Lənkəranda icra başçısının müavinləri - İlqar Dadaşov, Möhübbət Babayev və İlkin Rəhimov əhalinin şikayətlərini dinləmir, sakinləri başçı ilə görüşdürmür

Rayon rəhbərinin istefa ərizəsi yazdığı barədə xəbərlər yayılıb, oğlu isə...

Lənkəran problemlər məngənəsində boğulur. Süleyman Mikayılovdan sonra Taleh Qaraşov da şəhər üçün hər hansı iş görmədi.

İcra başçısının işi barəsində mətbuatda gedən yazıları ört-basdır etmək, əməllərini gizlətmək olub. Halbuki bütün lənkəranlılar nələr baş verdiyini bilir.

“Gündəm-xəbər”ə verilən məlumata görə, Lənkəranda işsizlik, narkomaniya, idarələrdə özbaşınalıq hökm sürür. Əhalinin yol, kanalizasiya, sosial müavinətlərin verilməsindəki dərəbəylik və s. problemləri həllini tapmayıb.

T.Qaraşov vətəndaşların şikayətlərini də dinləmir. Hər hansı lənkəranlı problemi ilə bağlı icra başçısının qəbuluna düşə bilmir.

Bəlkə də Qaraşov vətəndaşı qəbul etsə problemi qismən həllini tapar. Amma ətrafındakı qüvvələr bu iyerarxiyanı yaradır və sakinlərin dərdini deməyə imkan vermir.

Bunlar onun müavinləri - İlqar Dadaşov, Möhübbət Babayev və İlkin Rəhimovdur. Onlar vətəndaşlarla icra başçısı arasında körpü salmaq əvəzinə yandırırlar. Ona görə də əhali narazılıq edir.

Mənbənin sözlərinə görə, icra başçısı bir müddət əvvəl infarkt keçirib və daha çox Xanbulandakı villasında olur. Xanbulan Lənkəranın ən səfalı guşəsidir və havası çox təmizdir.

Müavinlərin öhdəsinə qalan rayonda isə adıçəkilən üç məmur meydan sulayır. Bu arada Taleh Qaraşov səhhəti ilə əlaqədar olaraq istefa ərizəsi yazıbmış.

Məlumata görə, 2 aydır ki, işə çıxmayan T.Qaraşovun xarici ölkələrdən birində müalicə aldıqdan sonra rayona qayıtdığı bildirilir.

Mənbənin verdiyi məlumata görə, Lənkarana qayıdıb işə çıxan rayon rəhbəri 2 gün rayonda qala bilib. İcra başçı cari ilin 6 aylıq hesabatına dair yığıncaq keçirdikdən sonra nəməlum səbəblərdən yenidən rayondan ayrılıb.

Hökumətdəki mənbələrdən əldə etdiyimiz məlumata görə, PA-ya çağırılan T. Qaraşovun istefa ərizəsinin alındığı deyilir. Ərizənin hansı səbəbdən alınması gizli saxlansa da mənbə icra başçısının səhətində olan problemdən dolayı bu halın baş verdiyini iddia edib. Məlumata bildirilir ki, icra başçısının belə vəziyyətə düşməsinin başqa səbəbi onun oğlu ilə bağlıdır. İddiaya görə, rayon rəhbərinin rəis oğlu azart həvəskarı olduğu üçün atasına söz gətirir.

Bundan başqa ilin 11 ayını xarici ölkələrdə olan Vüsal Qaraşov, ən çox Tiflisdəki kazinolardan səsi gəlir.

Həmin kazinolarda o atasına xeyli "ziyan" vurduğuda bildirilir. Mənbənin dediyinə görə, çox guman ki, İcra başçısının ərizəsinin alınmasının səbəbi məmur övladının dəbdəbəli həyat tərzi keçirməsi faktordur. Bildirək ki, ölkə başçısı İlham Əliyev dəfələrlə qeyd edib ki, məmur övladlarının vəzifəsindəki qeyri-etik davranışları, və dəbdəbli həyat tərzi kimliyindən aslı olmayaraq cəzasız qalmayacaq. Məlumat üçün onu da qeyd edək ki, Lənkaran ŞİHB Taleh Qaraşovun oğlu Vüsal Qaraşov 8-ci PB-nin rəisidir.

O məsuliyyətli bir postda olmasına baxmayaraq hələ də ölkədə deyil. Bu haqda xəbər portalları da yazıb. Amma heç bir açıqlama verilmir. Belə çıxır ki susmaq razılıq əlamətidir.

