Rahib Nuriyev: “Etdiyim şikayətlə bağlı lazımi araşdırmalar aparmaq əvəzinə, rayon prokurorluğunda cinayəti törətmiş şəxslə bağlı, cinayət işinin rədd edilməsi barədə əsassız Qərar qəbul olundu”

Bu da bir həqiqətdir ki, əksər hallarda paytaxt Bakıya nisbətən bölgələrdə qanunun aliliyinin təmin edilməsi istiqamətində fərqli addımlar atılır ki, bu da çox zaman hansısa xoşagəlməz amillərin baş verməsi ilə də nəticələnir. Belə olan halda əziyyət çəkən, minbir zülmə, olmazın haqsızlığa və s. düçar olanlar, daha çox sadə sakinlər olurlar. Bu kimi səbəblər üzündəndir ki, “Gündəm Xəbər”in redaksiyasına sakinlər tərəfindən ünvanlanan şikayət məktublarının sayı durmadan çoxalır, hər kəs üz-üzə qaldığı problemlərin ictimailəşməsinə də çalışır. Məsələn, bir neçə gün bundan əvvəl redaksiyamıza İmişli rayonu Araz küçəsi-46 ünvanında yaşayan Nuriyev Rahib Amanxan oğlu tərəfindən şikayət ərizəsi daxil olub. O, yazmış olduğu ərizəsində üz-üzə qaldığı problemin varlığından bəhs edir və həm onun həllinə köməklik göstərməyimizi, həm də problemin ictimailəşdirilməsini də xahiş edir. Rahib Nuriyev qeyd edir ki, “06 aprel 2016-cı il tarixdə üzləşdiyim problemlə bağlı İmişli rayon Polis Şöbəsinə rəsmi qaydada müraciət edib bildirdim ki, fermer təsərrüfatımda çoban işləyən Murad Mehdiyev adlı şəxs, şəxsi mülkiyyətimdə olan 105 baş xırdadırnaqlı heyvanlarımı xəbərim olmadan satmış və əldə etdiyi pulları da mənimsəmişdir. 08 aprel 2016-cı il tarixdə isə, üzləşdiyim problemlə bağlı Daxili İşlər Nazirliyinin “102” xidmətinə də zəng edib bildirdim ki, təsərrüfatımda çoban işləyən Murad Mehdiyev 105 baş xırdadırnaqlı heyvanlarımı satmış və pulları da mənimsəmişdir. Hər iki quruma etdiyim şikayətlə bağlı lazımi araşdırmaların aparılması üçün, toplanmış iş materialları İmişli rayon Prokurorluğuna göndərildi. Etdiyim şikayətlərə baxmayaraq, təəssüf doğuran hal o oldu ki, qol qoyulan cinayət işi ilə bağlı rayon prokurorluğunda heç bir cinayət işi qaldırılmadı. 02 may 2016-cı il tarixdə isə, İmişli rayon Prokurorluğunun böyük müstəntiqi, 1-ci dərəcəli hüquqşünas Əzimov Elşad Yaşar oğlu tərəfindən toplanmış 51C-16 saylı materiallar üzrə, Azərbaycan Respublikası CPM-nin 39.2; 85; 207 və 212-ci maddələrinə əsasən, Mehdiyev Murad Əziz oğlunun mənə məxsus 105 baş xırdadırnaqlı heyvanları mənimsəməsi faktı ilə bağlı cinayət işinin başlanmasının rədd edilməsi barədə Qərar qəbul edilir. Halbuki CPM-nin 39.1.1; 39.1.12 və 39.2-ci maddələrində belə bir əsaslarla cinayət işinin başlanmasının rədd edilməsi halı nəzərdə tutulmamışdır. Eyni zamanda, CPM-nin 39.2-ci maddəsində o da qeyd olunur ki, hər hansı şəxs barəsində başlanmış cinayət təqibinə, həmçinin onun cinayət törədilməsinə aidiyyəti olmadıqda və təqsirliyi sübuta yetirilmədikdə xitam verilir.

Bu gün hesab edirəm ki, etdiyim şikayətlərimlə bağlı aparılan araşdırmalar bitərəfli qaydada aparılmış və mülkiyyətimdə olan 105 baş xırdadırnaqlı heyvanlarım mənimsənildiyindən, mənə külli miqdarda ziyan da dəymişdir. Belə olan halda zərər vuran şəxsdən həmin zərər alınaraq mənə ödənilməli və onun barəsində qanuna müvafiq tədbirlər də görülməlidir. Amma, mənimsəmə hadisənin baş verməsindən xeyli vaxt keçməsinə baxmayaraq, bu gün də Murad Mehdiyevlə bağlı hər hansı addım atılmır. Hələ bu azmış kimi onun özü və atası, elə hallar olur ki, mənə hədə-qorxu da gəlirlər.

