisti həbsə atdıran, Fətullah Gülənə bağlı prokuror Zəkəriyyə Özü nəzərdə tutaraq deyib: “Bu adamın bizdən tələbləri oldu. “Ergenekon”la mübarizədəki səylərinə görə iki dəfə vəzifəsini yüksəltdik. Lakin məmnun qalmadı. Bölgəyi istədi, vermədik. O zaman “görərsiniz” deyir”.

Türkiyə baş nazirinin bu açıqlaması ölkənin hüquq sisteminin hansı vəziyyətdə olduğunu, prokurorların qanun əsasında deyil, təriqət liderlərinin və ya hökumət başçısının verdiyi göstərişlərlə hərəkət etdiyini, habelə Ərdoğanın özünün “mafiyalara və terrorçulara qarşı mübarizə” kimi təqdim etdiyi “Ergenekon” həbslərinin siyasi xarakterli olmaqla Silahlı Qüvvələri sıradan çıxarmağa yönəldiyini bir daha təsdiqləyir.