HƏMAS Qəzza ilə bağlı danışıqların yekun mərhələyə çatdığını təsdiqləyib.

Bu barədə hərəkatın rəsmi "Telegram" kanalında dərc edilmiş sənəddə qeyd olunur.

Onlar Qətər paytaxtındakı məsləhətləşmələrin gedişindən razı qaldıqlarını vurğulayıblar.

"Hərəkatın rəhbərliyi atəşkəs və əsirlərin mübadiləsi ilə bağlı danışıqların davam etdirilməsini zəruri hesab edir, danışıqlar yekun mərhələyə çatıb, ümid edirik ki, hərtərəfli, aydın razılaşmanın imzalanması ilə başa çatacaq", - deyə məlumatda əlavə edilib.

Yeri gəlmişkən, Misirin "Əl-Qahirə əl-İxbariyyə" telekanalı mənbələrinə istinadən bildirib ki, Dohadakı hazırkı raundun başa çatmasından sonra tərəflər Qahirədə də bir neçə görüş keçirəcəklər.

10:50

İsrail Qəzza ilə bağlı razılaşma çərçivəsində 2024-cü ilin oktyabrında Fələstin anklavı ərazisində İsrail hərbçiləri tərəfindən öldürülmüş HƏMAS hərəkatının lideri Yəhya Sinvarın cəsədini qaytarmayacaq.

Bu barədə "Ynet" portalı mənbəyə istinadən məlumat yayıb.

"İsrail baş terrorist Sinvarın cəsədini razılaşma çərçivəsində HƏMAS-a qaytarmayacaq. Bu baş verməyəcək və nöqtə", - mənbədən vurğulanıb.

Bundan əvvəl "Al Hadath" telekanalı HƏMAS-ın İsraildən Yəhya Sinvarın cəsədini qaytarmağı tələb etdiyini bildirmişdi. Onun mənbələrinə görə, radikallar İsrailə aparılmış Sinvarın cəsədini Qəzzada atəşkəs haqqında sazişin birinci mərhələsi çərçivəsində almaq istəyirlər.

Xatırladaq ki, Sinvar oktyabrın 16-da Qəzzanın cənubunda İsrail hərbçiləri tərəfindən öldürülüb.

09:56

İsrail və HƏMAS Qəzza zolağında atəşkəsin dayandırılması ilə bağlı sazişin bağlanmasına yaxındırlar. Sazişin birinci mərhələsində anklavda hərəkat tərəfindən saxlanılan 33 girov azad ediləcək.

Bu barədə "Haaretz" qəzeti məlumat yayıb.

Bildirilir ki, birinci mərhələdə qadınlar, uşaqlar, 55 yaşdan yuxarı kişilər və xəstələr buraxılacaqlar. Mənbələr hesab edirlər ki, onların əksəriyyəti sağdır.

Müzakirə olunan sxemə əsasən, atəşkəsdən 16 gün sonra sazişin ikinci mərhələsinin müzakirəsi başlayacaq və bu mərhələdə qalan girovlar azad ediləcəklər.

Qeyd olunur ki, hələlik İsrailin sazişin birinci mərhələsində neçə fələstinli məhbusu azad edəcəyi barədə məlumat yoxdur. KİV-in məlumatına görə, İsrail tərəfi bu dövrdə təxminən 1 300 məhbusu həbsdən azad etməyə hazırdır.

"The Jerusalem Post" qəzetinin məlumatına görə, sazişin birinci mərhələsi 42 gün davam edəcək. Azad ediləcək fələstinli məhbusların sayı israilli girovların nə qədərinin sağ olmasından asılı olaraq dəyişəcək.

Xatırladaq ki, yanvarın 13-də Qətər İsrail və HƏMAS nümayəndələrinə Qəzza zolağında atəşkəs rejiminin tətbiqi və HƏMAS tərəfindən saxlanılan girovların azad edilməsi ilə bağlı yekun saziş layihəsini təqdim edib. Məlumata görə, Qəzza zolağında atəşkəs rejiminin tətbiqi ilə bağlı danışıqların əlavə raundu yanvarın 14-də səhər Dohada keçiriləcək.

Gundemxeber.az