Əsgər yeməkxanasında qabyuyan qadını döyən gizirin cinayət işinə xitam verildi

Müdafiə Nazirliyinin “N” saylı hərbi hissəsinin zabiti, gizir Fizuli Bədirovun cinayət işi üzrə məhkəmə prosesi başa çatıb. İttihama görə, Fizuli Bədirov “N” saylı hərbi hissənin maddi-texniki təminat bölüyünün silah-sursat anbar rəisi vəzifəsində, gizir hərbi rütbəsində hərbi xidmətdə olarkən nizamnamə qaydalarını pozub.

Fizuli Bədirov 19 yanvar 2016-cı il tarixdə, saat 09 radələrində hərbi hissənin əsgər yeməkxanasına gedib. O, mətbəxdə qabyuyan vəzifəsində işləyən mülki işçi Elnarə Ələkbərova ilə mübahisə edib.

Mübahisə zamanı Fizuli Bədirov Elnarə Ələkbərovanın baş nahiyəsinə bir neçə dəfə yumruqla və süpürgə ilə zərbələr vuraraq ona xəsarət yetirib.

Füzuli Bədirovun cinayət işi Gəncə Hərbi Məhkəməsində araşdırılıb. Məhkəmədə ifadə verən Fizuli Bədirov bildirib ki, 1 yanvar 2001-ci il tarixdə Silahlı Qüvvələrin Təlim-Tədris Mərkəzində “gizir” hazırlıq kursuna daxil olub: “25 sentyabr 2011-ci il tarixdən xidmətimi davam etdirmək üçün Müdafiə Nazirliyinin Gədəbəy rayonu ərazisində yerləşən “N” saylı hərbi hissəsinə göndərilmişəm. Həmin tarixdən 3 yanvar 2015-ci il tarixə qədər həmin hərbi hissənin maddi texniki təminat bölüyünün silah-təmir emalatxana rəisi vəzifəsində, gizir hərbi rütbəsində xidmətimi davam etdirmişəm”.

“Üzərimə doğru qazan qapağı atdı”

Təqsirləndirilən şəxsin sözlərinə görə, 19 yanvar 2016-cı il tarixdə, səhər saatlarında hərbi hissə komandanlığı tərəfindən keçirilən sıra düzülüşü zamanı hərbi hissənin maddi-texniki təminat bölüyünün komandiri, kapitan Aqil Əmiraslanov ona bildirib ki, hərbi hissənin əsgər yeməkxanasının mətbəxində qabyuyan vəzifəsində işləyən mülki işçi Elnarə Ələkbərova onun barəsində şikayət edib: “Şikayətin səbəbi kimi müxtəlif yerlərdə haqqında nalayiq ifadələr danışdığımı göstərib. Aqil Əmiraslanov məndən bunun səbəbini soruşdu. Ona bu barədə məlumatım olmadığını bildirdim. Səhər düzülüşü bitdikdən sonra hərbi hissənin əsgər yeməkxanasına getdim. Həmin vaxt Elnarə Ələkbərova əsgər yeməkxanasının zalından ünvanıma nalayiq ifadələr deməyə başladı, üzərimə doğru qazan qapağı atdı. Elnarə yerdə olan süpürgəni götürərək baş nahiyəmə zərbə vurdu”.

Fizuli Bədirov qeyd edib ki, Elnarə Ələkbərovanın əlindən süpürgəni alıb və kənara atıb: “Həmin vaxt əsgər yeməkxanasında olan hərbi qulluqçular məni sakitləşdirərək kənara çəkdi. Bundan sonra hərbi hissənin qərargahına getdim. Elnarə Ələkbərova mübahisənin səbəbi kimi barəsində müxtəlif ictimai yerlərdə nalayiq ifadələr işlətməyimi əsas gətirib. Amma onun barəsində nalayiq sözlər deməmişəm. Mübahisə zamanı əsəbləşərək onun baş nahiyəsinə yumruqla və süpürgə ilə zərbələr vurmamışam”.

