İnterpress.az-a Tiflisdəki məlumatlı mənbədən daxil olan xəbərə görə, Gürcüstanın ermənilərin kompakt yaşadığı Cavaxetiya bölgəsində erməni separatçıları ilə gürcü polisi arasında silahlı insident baş verib.

Mənbənin xəbərində insidentin Axalkalakiyə yaxın bir yerdə, Axalkələk-Tiflis avtomobil yolunun üstündə yerləşən kafelərdən birində, ərazidə patrulluq edən gürcü polisinin iki əməkdaşı kafedə yeyib-içən bir qrup erməninin hücumuna məruz qalıb.

Bildirilir ki, hadisə sərxoş erməni qrupun gürcülərin ünvanına təhqiramiz ifadələr işlətməsindən sonra baş verib. Sərxoş ermənilərdən biri Cavaxetiyanın tarixi erməni torpağı olduğunu söyləyərək, gürcülərin ünvanına təhqiramiz ifadələr işlədib. Polis əməkdaşalarının xəbərdarlıq etməsinə baxmayaraq ermənilər hündürdən gürcü dilində tostlar deməyə və Gürcüstanın əleyhinə danışmaqda davam ediblər.

Mübahisə qızışdıqdan sonra ermənilər gürcü polislərinə hücum ediblər. Polis əməkdaşları tabel silahlarını çəkərək ermənilərə xəbərdarlıq etsələr də sərxoş erməni separatçılarını sakitləşdirmək mümkün olmayıb.

Kafeni tərk edən polis əməkdaşları maşınlarına yaxınlaşan zaman onların üzərinə avtomat silahdan atəş açılıb. Polislərdən biri ağır yaralanıb.

Mənbə bildirir ki, erməni separatçıları hadisə yerindən qaçıblar. İnsidentin baş verdiyi əraziyə Tiflisdən xüsusi əməliyyat qrupu göndərilib. Kafenin yerləşdiyi ərazidən 22 ədəd boş giliz tapılıb.

Xatırladırıq ki, Cavaxetiya Gürcüstanın Stalin dövrünə qədər Axısqa türklərinin kompakt yaşadığı ərazisi olub. 1937-ci il repressiyaları zamanı Axalkələk, Əspincə, Mesxeti və regionun digər yaşayış məntəqələrindən on minlərlə Axısqa türkü Sibirə və Orta Asiyaya sürgün edildikdən sonra bu torpaqlara İran, Livan, Suriya və digər ölkələrdən kütləvi şəkildə erməni ailələri köçürülüb.

Qeyd edirik ki, hazırda Cavaxetiya Cənubi qafqazın ən partlayışahəssas bölgəsi hesab olunur. Cavaxetiyadan olan yüzlərlə erməni separatçısının nəzarətsiz Dağlıq Qarabağ ərazisində yerləşən erməni terror təşkilatları "ASALA" və "QNÇAK"ın düşərgələrində teror təlimi keçdikləri haqda həm Azərbaycan, həm də Gürcüstan xüsusi-xidmət orqanlarının əlində tutarlı dəlillər mövcuddur.

Qarabağda təlim keçmiş erməni separatçılarının Cavaxetiya erməniləri arasında ideoloji iş apardıqları, erməniləri Gürcüstan hakimiyyətinə və dövlətinə qarşı üsyanlara sövq elədikləri haqda Gürcüstan hökumətinin məlumatlı olduğu bildirilir.