Şirkət mağazalara payladığı məhsulları satılmadıqda geri götürmür, qabaqcadan pulunu alır, faiz tələb edir, bazarda isə süni qıtlıq və bahalaşma yaradır

Prezidentin iş adamları ilə bağlı tapşırıqlarına qarşı gedən firmanın yoxlanmasına zərurət yaranıb; “Veysəloğlu”nun Gülənlə əlaqələri haqda şübhəli iddialar var

“Veysəloğlu” şirkəti mağazalara payladığı məhsulları satılmadıqda geri götürmür. “Gündəm-xəbər”ə daxil olan xəbərə görə, sahibkarlardan qabaqcadan pulu alınır və məhsul sırınır.

Satışında ciddi axsamaların müşahidə olunduğu şirkət üzləşdiyi problemin həlli istiqamətində maraqlı çıxış yolu tapıb.

Artıq həmin qidaların nə qədər satılıb-satılmayacağı şirkəti maraqlandırmır və mağaza sahibi çətin durumda qalır. Ölkədə manatın üçüncü devalvasiyası mərhələli şəkildə getməkdədir.

Artıq su və çörəyin bahalaşması, dolların günbəgün qalxması əhalinin iqtisadi vəziyyətini ağırlaşdırır. Belə vaxtda bundan istifadə edən bəzi idxalçı şirkətlər süni şəkildə qiymət artımına gedirlər.

“Gündəm-xəbər”in verdiyi məlumata görə, ilk addımı “Veysəloğlu” şirkəti atıb. Firmanın məhsullarının qiymətində artım qeydə alınıb.

Şirkətin mallarını bahalaşdırması barədə sosial şəbəkələrdə və müxtəlif informasiya portallarında xəbərlər tirajlanıb.

Firma marketlərə öncədən verdikləri malların pulunu sahibkarlardan indi tələb etməyə başlayıb. Sahibkarlar pulu verə bilmədikdə, həmin borcun üzərinə 20% gəlirlər və sahibkara bununla bağlı sənəd imzalatdırırlar.

Sahibkar razılaşmadıqda isə mağazaya bir daha mal verməyəcəkləri ilə hədələyirlər. Pərakəndə və topdansatış mərkəzləri o zaman qiymətləri artıra bilər ki, “Veysəloğlu” şirkəti təqdim etdiyi məhsulların qiymətini artırsın. Şirkətdən də yeni qiymətlər tətbiq olunur.

“Veyseloğlu” bazarda süni qıtlıq yaratmağa yönəlik addımlar atmaqla ciddi narazılıq yaradır. Bu ölkə başçısının sahibkarların fəaliyyəti və iqtisadi böhranla mübarizə barədə tapşırıqlarına zidd hərəkətlərdir.

Dövlət başçısı qeyd edib ki, süni qiymət artımına gedənlər və inhisarçılıqla məşğul olanlar cəzalandırılacaq. Ancaq “Veysəloğlu” şirkəti prezidentin göstərişlərinə qarşı gedərək yeni tariflər müəyyənləşdirir. Artıq İqtisadiyyat Nazirliyi yanında Antinhisar Siyasəti və İstehlakçıların Hüquqlarının Müdafiəsi Dövlət Xidmətinin “Veysəloğlu” şirkətində təcili olaraq monitorinq aparmasına

zərurət yaranıb. Sahibkarlar tələb edirlər ki, süni bahalaşmaya şərait yaradan şəxslər cəzalandırılsın.

İş adamları hesab edirlər ki, “Veysəloğlu” şirkətinin təxribatçı addımı sahibkarların işini çətinləşdirməyə və öz mənfəətini güdməyə hesablanıb. Şirkət bazarda süni bahalaşma və qıtlıq yaratmaqla gəlirlərini artırmağı nəzərdə tutub.

Yeri gəlmişkən, onu da demək lazımdır ki, ölkənin qənnadı və şirniyyat sektorunun əhəmiyyətli inhisarçılarından olan “Veysəloğlu” Şirkətlər Qrupu ciddi maliyyə böhranı ilə üz-üzədir. Bu böhrandan çıxış yolunu sahibkarların dərisini soymaqda görən idxalçı şirkət onları çıxılmaz durumla baş-başa qoyur.