Fizuli Bədirov məhkəmə iclasında zərərçəkmiş şəxsi vurmadığını göstərsə də, cinayət işinin ibtidai istintaqı zamanı verdiyi ifadəsində özünü təqsirli bilib. O, bildirib ki, mübahisə zamanı əsəbləşərək Elnarə Ələkbərovanın baş nahiyəsinə yumruqla və süpürgə ilə zərbələr vurub. Bundan sonra də Elnarə Ələkbərovanın

xəsarət alıb-almadığını müşahidə etməyib. Çünki dərhal əsgər yeməkxanasının mətbəxindən çıxıb və hərbi hissənin qərargahına gedib. Elnarə Ələkbərovanı onu təhqir etdiyinə görə vurub. Mübahisə zamanı özü hər hansı xəsarət almayıb, Elnarə Ələkbərovanın qulağında olan qızıl sırğanın birinin düşərək itməsi barədə məlumatı olmayıb.

“Mənə ədəbsiz təkliflər etməsi barədə məlumat verdim”

Zərərçəkmiş şəxs qismində dindirilən Elnarə Ələkbərova bildirib ki, 19 sentyabr 2014-cü il tarixdən Müdafiə Nazirliyinin Gədəbəy rayonu ərazisində yerləşən “N” saylı hərbi hissəsində əsgər yeməkxanasının mətbəxində qabyuyan işləyib: “19 yanvar 2016-cı il tarixdə, səhər saatlarında hərbi hissənin maddi texniki təminat bölüyünün komandiri, kapitan Aqil Əmiraslanova tabeçiliyində xidmətdə olan gizir Fizuli Bədirovun mənə ədəbsiz təkliflər etməsi və müxtəlif yerlərdə barəmdə nalayiq sözlər danışması barədə məlumat verdim. Fizuli Bədirovun barəsində tədbir görülməsini xahiş etdim”.

Zərərçəkmişin sözlərinə görə, həmin gün saat 9 radələrində hərbi hissənin əsgər yeməkxanasının mətbəxində olduğu zaman Fizuli Bədirov mətbəxə daxil olub: “Fizuli Bədirov ünvanıma nalayiq ifadələr işlədərək baş nahiyəmə 2-3 yumruq zərbəsi vurdu. Bu zaman özümü müdafiə etmək üçün yerdə olan süpürgəni götürərək Fizuli Bədirovu vurmaq istədim. O, süpürgəni əlimdən alaraq baş nahiyəmə dəfələrlə zərbələr endirdi”.

“Nalayiq ifadələri kənd sakinlərindən eşitmişəm”

Elnarə Ələkbərova qeyd edib ki, həmin vaxt əsgər yeməkxanasının mətbəxində olan mülki işçilər Rəna Musayeva və Ofelya Allahverdiyeva onları aralayıb: “Mətbəxdə olan səs-küyü eşidərək ora gələn əsgər Bəhbud Həşimov gizir Fizuli Bədirovu tutaraq kənara çəkdi və əsgər yeməkxanasından çıxardı. Başımdan aldığım zərbələrin təsirindən huşumu itirdiyim üçün Rəna Musayeva və Ofelya Allahverdiyeva məni əsgər yeməkxanasının paltar dəyişmə otağına apardılar. Hadisə zamanı qulağımda olan qızıl sırğanın biri itib. Həmin qızıl sırğanı axtarsam da, tapa bilməmişəm. Hadisə baş verən zaman Fizuli Bədirov yumruqla və süpürgə ilə dəfələrlə baş nahiyəmə zərbələr vurduqdan sonra halı pisləşib, başımda şiddətli ağrılar olub. Lakin bu barədə nə hərbi hissənin tibb məntəqəsinə, nə də yaşadığım Tovuz rayon Mərkəzi Xəstəxanasına müraciət etməmişəm. Fizuli Bədirov dəfələrlə ədəbsiz təkliflər edərək mənimlə yaxından tanış olmaq istəsə də, hər dəfə ona kəskin etirazımı bildirmişəm. Bu etirazım Fizuli Bədirovun xoşuna gəlməyib və müxtəlif yerlərdə ünvanıma nalayiq sözlər səsləndirib. Ünvanıma səsləndirdiyi nalayiq sözləri eşitdikdən sonra onun bölük komandiri Aqil Əmiraslanova bu barədə şikayətimi bildirmişəm. Bundan sonra Fizuli Bədirov əsəbi halda əsgər yeməkxanasının mətbəxinə gəlib. Aramızda mübahisə baş verib. Fizuli Bədirovun barəmdə səsləndirdiyi nalayiq ifadələri kənd sakinlərindən eşitmişəm”.

