Təhsil naziri Mikayıl Cabbarovun sinif yoldaşı olduğu deyilən Vüsal Məmmədov dəyəri 2 manat olan aftafaları 47 manatdan sənədləşdirib?

8 saylı Ərazi Maliyyə Hesablaşma Mərkəzinin 11 saylı məktəbdə apardığı “əsaslı təmir”lə bağlı şok faktlar
“Gündəm Xəbər” vaxtaşırı sosial, xüsusən də təhsil və səhiyyə sahəsində hökm sürən problemlərdən bəhs edən yazılar dərc edir. Son vaxtlar sözügedən sahələrdə baş verən qanunsuzluqlarla bağlı demək olar ki, hər gün redaksiyamıza müxtəlif şikayətlər daxil olur.



Təhsil sahəsindəki korrupsiya və rüşvətxorluqla bağlı növbəti yazımız isə Gəncə şəhəri təhsil sistemindəki özbaşınalıq və kobud qanun pozuntuları barədədir. Mətləbə keçməzdən öncə qeyd edək ki, bu ilin yanvarından etibarən Azərbaycanda şəhər və rayon təhsil şöbələrinin mühasibatlıqları və təsərrüfat qrupları Təhsil Nazirliyinin Ərazi Maliyyə Hesablaşma mərkəzlərinin tabeliyinə verilib. Bununla da artıq şəhər və rayonlar üzrə nəzərdə tutulmuş təhsil xərcləri Azərbaycan Respublikası Təhsil Nazirliyinin müvafiq Ərazi Maliyyə Hesablaşma mərkəzləri vasitəsilə həyata keçirilir.



Burada da məqsəd Azərbaycan Prezidentinin 2015-ci il 7 dekabr tarixli Fərmanının 12-ci və 13-cü bəndlərinə əsasən təhsil sahəsində maliyyə və inzibati resursların idarə edilməsini təkmilləşdirmək və mərkəzləşdirilmiş maliyyələşdirilməyə mərhələlərlə keçməkdir. Bu il ərzində şəhər və rayonlar üzrə təhsil şöbələrinin mərkəzləşdirilmiş mühasibatlıqları və təsərrüfat qruplarının Təhsil Nazirliyinin müvafiq Ərazi Maliyyə Hesablaşma mərkəzlərinin tabeliyinə verilməsi, xərclərin mərkəzləşdirilmiş maliyyələşmə mexanizminin tətbiqinə başlanılması ilə bağlı verilmiş tapşırıqların icrası istiqamətində tədbirlər həyata keçirilib. Mərkəzləşdirilmiş maliyyələşdirilməyə mərhələlərlə keçirilməni təmin etmək məqsədilə ilkin olaraq Sumqayıt şəhərində Sumqayıt şəhəri, Abşeron, Xızı, Qubadlı, Şuşa və Zəngilan rayonları əhatə olunmaqla 1 saylı Ərazi Maliyyə Hesablaşma Mərkəzi, İsmayıllı şəhərində İsmayıllı, Şamaxı, Qobustan və Ağsu rayonları əhatə olunmaqla 3 saylı Ərazi Maliyyə Hesablaşma Mərkəzi, Ucar rayonunda Ucar, Zərdab, Kürdəmir və Göyçay rayonları əhatə olunmaqla 11 saylı Ərazi Maliyyə Hesablaşma Mərkəzi və Sabirabad rayonunda Sabirabad, Saatlı, İmişli və Beyləqan rayonları əhatə olunmaqla 12 saylı Ərazi Maliyyə Hesablaşma Mərkəzi fəaliyyətə başlayıb. Gəncədə isə ətraf rayonları əhatə edən 8 saylı Ərazi Maliyyə Hesablaşma Mərkəzi fəaliyyət göstərir.