Ümumiyyətlə, Lənkəran iki məmurun əlində girinc qalıb. İcra başçısı Taleh Qaraşov və müavini İlqar Dadaşov tandemi cənub bölgəsinin mirvarisi ola bu şəhəri alt-üst edib. Taleyinə büdcə dağıdan məmurlar yazılmış Lənkəran Taleh Qaraşov komandasının zülmü altında inildəyir.

İlqar Dadaşov öz doğma şəhərində talançılıq siyasətində imtina edə bilmədi. Lənkərana yolu düşənlər şahidi ola bilər ki, icra hakimiyyəti tərəfindən heç bir iş görülməyib.

Yalnız mərkəzdə görülən suvaq-boyaq işləri, daş-divarın bəzədilməsi icra olunub. Adi bir misal- Lənkəranın yolları hələ də bərbad vəziyyətdən xilas olmayıb. Təkcə mərkəzi bazara baş çəkmək kifayət edirdi ki, Lənkəran haqda təəssurat yaransın. Onu da baş həkimin pulu ilə düzəldiblər.

İ.Dadaşovun işi öz rayonunu yalnız dövlət vəsaitlərini necə çırpışdırmaq, təhsil, səhiyyə ocaqlarını talamaq, pul yığdırmaqla sevir. .

Və istəyinə də nail olur. Qaraşovun xeyir-duası ilə Lənkəranda meydan sulayan Dadaşov özünü gözgörünməz məmur kimi təqdim etməyə də müvəffəq olub. Ancaq rayon sakinləri onun əməllərinə yaxından bələddir.

Dadaşovun təlimatları ilə yaxından tanış olanlar daha çox iş adamlarıdır. Rayonda sahibkarlardan pul yığılmasında Dadaşovun komandası iştirak etdiyi deyilir. Qaraşov isə Dadaşova bu müstəsna səlahiyyətləri verib.

Hesablama Palatasının Lənkəran şəhər İcra Hakimiyyətində vəsaitlərin xərclənməsi və s. məsələlərlə bağlı apardığı yoxlamanın real nəticəsi ilə bağlı yekun və əsas düzəliş edilməyən sənəd də İ.Dadaşovdadır.

Xatırladaq ki, ölkə başçısı Lənkərana səfəri zamanı bir sıra obyektlərin açılışında da iştirak etmişdi. Həmin vaxt Lənkəran şəhər icra hakimiyyətinin başçısı Taleh Qaraşovun şəhər əhalisinin fasiləsiz içməli su ilə təmin olunması ilə bağlı məruzəsi də olmuşdu.

Lakin şəhərin içməli su ilə təmin olunması üçün nəzərdə tutulan xəttlərin köhnə borular vasitəsilə çəkilməsi cəmi bir neçə gündən sonra icra başçısının söylədiklərində həqiqət payının az olduğunu göstərmişdi.

Belə ki, köhnə su boruları təzyiqə davam gətirmədiyi üçün həmən sıradan çıxdı. Dövlət büdcəsindən bu məqsədlə ayrılmış pulların isə hansı məqsədlərə sərf olunduğunu T.Qaraşovun müavini İ.Dadaşov da daha yaxşı bilir və hələ ki, özünün söylədiyi kimi susmağa üstünlük verir.

Ölkə başçısının Lənkərana gəlişindən bir gün əvvəl Sütəmurdov kəndi yaxınlığında baş vermiş problem səbəbindən su bütün şəhərin küçələrini basmışdı.

Şəhər sakinləri qeyd edirlər ki, yağmurlu region olduğuna görə burada yağışdan sonra Lənkəran su altında qalır. Çirkab sular və tullantılar şəhərin küçələrinə tökülür. Əhalini yağış sularının axması üçün çoxdan qazılmış açıq xəndəklər xilas edir.

Lənkəran şəhər İcra Hakimiyyətinə su təchizatı və kanalizasiya sisteminin qurulması istiqamətində 2011-ci ilin avqustunda 210 milyon manatlıq layihə təqdim olunub. Bu işin 2014-cü ildə yekunlaşması nəzərdə tutulub. Amma heç bir iş görülməyib. Lahiyəyə görə yollar qazılıb tökülsə də layihənin icrasına başlanılsa da işlər yarımçıq qalıb.

Bu işin çətin proses olduğunu görən Lənkəran RİH-nin başçısı Taleh Qaraşov göstəriş verib ki, şəhərin küçələrində kanalizasiya üçün qazılan xəndəklər torpaqlansın.