Gəncə Hərbi Məhkəməsinin hökmü ilə Fizuli Bədirov Cinayət Məcəlləsinin 128-ci (sağlamlığam xəsarət yetirmə) maddəsi ilə təqsirli bilinib və 6 ay müddətinə azadlıqdan məhrum edilib.

Hökmdən narazı qalan Fizuli Bədirov apelyasiya şikayəti verib. O, barəsində çıxarılan hökmün ləğv edilməsini və bəraət hökmünün çıxarılmasını istəyib.

Fizuli Bədirovun şikayəti araşdırılması üçün Gəncə Apelyasiya Məhkəməsinə göndərilib. Şikayət hakim Teyyub Muxtarovun sədrlik etdiyi kollegiyada araşdırılıb.

Vəkil: “Ağır cəza təyin edilib”

Təqsirləndirilən şəxsin vəkili Fuad İskəndərov bildirib ki, birinci instansiya məhkəməsinin hökm qanunsuz və əsassızdır: “Belə ki, məhkəmə Fizuli Bədirovun ifadəsini özünü müdafiə xarakterli olması kimi qiymətləndirib, işin faktiki hallarını araşdırmayıb, həmin ifadələrə qiymət verməyib. Bundan başqa hesab edirəm ki, Fizuli Bədirovun əməli sübuta yetmiş olsa belə, ona həddindən artıq ağır cəza təyin edilib. Cinayət Məcəlləsinin 128-ci maddəsinin sanksiyasında üç yüz manatadək miqdarında cərimə və ya bir ilədək müddətə islah işləri və ya bir ilədək müddətə azadlıqdan məhrumetmə cəzası nəzərdə tutulub. Göründüyü kimi həmin maddənin sanksiyasında 3 cəza növü nəzərdə tutulub ki, onlardan azadlıqdan məhrum etmə cəzası ən ağırıdır. Ciddi cəza növü yalnız o halda təyin edilir ki, az ciddi cəza növü cəzanın məqsədlərini təmin edə bilmir. Lakin məhkəmə hökmündə Fizuli Bədirova nəyə görə ağır cəza təyin edilməsinin məqsədləri göstərilməyib”.

Vəkil həmçinin qeyd edib ki, zərərçəkmiş şəxslə məhkum artıq barışıblar və zərərçəkmiş şəxs notariat qaydasında təsdiq edilmiş ərizə ilə məhkəmə kollegiyasına müraciət edərək məhkum Fizuli

Bədirovdan şikayət, tələb və iddiasının olmadığını bildirib. Vəkilin sözlərinə görə, zərərçəkmiş məhkumun barəsində olan cinayət işinə xitam verilməsini və məhkumun həbsdən azad edilməsini xahiş edib: “Odur ki, məhkuma bəraət verilməsi mümkün olmayacağı təqdirdə, hökmün ləğv edilməsini və məhkum Fizuli Bədirovun cinayət məsuliyyətindən azad edilməsinə dair qərar qəbul edilməsini xahiş edirik”.

Dövlət ittihamçısı da çıxış edərək apelyasiya şikayətinin təmin edilməməsini istəyib. Tərəfləri dinləyən hakim heyəti sonda qərar elan edib. Qərara görə, Fizuli Bədirovun apelyasiya şikayəti təmin edilib və Gəncə Hərbi Məhkəməsinin hökmü ləğv edilib.

Yeni hökmə əsasən, Fizuli Bədirov ilə zərərçəkmiş şəxs barışdığı üçün cinayət işinə xitam verilib. Fizuli Bədirovun barəsində olan həbs qəti imkan tədbiri ləğv edilib və o, məhkəmə zalından azadlığa buraxılıb.