Onu da qeyd edək ki, yeni mexanizmin tətbiqi ümumilikdə regionlarda yerləşən 4134 təhsil müəssisəsini, o cümlədən 3875 ümumi təhsil, 259 məktəbdənkənar təhsil müəssisəsini və həmin təhsil müəssisələrində çalışan 175 minə yaxın təhsil işçisini əhatə edir. Beləliklə, məlum olduğu kimi Təhsil Nazirliyinin tərkibində fəaliyyət göstərən Maliyyə Hesablaşma Mərkəzlərindən biri - 8 saylı Maliyyə Hesablaşma Mərkəzi 2016-cı ildən Gəncəbasarda zonasında fəaliyyətə başlayıb.



Artıq adı gedən Hesablaşma Mərkəzinin "əsaslı təmir" adı altında bu il yay tətili zamanı təmir elədiyi 11 saylı tam orta məktəbin görüntülərindən məlum olur ki, burada təmirdən söz belə gedə bilməz. "Gündəm xəbər"in əməkdaşı "əsaslı təmir"dən çıxan məktəbdə olub. Məktəblə tanışlıqdan sonra elə həmin məktəbin tədris işləri üzrə direktor müavini Nailə Bədirxanavanın" Bizim məktəb artıq 30 ildir ki, təmir üzü görmür" fikrinə haqq qazandırdıq. Məsələ burasındadır ki, sənəd üzərində aparılan "əsaslı təmir"dən çıxan məktəbin sinif otaqları bərbad vəziyyətdədir.



Dəhlizlərdə uzun illərdən bəri döşəməyə vurulan parketin üzərində yalnız "asta yeri kəmər düşər belindən" havası altında yerimək mümkündür. Yalnız kirəmidi təmir olunan binanın xaricində uşaq və müəllimlərin ümumi istifadəsində olan tualetlərin qapısında əl tutacağı deyil, hec cəftə belə yoxdur. Əl-üz yuyan isə su xəttinə qoşulmayıb. Dəhşətdir! Görəsən, susuz olan bu tualetlərə 8 saylı Maliyyə Hesablaşma Mərkəzinin yay fəslində təchizat işlərinə baxan rəisi Vüsal Məmmədov təhsil idarələrinə dəyəri 2 manat olan, amma sənəddə dəyəri 47 manat göstərilən aftafalardan niyə verməyib? Yeri gəlmişkən, deyəsən Təhsil Nazirliyi son zamanlar məktəbləri invertarlarla təchiz edərkən, dəyəri həddi aşan əşyalarla təchiz edir. Türklər demiş, burada sual ortaya çıxar ki, "Nə gibi inventarlarla?" Məsələn, lüləyi xüsusi qiymətli metaldan olan 47 manatlıq aftafa kimi. Məktəbin direktoru deyir ki, məktəbin dam örtüyünü bizə Təhsil şöbəsinin müdiri Zakir müəllim verib. Onda sual ortaya çıxır bəs təmir adı altında 8 saylı Maliyyə Hesablaşma Mərkəzi nə iş görüb???



Əgər Mərkəz yayda burada həqiqətən də təmir işləri aparıbsa, onda nədən 11 saylı məktəbdə su sistemi yoxdur?




Niyə bu məktəbdə işləyən müəllimlər, burada təhsil alan uşaqlar su üzünə həsrət qalıblar?



Budurmu Vüsal Məmmədovun “əsaslı təmiri”???



Qeyd edək ki, Vüsal Məmmədovun hazırkı Təhsil Naziri Mikayıl Cabbarovun sinif yoldaşı olduğu bildirlir. Hətta onun ali təhsilinin olmadığı da bildirlir. Bəli, belə “əsaslı təmiri” məhz bu cür kəmsavad adamlardan gözləmək olar. Görəsən, hörmətli Təhsil nazirmiz Mikayıl Cabbarov bu barədə nə düşünür?



Mövzumuz bununla bitmir. 8 saylı Maliyyə Hesablaşma Mərkəzinin 2016-cı ildə əldə etdiyi digər mühüm "nailiyyətləri" haqqında növbəti sayımızda geniş bəhs edəcəyik. Eyni zamanda məcburi köçkün rayonlarının təchizatına ayrılan maliyyənin necə xərcləndiyinə də konkret faktlarla aydınlıq gətirəcəyik.







Mehriban Əzizqızı

gundemxeber.az