Nəticədə bu layihə icra olunmayıb, prezidentin ayırdığı vəsait mənimsənilib, yollar bərbad günə düşüb. Bu cür analoqsuz məntiq yalnız Azərbaycan məmurunun ağlına gələ bilər.

Lənkəran rayonunda dələduzluq faktları ilə bağlı da ilginc məlumatlar yayılıb. Məlumatda bildirilir ki, rayon məmur və sahibkarları vətəndaş tərəfindən dələduzluq yollu ilə şantaj edilməkdədirlər. Nazim Qulam oğlu Məmmədovun məmurların rayonda bəlasına çevrilməsi azmış kimi son zamanlarda yerli sahibkarların başına bəla olmaqdadır.

Lənkəran rayonunda özünü Putin Nazim ləqəbi ilə tanıdan vətəndaş idarə rəhbərlərini şantaj etməkdədir. Artıq bu şəxsin əlindən bezar olan rayon idarə rəhbərləri onun hər əmrin yerinə yetirəsi vəziyyətə gəliblər. Mənbə bildirir ki, Nazim Məmmədov son zamanlar yerli sahibkarlara zülm edir. Onlarla bağlı şər böhtan yayaraq, idarələrə şantaj xarakterli məktublar yazaraq sahibkarların incidilməsinə səbəb yaradır.

Lənkəran təhsili də bərbaddır. Hesablama Paltası şəhər Təhsil Şöbəsində yeyintilər aşkarlayıb.

ŞTŞ 87 ümumtəhsil məktəbini, 29388 şagird və 4020 müəllim kontingentini əhatə edir, ümumtəhsil məktəblərində şagirdlər üzrə orta sıxlıq 16,7 nəfərdir.

Audit olunan dövrdə Şöbə tərəfindən ümumilikdə 50865,9 min manat məbləğində vəsait icra edilib, 2013-2015-ci illər üzrə ayrılmış vəsaitlərin icra səviyyəsi müvafiq olaraq 95,1%, 95,7% və 93,9% təşkil edib.

Auditin əhatə etdiyi son tam dərs ilində (2014-2015) rayon üzrə təhsilini (tam orta) başa vurmuş 1735 şagirdin 97,9%-i attestat alsa da, onlardan yalnız 51,3%-i qəbul imtahanlarında iştirak edib. Bu imtahanların nəticələrinə görə rayon üzrə 360 nəfər tələbə adını qazanıb. Qəbul imtahanlarının nəticələrinə görə rayon abituriyentlərinin ana dili, ədəbiyyat, riyaziyyat, fizika, kimya, tarix, coğrafiya və ingilis dili fənləri üzrə göstəriciləri respublika üzrə orta göstəricidən aşağı olub.

Şöbənin tabeliyində olan ümumtəhsil məktəblərində əsasən Azərbaycan dili və ədəbiyyat, fizika, kimya, informatika, fiziki tərbiyə və ingilis dili fənləri üzrə ümumilikdə 467 saat vakant dərs olub.

İxtisaslı kadr çatışmazlığı səbəbindən həmin saatlar yaxın ixtisaslı pedoqoji kadrlar və saathesabı üzrə qonşu məktəblərdən olan müəllimlər tərəfindən tədris edilmiş və nəticə göstəricilərinə təsir edib.

Belə ki, 12 məktəb üzrə ali məktəblərə qəbul olan olmayıb, 2 kənd məktəbi üzrə qəbul imtahanı üçün sənəd verilməyib, 2 kənd məktəbi üzrə isə qəbul imtahanlarından toplanmış orta bal 100 baldan aşağı olub.Əmək haqlarının ödənilməsi ilə bağlı araşdırılma nəticəsində Şöbə tərəfindən mövcud təlimat və qaydaların tələblərinə düzgün əməl edilmədiyi üzə çıxıb.

Məzuniyyət günləri ilə üst-üstə düşən bayram günlərinin məzuniyyətin təqvim günlərinə daxil edilməsi və artıq hesablanmış iş günləri üçün əmək haqqı ödənilməsi, gənc mütəxəssislər üçün əlavə güzəştlər və stimullaşdırıcı tədbirlərin müəyyən edilməsi ilə bağlı müvafiq qərarla təsdiq edilmiş müddətlərin gözlənilməməsi səbəbindən artıq əmək haqqı və kompensasiya ödənilməsi hallarına yol verilib.

Rafiq Qara
gundemxeber.az