Qeyd edək ki, “Veysəloğlu” şirkəti manatın devalvasiyasından sonra qiymətləri qaldırmadığını bildirmişdi. Lakin indi ortaya çıxan mənzərə bir qədər fərqlidi. Şirkət nəinki qiymətləri qaldırmağa, hətta qanunlara zidd olaraq ölkənin qida bazarında inhisar yaratmaq üçün bir başa fəaliyyət göstərir.

Şirkətin mağazalara payladığı məhsullardan da narazılıq var. Sahibkarlar qeyd edirlər ki, “Veysəloğlu”nun məhsullarına tələbat azalıb. Buna səbəb şirkətin qidalarının keyfiyyətinin aşağı olmasıdır. Bu da dükan sahiblərinin ayağında qalır.

Onlar geri qaytaranda şirkət nümayəndələri məhsullarından imtina edirlər. Nəticədə, sahibkar zərər edir. Bu baxımdan son aylarda “Veysəloğlu” malları vitrinlərdə toz basıb. Ona görə tərəflər arasında narazılıq yaranır. Şirkət isə zərər etməsin deyə süni qiymət artımına getməli olur.

Onu da yada salaq ki, Azərbaycanın məşhur şirniyyat brendi olan “Çinar” şokoladları uğrunda 2 ildən artıq davam edən mübarizə “Gəncə-Qənnadı” ASC-nin qələbəsi ilə nəticələnib. Hələ sovet dövründə buraxılan məşhur şokolad markası uğrunda “Gəncə-Qənnadı”nın rəqibi “Veysəloğlu” şirkəti idi.

Qeyd edək ki, «Gəncə-Qənnadı» fabriki “Çinar” şokoladlarını 1975-ci ildən istehsal edir. “Çinar” şokoladlarının istehsal hüququ “Gəncə-Qənnadı” fabrikində olduğu halda, “Veysəloğlu ” şirkəti də 2006-cı ildən bu adla məhsul buraxmağa başlayıb. Fabrik məsələ ilə bağlı bir neçə dəfə “Veysəloğlu”ya müraciət edib şokolad istehsalını dayandırmağı tələb etsə də, qarşı tərəf buna əməl eləməyib.

Əksinə, nə qədər qəribə olsa da, “Veysəloğlu” şirkəti özü, guya “Gəncə-Qənnadı” tərəfindən hüquqlarının tapdandığını əsas gətirərək (Çünki «Çinar»ı Gəncə fabriki də buraxırdı) qarşı tərəfi məhkəməyə verib. Şirkət «Gəncə Qənnadı»dan «Çinar» istehsalını dayandırmağı və üstəlik, 100 min manat təzminat tələb edirdi.

İş o yerə çatıb ki, «Çinar» şokoladının ilk dəfə «Gəncə Qənnadı»da istehsal olunduğunu sübut etmək üçün «Çinarı» ilk dəfə istehsal edən qənnadı işçilərinin pasportları da məhkəməyə təqdim edilib.

Bütün instansiyalarda «Gəncə Qənnadı» haqlı sayılıb, «Veysəloğlu»nun iddiası əsassız hesab edilib. «Veysəloğlu» məhkəmədə qalib gələ bilməsə də, onların bu davranışı, «Gəncə Qənnadı»ya yaxşı ideya verib. Bu dəfə «Gəncə Qənnadı» qarşı tərəflə məhkəmə çəkişməsinə başlayıb.

İndiyədək dəyən zərərə görə, 50 min manat təzminat ödənilməsi tələb edilirdi. Bir neçə məhkəmə prosesindən sonra nəhayət, “Veysəloğlu-Yaycılı-Qardaşlar” şirkəti “Çinar” adını Madriddə patentləşdirərək bu adla xaricə məhsul çıxarmağa çalışıb.

Amma məhkəmənin qərarı ilə bunun da qarşısı alınıb. Amma dəyən maddi və mənəvi ziyana görə təzminatın ödənilməsi prosesi 2 il uzanıb. “Veysəloğlu” 25 min manatlıq təzminatı ödəməli olacaq.

Beləliklə, bazarda monopolist olmağa can atan şirkət bu mərhələdə də məğlub olub. Şirkət “Azərsun holdinq”in bazarına da girmək və onu sıxışdırmaq qədər özündə cəsarət tapa bilir.