Onu da qeyd edim ki, mənimsəmə hadisəsi baş verməzdən öncə, mən “Respublikabank”ın İmişli rayon şöbəsindən 27 min manat kreditə pul götürmüşdüm. Həmin pulun müəyyən hissəsinə bəzi sakinlərin satışa çıxartdıqları pay torpaq sahələrini, müəyyən hissəsinə isə, xırdadırnaqlı heyvanlar almışdım. Məqsədim ölkəmizdə heyvandarlıq təsərrüfatının inkişaf etdirilməsinə köməklik göstərmək idi. Onu da vurğulayım ki, 11 dekabr 2015-ci il tarixdə Murad Mehdiyevlə ümumi xırdadırnaqlı heyvanları sayarkən, fermer təsərrüfatımda 290 baş qoyun, 87 baş quzu olub. Onlardan 14 başı öldüyü üçün, təsərrüfatımda 363 baş xırdadırnaqlı heyvan qalmışdı. 05 aprel 2016-cı il tarixdə isə, Murad Mehdiyevin iştirakı ilə heyvanları təkrar sayarkən 70 baş qoyun, təqribən 4 aylıq 35 baş körpə quzular əskik oldu. İlk olaraq ondan 105 baş xırdadırnaqlı heyvanların hansı səbəbdən yox olmasının səbəbini soruşdum. O, ona

ünvanladığım suala heç cür cavab verə bilmədi və yalnız onu vurğuladı ki, “mən sənə çobanlıq edərəm, əmək haqqımı hesablayarsan, o halda sənə dəymiş ziyanı ödəyə bilərəm”. Mən həmin vaxt onun təklifi ilə razı olmadım və Murad Mehdiyevin qol qoyduğu cinayət əməli ilə bağlı hüquq-mühafizə orqanlarına şikayət etdim. Təəssüf doğuran hal o oldu ki, etdiyim şikayətlə bağlı lazımi araşdırmalar aparmaq əvəzinə, rayon prokurorluğunda cinayəti törətmiş şəxslə bağlı cinayət işinin başlanmasının rədd edilməsi barədə əsassız Qərar qəbul olundu.

Baxmayaraq ki, Azərbaycan Respublikası Konstitusiyasının 12-ci maddəsinin 1-ci hissəsində qeyd olunur ki, “Vətəndaş hüquqlarının və azadlıqlarının təmin edilməsi dövlətin ali məqsədidir”. Azərbaycan Respublikası Konstitusiyasının 13-cü maddəsinin 1-ci hissəsində isə qeyd olunur ki, “Azərbaycan Respublikasında mülkiyyət toxunulmazdır və dövlət tərəfindən də müdafiə olunur”. Konstitusiyanın 26-cı maddəsinin 1-ci hissəsində də göstərilir ki, “Hər kəs qanunla qadağan olunmayan üsul və vasitələrlə öz hüquqlarını və azadlıqlarını müdafiə etmək hüququna malikdir”. Həmin Konstitusiyanın 29-cu maddəsinin 2-ci hissəsində də göstərilir ki, “Mülkiyyətin heç bir növünə üstünlük verilmir və xüsusi mülkiyyət hüququ da qanunla qorunur”.

Bu qədər mükəmməl qanunlarımızın varlığna baxmayaraq, etdiyim şikayətlə bağlı cinayət işinin başlanması üçün kifayət qədər əsaslar olduğu halda, hər şey əksinə oldu. Yəni, cinayəti törətmiş Murad Mehdiyevlə bağlı heç bir tədbir görülmədi. Bu da mənim Konstitusiya ilə qorunan hüquq və azadlığımın pozulması deməkdir. Onu da bildirim ki, təsərrüfatımda çoban işləyən Murad Mehdiyevin əvvəllər evi yox idisə, o, 2016-cı ilin fevral ayında özü üçün torpaq sahəsi almış və mişar daşları ilə ev də tikdirmişdi. Onun belə bir addımı bir daha onu sübut etməyə əsas verir ki, 105 baş xırdadırnaqlı heyvanı satan Murad Mehdiyev, əldə etdiyi gəlirlə həm özünə ev tikdirmiş, həm də əldə olunan pulları minbir yollarla da mənimsəmişdir”.

Rahib Nuriyev “Gündəm Xəbər”ə ünvanladığı şikayət ərizəsində, ona məxsus təsərrüfatda çobanlıq etmiş və 105 baş xırdadırnaqlı heyvanlarını mənimsəmiş Murad Mehdiyevin əməllərinə hüquqi qiymət verilməsini tələb edir. O, eyni zamanda rayon prokurorluğunda cinayəti törətmiş şəxslə bağlı cinayət işinin başlanmasının rədd edilməsi barədə əsassız Qərar qəbul olunmasını da, olduqca təəccüblə qarşılayır. Belə bir səbəb üzündən də, Rahib Nuriyev hüquq-mühafizə orqanlarının rəhbərlərindən, o cümlədən ölkəmizin Baş Prokuroru cənab Zakir Qaralovdan xahiş edir ki, ona bir neçə min manatlıq ziyan vurmuş Murad Mehdiyevin əməllərinin lazımınca araşdırılması üçün, aidiyyəti üzrə tapşırıqlarını versin. Yəqin ki, o halda əsl həqiqətlər üzə çıxacaq və cinayəti törətmiş şəxslə bağlı cinayət işinin başlanmasının rədd edilməsi barədə qəbul olunmuş əsassız Qərarın, hansı maraqlar çərçivəsində qəbul edilməsi təsdiqini də tapacaq.

Mövzuda adı çəkilən hər kəsin mövqeyini dinləyə bilərik. Problemin varlığını diqqətdə saxlayacağıq.

Mirzə

gundemxeber.az