O, bu gün belə bir işlərlə deyil, daha çox Yevlaxdaki biznesinin idarəçiliyi ilə məşğul olur

Bu günədək bəzi şəhər və rayonlarda icra başçısı vəzifəsini daşıyan şəxsləri dəfələrlə tənqid etmişik, onların yarıtmaz fəaliyyətlərinə hüquqi qiymət verilməsini də istəmişik. İşıq üzü görən açıqlamalarımızda onu da vurğulamışıq ki, əksər icra başçıları daşıdıqları vəzifələrindən əhəmiyyət kəsb edən məsələlərin həllinə deyil, yalnız şəxsi maraqlarının təmin olunması üçün istifadə edirlərsə, deməli biz növbəti faciələrimizi yaşamağa məcburuq. Belə bir addımların varlığı da, olduqca təəssüf hissi doğurur. İcra başçılarının yarıtmaz fəaliyyətləri içərisində daha çox tənqid olunanı, qınanılanı, onların bir çox sakinlərə, xüsusilə də şəhid ailələrinə, veteranlara, əlillərə, imkansızlara və digər kateqoriyadan olanlara sərgilədikləri xoşagəlməz münasibətlərin varlığı olur.
Belə bir münasibətlərin yaşandığı, fəaliyyəti daha çox narazılıq hissinin baş qaldırmasına səbəb olan rayonlardan biri də, Tərtər rayonudur ki, hal-hazırda bu rayonda icra başçısı vəzifəsini cənab Müstəqim Məmmədov daşıyır. Onun rəhbərlik etdiyi rayonda qol qoyduğu maxinasiyalar, mənimsəmə faktları və s. kimi olaylar haqda məlumatları “Gündəm Xəbər”ə çadıran rayon sakini bildirir ki, “Müstəqim Məmmədovun “abadlıq və quruculuq” işləri adı altında həyata keçirdiyi maxinasiyalar, bu gün hər kəsi narahat edən məsələlərdən birinə də çevrilib. Çünki, “abadlıq” işlərinin görülməsi üçün əvvəlcə rayon mərkəzində yerləşən bir çox ərazilər bərbad hala gətirilir, sonra isə təmir olunur. Hansı ki, həmin ərazilərin təmir olunmasından heç bir il vaxt da keçmir”. Sakinlərin bildirdiklərinə görə, bu məqsədlə müəyyən olunmuş küçələr, parklar və digər ərazilər oxşar olaylarla üz-üzə qalırlar. Təbii ki, belə bir işlər həyata keçirilən zaman, büdcədən ayrılmış milyonlarla vəsaitlər havaya “sovrulur” və rayon rəhbərliyinin xeyir-duası ilə də mənimsənilir. Təqribən bir il bundan əvvəl, abalaşdırılan və bir müddət bundan əvvəl isə sökülən ərazilərin yenidən abalaşdırlmasının sirrini, yəqin ki, kimlər bilməsə də, cənab başçı çox gözəl bilir.
Əldə etdiyimiz müfəssəl məlumatlara görə, yerli sakinlər icra başçısının talançılıq siyasəti ilə artıq barışmalı olublar və belə bir addımlara da, sanki adi hal kimi yanaşırlar. Hər kəsi düşündürən hal o olur ki, “abadlıq və quruculuq” işləri adı altında mənimsəmələrlə bağlı maxinasiyaları, çox zaman eyni ərazidə təkrarlayırlar. Bu da daha çox ictimai narazılıq hissinin baş qaldırmasına səbəb olur. Yerli sakinlər onu da vurğulayırlar ki, “rayonumuzun ucqar kəndlərində elə problemlər yaşanır ki, Müstəqim Məmmədov həmin problemlərin varlığını, bir dəfə də olsun dilinə belə gətirmir. Bəyəm yaxşı olmazmı ki, icra başçısı sakinlərin yol, su, nəqliyyat və s. kimi problemləri ilə məşğul olsun. O, bu gün belə bir işlərlə deyil, daha çox Yevlaxdaki biznesinin idarəçiliyi ilə məşğul olur. Çünki, icra başçısına məxsus obyektlərin çoxu Yevlaxda yerləşir. Elə ki, təmir-bərpa işlərinə material lazım olur, o halda o, materialların ona məxsus obyektlərdən şişirdilmiş qiymətlərə alınması haqda göstərişlərini də verir”.
Hər kəsə bəllidir ki, Müstəqim Məmmədov 1992-ci ildən 2014-cü ilədək, yəni Tərtər RİH-nə başçı təyin olunduğu günədək Yevlaxda işləyib və işlədiyi illər ərzində o, Yevlaxda bir çox kommersiya obyektlərinin, o cümlədən bir neçə inşaat materialları satış mərkəzinin də sahibinə çevrilib. Məhz, bu kimi səbəblər üzündəndir ki, Tərtərin “abadlaşdırılmasına” lazım olan materiallar şişirdilmiş qiymətlərlə Yevlaxdan alınır.
İcra başçısının ən böyük maxinasiyalarından biri də, torpaq subsidiyaları ilə bağlı həyata keçirilir. Əldə etdiyimiz məlumatlara görə, Müstəqim müəllim dövlətin aqrar sektora ayırdığı subsidya pullarına əl qoymaqla da, hər il külli miqdarda qazanc əldə edə bilir. Bu məqsədlə o, bir çox kənd bələdiyyə sədrləri və kənd icra nümayəndələri ilə əlbir olur, yarasız əkin sahələrinə subdsiyalar yazdırmaqla mənimsəmələri həyata keçirirlər. Bəzi iddialara görə bu cür maxinasiyanın həyata keçirilməsi ilk dəfə başçı tərəfindən deyil, məhz, əksər kənd bələdiyyə sədrləri və yerli icra nümayəndələri tərəfindən işlənərək hazırlanıb. Belə bir maxinasiyanın əhəmiyyətindən xəbər tutan Müstəqim Məmmədov da, “qabaqcıl təcrübə”nin artıq bütün rayon üzrə tətbiq olunması barədə göstəriş verib. Artıq bu gün maxinasiyaya cəlb olunmuş bütün bələdiyyə sədrləri və icra nümayəndələri, başçı tərəfindən təyin olunmuş aylıq haqqları ödəmək məcburiyyətində qalıblar. Bu da nəticə...
Ümumi şəkildə götürdükdə, bu gün Tərtərdə dövlət vəsaitlərinin qəbul edilməsi mümkün olmayan formada tarmar edilməsinin heç bir adı yoxdur. Rayonun abadlaşmaya və sosial problemlərinin həll olunmasına ehtiyacı olan çoxlu sayda kənd və qəsəbələri, iri yaşayış məntəqələri var. Boş və mənasız işləri görməkdənsə, sakinlərə məxsus problemləri həll etmək daha məqsədəuyğun hal olmazmı? Yoxsa bu cür addımları atmaq, xalqına xidmət etmək, cənab Müstəqim Məmmədova yad anlayışdır.
Həqiqət naminə qeyd edə bilərik ki, bu gün Tərtərdə yaşanan acınacaqlı durum, bəlkə də digər şəhər və rayonlarda yaşanmır. Əgər rayona rəhbərlik edən Müstəqim Məmmədovun idarəçiliyində əsas strateji xətt, Azərbaycan iqtisadiyyatının inkişafına və sakinlərin sosial problemlərinin həllinə töhvələrini verməkdirsə, deməli o, əməli addımlarını atmalıdır.

Akif


gundemxeber.az