Rayonda əksər vəzifə sahiblərini inandırmağa çalşan və onlarla bir çox məsələlərdə “əməkdaşlığa” gedərək pul-para qazanan saxta media əməkdaşlarının əməlləri, yəqin ki, yaxın günlərdə ifşa olunacaq

Gədəbəy rayonu paytaxt Bakıdan olduqca uzaq məsafədə, yəni gözdən uzaq, könüldən qıraq bir ərazidə yerləşdiyindən, hələ ki, onun dərdi uzun, yaraları isə sağalmazdır. Bəlkə də vəziyyətin belə bir həddə gəlib çıxmasının bir çox səbəbləri var ki, bu səbəblər içərisində ən əsası, bu gün rayonda idarəetməni həyata keçirən rəhbərliyin zorakı idarəçiliyinin varlığıdır. Düzdür, zorakı idarəçilik, zorakı düşüncə tərzi, zorakı yanaşma və.s, bugünkü günümüzlə ziddiyət təşkil etsə də, nə etmək olar ki, gədəbəylilərin bəxtinə ilin-günün belə bir zamanında Allah-Təala bu cür idarəçilik nəsib edib. Elə bu səbəbdəndir ki, hal-hazırda Gədəbəydə danışanın dili “kəsilir”, eşidənin qulağı “kar” edilir, kimlərinsə tikdirdiyi obyektər viran qoyulur və.s, və ilaxır...

Bu da bir həqiqətdir ki, əvvəlki rəhbərliyin idarəçiliyindən zinhara gələn əksər gədəbəylilər, vaxtilə elə düşünürdülər ki, Ramiz Yediyarovun gəlişi hər kəsi “ağgünə” çıxaracaq. Amma nə biləydilər ki, onun gəlşi yanan ocaqları söndürəcək, bu günədək rayonun tarixində bənzəri olmayan büdcə oğurluqlarının həyata keçirilməsinə səbəb olacaq, sahibkarlıq fəaliyyəti ilə məşğul olanlar “topa” tutulacaq, “burda mənəm, Bağdadda kor xəlifə” prinsipi həyata keçiriləcək. Belə bir səbəblər üzündəndir ki, hal-hazırda rayonun səhiyyəsində, mədəniyyətində, təhsilində, aqrar bölməsində, iqtisadi sektorunda, ekologiyasında, hüquq-mühafizə orqanlarında, özəl sahələrində, icra sturukturunda və digər qurumlarında analoqu olmayan olaylar baş verir. Məsələn, hal-hazırda rayonun mərkəzi xəstəxanasını əksəriyyət müalicə mərkəzi kimi yox, sanki soyğunçuluq ünvanı kimi qəbul edirlər. Belə bir səbəblər üzündəndir ki, bu gün kənd xəstəxanalarında yaşanan acı durumun göstəricisindən, fəaliyyəti fəaliyyətsizliyə söykənən tibb məntəqələrin varlığından, səhiyyə ocaqlarına məxsus nəqliyyat vasitələrindən şəxsi məqsədlər üçün istifadə olunmasından və.s kimi problemlərin varlığından, nə qədər istəsən yazmaq olar. Rayonun mədəniyyət sahəsi də, sanki ölü bir ünvanı xatırladır. Təhsil ocaqlarında yaşanan durum haqda məlumatlı olan hər kəs isə, bəlkə də baş götürüb

qaçmağa ünvan axtarar. Aqrar bölmədə yaşanan inhisarçılığın “pik” nöqtəyə çatması, hansısa acı bir sonluğun baş qaldırmasına sanki işarədir. Hüquq-mühafizə orqanlarındakı zorakılıq, qurama məhkəmə qərarları, saxta ittihamların varlığı və.s-də, onu söyləməyə əsas verir ki, belə bir sahələrə nəzarətin həyata keçirilməsi üçün istifadə olunan “dirijor çubuğu,” hələ də icra hakimiyyəti aparatında bərk-bərk saxlanılır. Ünvanlı sosial yardım verənlərin onu alanlarla qurduğu işbirliyinin şərtlərinə gəlincə isə, onu deyə bilərik ki, razılaşdırılmış şərtlərə heç dünyanın ən geridə qalmış “Banan” ölkəsində belə rast gəlmək mümkün deyil. Çünki, “SABEZ” adı ilə tanınan qrum əməkdaşlarinın, yerli icra nümayəndəliyinin səlahiyətliləri ilə əlbir olaraq, hər il sadə kənd sakinlərini “tora” salmaları, əksəriyyət üçün sanki adi məsələlərdən biri hesab olunur. Aşağı icra nümayəndəliyindən tutmuş, yuxarı icra strukturuna qədər bütün vəzifələrin qiymət göstəricisinin də, Yediyarov “qanunları” ilə tənzimlənməsini eşidib bilən hər kəs, yəqin ki, yolunu ruhi-əsəb dispanserlərindən salmağa məcbur olar.