Bu arada Türkiyədə hərbi qiyama cəhd və olayların arxasından nurçuların çıxması onların Azərbaycandakı şəbəkələrinin fəaliyyətini də gündəmə gətirib. Terrorçuluqda ittiham olunan Fətullah Gülənin Bakıdakı təhsil, media, qida sənayesi və digər sahələr üzrə şəbəkələri sıradan çıxarılıb.

Məlumata görə Bakıda və Azərbaycanın digər bölgələrində fəaliyyət göstərən və türk iş adamlarına aid olan böyük şirkətlərin əksəriyyəti “Gülən camaatı”na aiddir.

İri iş adamları ilə yanaşı, qida sektorunda çalışan türklərin böyük bir qismi də məhz nurçularla əlaqəli şəxslərdir. Azərbaycan iş adamları arasında da nurçu olmayan, amma nurçularla əlaqəli çalışan kifayət qədər biznesmen var.

Qida sektorunda da nurçu şəbəkənin ciddi payları var. Paytaxtın ən məşhur və elit restoranı sayılan “MADO” şəbəkəsi də bu setə aid edilir. Amma ən önəmli şirkətlərindən biri “Veysəloğlu” sayılır. İddialara görə, şirkət Gülən şəbəkəsinə daxildir. Bu barədə mətbuatda da məlumatlar yayılıb.

Müxtəlif saytlarda da şirkətin adı nurçularla hallanıb. Xəbərlərin səhihliyi nə dərəcədə olduğu bilinməsə də, “Veysəloğlu”nu Gülənlə əlaqələndirirlər. 1994-cü ildən topdan satış mərkəzi kimi fəaliyyətə başlamış Veysəloğlu Satış və Distribütor Şirkəti ilk illərində yalnız Türkiyə Respublikasından qida məhsullarının idxalı ilə məşğul olurdu. Bu da müəyyən şübhələrə yol açıb ki, nurçularla əlaəqlər var. Şirkətin nurçuların işləməsi haqda araşdırmalar aparılır.

Rəsmi məlumatda deyilir ki, ildən ilə inkişaf edərək, qısa müddət ərzində dövrün tələblərinə uyğun müasir texnologiya ilə təchiz olunaraq geniş ticarət şəbəkəsi qurmuş Veysəloğlu Satış və Distribütor Şirkəti hazırda yüksək səviyyəli xidməti ilə seçilən müasir ticarət holdinqinə çevrilib.

Şirkətin Bakı şəhərində yerləşən Mərkəzi anbarı, Cənub bölgəsini əhatə edən Salyan filialı, Qərb bölgəsini əhatə edən Mingəçevir filialı var. Mərkəzdən uzaqda yerləşsələr də hər iki filial dövrün tələblərinə uyğun ən son texnoloji vasitələrlə təchiz olunub.

Şirkət hazırda qida sənayesində dünyanın ən iri ölkələri olan Rusiya, Ukrayna, Belorusiya, Latviya, Almaniya, Polşa, Macarıstan, Danimarka, Portuqaliya, İtaliya, Vietnam və s.kimi ölkələrlə əməkdaşlıq edir.

Hazırda Şirkət dünyanın 20-dən artıq ölkəsinin 100-dən çox fabriki ilə əməkdaşlıq edir. Əməkdaşlıq etdiyi xarici istehsalçı fabriklərlə distribyuterlik səviyyəsində çalışan Veysəloğlu

Satış və Distribyuter Şirkəti düstribütoru olduğu şirkətlərin məhsullarının öncə Bakı şəhərində, az bir müddətdən sonra isə Azərbaycanın bütün bölgələrində satışını təşkil etməkdədir.

Baş ofisi, iki filialı və 9 regional local ofisləri olan şirkətin həmçinin xüsusi dəmir yolu da mövcuddur. Şirkət əlaqədə olduğu bütün firmaların məhsullarını ən yeni texnologiya və avadanlıqlarla idxalını həyata keçirməkdədir.

Şirkət 2001-ci ildən etibarən şokolad və karamel iistehsalına başlamışdır. Şirkətin rəhbərliyi bunun üçün Almaniya, Belçika, İtaliya və bir sıra qabaqcıl Avropa ölkələrinin tanınmış şokolad istehsalçılarının fəaliyyət mexanizmini öyrənmiş və fabrikdə yeni müasir avadanlıqlar quraşdırılmışdır. Yazıda səslənən iddialar və narazılıqlarla bağlı şirkətin mövqeyini dərc etməyə hər zaman hazırıq.

Cəfər

gundemxeber.az