Rayonun mərkəzi küçələrinin, ətraf ərazilərinin təmiri zamanı hansı məbləğdə büdcə vəsaitinin oğurlanmasını dəqiq bilənlər, ehtimal etmək olar ki, birdə yolunu Gədəbəydən salmayacaqlar. Adicə bir misalı qeyd edək ki, rayonun Saratovka kəndindən Şınıx zonasına çəkilən yolun asfaltlanması zamanı, hansı maxinasiyalara qol qoyulduğunu kim bilməsə də, yəqin ki, həmin yolu gəlib-gedənlər dəqiq bilərlər. Çünki, təqribən 20 km uzunluğunda olan yola 5-6 sm qalınlığında asfalt örtüyünün vurulması, külli miqdarda vəsaitin oğurluğundan xəbər verir. Uzun illərdir ki, Şınıxın kəndlərinə mavi qaz xətti çəklişinin həyata keçirilməsi və bu yöndə sakinlərin mavi qaza olan təminatlarının ödənilməsi barədə vədlər verilsə də, sanki verilən vədlər boş-boş xülyalardan başqa bir şey olmur. Elə bu kimi səbəblər üzündəndir ki, hər il qış fəsli gələndə rayonun meşə təsərrüfatına elə bir “dağ” çəkilir ki, ümumi mənzərəni görən hər kəsin sanki ağlamağı da tutur. Amma, nə fayda!

Ümumiyyətlə, bu gün Gədəbəy rayonu haqda nə qədər istəsən tənqidi məqalə yazmaq, saysız-hesabsız problemlərini qabartmaq olar. Çünki, Gədəbəyə rəhbərlik edən komandanı rayonun gələcəyi deyil, əldə edəcəkləri büdcə oğurluqlarının həcmi, qol qoyacaqları maxinasiyaların miqyası düşündürür. Amma, belə bir vəzifə sahiblərindən fərqli olaraq, “Gündəm xəbər” qəzeti olaraq hər zaman sadə vətəndaşların, halal zəhməti ilə məşğul olan sahibkarların və digər şəxslərin yanında olmuşuq, problemlərinin ictimailəşməsinə də çalışmışıq. Məsələn, vaxtilə Gədəbəydə yaşayıb sahibkarlıq fəaliyyəti ilə məşğul olan Əli Abdullayevin üz-üzə qaldığı problemlər və onların həlli istiqamətində verdiyimiz dəstək də, yəqin ki, əksəriyyətə bəlli həqiqətdir. Amma, nə etmək olar? O, mübarizə yolundan

dönməsə də, yaşadığı ömür yolundan dönməyə məcbur oldu ki, bu da hələ ki, bizim üçün müəmmalı qalmaqdadır.

Belə bir səbəblər üzündəndir ki, ötən illər ərzində “Gündəm xəbər” qəzeti olaraq daim Gədəbəyin problemlərinə toxunmuşuq və onların ictimailəşməsinə də çalışmışıq. Başlıca məqsədimiz o olub ki, bu rayon da digər şəhər və rayonlar kimi inkişaf etsin, sakinlərinin üz-üzə qaldıqları saysız-hesabsız problemlər həllini tapsın. Yəni, bundan sonra da, mövqeyimizi belə bir yöndə davam etdirəcəyimizə qərarlıyıq. Amma bəlli yanaşmamıza baxmayaraq, son günlər redaksiyamıza sensaiya doğura biləcək belə bir məlumat da daxil oldu ki, Gədəbəydə saxta media əməkdaşları peyda olublar. Və onlar rayonda yüksək çinli vəzifə sahiblərindən tutmuş, orta ranqlı vəzifə sahiblərinə qədər, hər biri ilə “Gündəm xəbər” qəzetinin adından danışırlar. Hətta, onların qarşısında öhdəlik də götürürlər ki, bundan sonra “Gündəm xəbər” qəzetində Gədəbəy rayonunun problemlərindən bəhs olunmayacaq.

Verilən məlumatlarda o da vurğulanır ki, həmin şəxslər rayonun daha çox təhsil şöbəsinə, sosial müdafiə mərkəzinə, səhiyyə sahəsinə, mədəniyyət şöbəsinə və digər sahələrinə “əl qoyub” minbir maxinasiyalara imza atırlar. Və çox zaman da, icra hakimiyyəti başçısının adından yararlanmağı bacarırlar. Odur ki, həmin vəzifə sahiblərinin diqqətinə çatdırmaq istəyirik ki, Gədəbəy rayonunda redaksiya rəhbərliyinin səlahiyyət verdiyi heç bir əməkdaşı yoxdur. Əgər həmin şəxslər belə bir addımlarını təkrar atalarsa, dərhal redaksiya rəhbərliyinə və hüquq-mühafizə orqanı əməkdaşlarına məlumat verilməsini hər kəsdən xahiş edirik.

Gədəbəylə bağlı problemlərin varlığını, bundan sonra da diqqət mərkəzində saxlayacağıq. Odur ki, hər kəsin üzləşdiyi problemlərin həlli ilə bağlı redaksiyamıza müraciət etməsi tövsiyyə olunur.

Əli